قصة من الواقع عن الشغالات ..؟؟

قصة من الواقع عن الشغالات ..؟؟

السلام عليكم
هذي قصة رجال عصبي .
طبعه كان الى دخل البيت دخلت معه الصجه واللجه وتعودوا عليه اهل بيته
ام عياله وعياله صارعندهم صقع البيبان وجدع المواعين شبه يومي
ويحوسهم عند ادنى شي ..

ومرت الايام
وجابو شغاله وبعد شهر من قدوم الشغاله حدث بالبيت امر كبير وغريب
الا وهو تغيير جذري في طبايع ابوهم
وانقلب 180 درجه وصار دابة سليمه ويا حليله
اصبح منطوقه سموا وش تبون وغدا الرجل المنشود
يوديهم للي يبون ويجيبهم ويسولف ويضحك معهم .

ام العيال شكت بالوضع وراحت للشغاله وقالت :
ابو العيال ماتغير الا من بعد ماجيتينا انت وش انتي مسويه له علمينن
ولك اللي تبين وان ماعلمتينن والله لافضحك واكب عفشك .

قالت الشغاله:
لا ياماما انا اوريك كل شي الحين ..تعالي
وراحت ام العيال مع الشغاله لغرفته وقالت شوفي ياماما..

وش شافت ام العيال تدرون..
شافت صورة ابو العيال مثبته بدولاب الشغاله
وكل وجهه دبابيس وانهبلت وانصدمت الام..
وصاحت بوجه الشغاله هذا حرام ومايجوز حسبي الله عليك ..

وتقوم وتشيل دبوس من الصوره على دخلت ابوالعيال
وهو يصقع بالباب ويدخل المطبخ ويقعد يزعق.
ويقول:
ورا الترمس مابه شاهي لا بوكم لا بو من جمعكم..

وام العيال واقفة .
انقلب الحليل ؛ الضعيفه رجّعت الدبوس للصوره
والرجال مازال يحوس ويدوس بالمطبخ..
قالت الشغاله :
خلاص ياماما الشغل خراب وراحت ام العيال بسرعه للمستودع
وتلتقط له كم مسمار وتلقط المطرقه
وهي تركض وتقعد تطق من هالمسامير بالصوره
لين تكسرالدولاب لكن مافيه فايده وتجي لبوعياله وتمسكه..
وتقوله:
تعوذ من الشيطان واسمع السالفه ..

وتعلمه بالعلم وهو يتعوذ من الشيطان ويتحسب الله
ويذكر الله ثم قال لام عياله هالشغاله ماتبات الليله بالبيت
ضفي عفشها خليني الحق على المكتب ..

وفعلاً قلع الشغاله على طول ورجع لبيته
وقام يتعوذ بالله من الشيطان ويكثر من الذكر حتى اصبح مطمئن .
وبيته وعياله يعيشون باطمئنان .........
أليس بذكرالله تطمئن القلوب ....... تطمئن البيوت .... تطمئن الحياة .

انتهت السويلفه غفر الله لي ولكم ولوالدينا وللمسلمين والمسلمات ..
ولكم تحيات
ماجد البلوي