يا موتري لا تضايق من مشـــاويري = يوم أن راعيك جا المغباش له عـــاده
مااظن يصلح يسوقك واحدٍ غيـــري = أصايدك من الحصا وأرفق بك زيــاده
جيب بدفعٍ رباعـــي نقلـــة القيـــري = ما ودك أنه يشوفه بعض حســـاده
كم مرة في السهل نمشي مـــداويري = وكم مرة قد مسكت طويق وشـــداده
أحيان نسري وحينٍ نمشي اعصيري = واحيان قبل الفجر والناس هجّـــاده
يوم ان بعض العرب يهوى المصافيري = يجيه وقت الضحى والظهر في رقـاده
أهوى المغابيش قبل ايصوُت الطيري= يوم ان بعض الشباب يكبّر وســـاده
العين عافت لذيذ النـــوم يا طيري = أبغى المقانيص يوم القنص لي عـــاده
معنا اشقرٍ ضربته للخرب تمــزيري= أفدغ وحرشٍ اكفوفه ويل من صــاده
مع هدّة الطير يذهب كل تفكيـــري= أنسى مماتي وكِنّ العمر بزيـــاده
يا زِين شوف الحباري بالمناظيــري= في خايعٍ مابعـــد زاروه رُوّاده
ويازِين شوف العشاير و المظاهيري= لا روّحت مع رقاق الحزم منقـــاده
يا ماحـــلا شرْبك لـــدرّ المباكيري= أخير من نيدوٍ به سكر زيـــاده
وماكول قرص الجمر مع تمرٍ وضيري= أحسن من البيتزا والشورمـــا زاده
وجذبك بدلوٍ به الماء من جبا البيري= أخير من ماي صحه وســـط برّاده
البر يســـوى مسلسل سالم الزيري= وأحلا من مشاهد الكوره مع استـــاده
شوف البراري ولا شوف المقاصيري= أو شوف نخلٍ ظمايا واجد عيـــاده
في روضةٍ غاديٍ للعشب تنـــويري= يازِين شوف الخضار وزِين مقعـاده
معك نشاما مخاوينك منـــاعيري= رجّالهم منوة للقلب واسْعـــاده
حولك ادلالٍ بها البُنّ المباهيـــري= بهارها الهيل والمسمار هو اقنـــاده
أحسن ولا رفقة اربوع ٍ معاثيـــري= هرج القفا عندهم هو ثالث اعْيـــاده
أحباب وأصحاب بقلوب المثابيري= تضحك وهي لشذبة العرقوب معتاده
يقفونك الهرج بألسنةٍ مناشيـــري = واحَدْهم إلى نصحته زاد في عْنـــاده
هذاك كُبّه فلا به نفعٍ وخيـــري = ما يتّعظ في الكلام الزين وارشـــاده
نومك بجو خلا مافيه تكديـــري = يسوى الفنادق وقصرٍ قلَّوا أجـــواده
ما حولك ألا الطيور أم المناقيـــري = امنفّضة ريشها للجـــو رَوَّاده
ورزقك على اللي رزق لدباش والطيري = اللي فرض ركن حج البيت واجهاده
الرزق عند الولي رب المقاديـــري = اللي جعل للخلايق ذكر وعبـــاده
وصلاة ربي عدد وبل الشخاتيــري= على نبي جعل يثرب هي بـــلاده
