قصيدة ( أهل الشمال )للشاعر / عوض بن طالب الفاضلي البلوي

قصيدة ( أهل الشمال )
للشاعر / عوض بن طالب الفاضلي البلوي
( ابو ريان )


اهل الشمال احنا هل العز والجاه .
رمز الاصاله والصدور الوسيعه ..

اهل العطا و اهل السيوف المحناه ..
ماعاش فينا مهتوي للقطيعه..

الطيب كايد والكرم صعب ممشاه..
وحنا ركايبنا براس الطليعه ..

يوم الردي ناقل شقى داه برداه.
نبذل من المعروف ما نستطيعه.

خوينا بالدم والروح نفداه ..
والعمر باول سوم لاجله نبيعه..


عدونا بسيوفنا نقطع رشاه ..
يبشر بضربه من يدينا شنيعه..

الصدر واسع لكن القصد معناه ..
نصبر ولا نرضا الخطا واللكيعه..

صدر الشمالي لانطبق جا من اقصاه.
ضد العوج تاتي خطانا سريعه ..

الميل وسط صفوفنا ما رضيناه ..
وحنا مثل لاهل القلوب الشجيعه..

اقلنا يفزع لمن جاه ينخاه ..
غريزة منا وفينا رضيعه..

بعزومنا نرقى سما دون ملهاه
ونمشي على درب الهدى والشريعه.

اهل الشمال وجونا زان مشهاه ..
شط البحر والبر صيف وربيعه..

والي نصانا وافي الكيل يلقاه..
نسقي فياضه لين يخضر ريعه..

كف البحر من جودنا قد مليناه ..
الين فاض وزان مطلع ربيعه..

وجوف الكرم والطيب والعز غصناه.
ونفوسنا بالعز رويا شبيعه ...

حنا الشموخ الي تعلى بمبناه.
ونفوسنا بالعز شبعا قنيعه ...

الجود ساس بمجدنا ما ورثناه ..
فينا الكرم من ساس ماهو صنيعه

لو الكرم محيط حنا شربناه ..
فايض كرمنا للسباع المجيعه ..

دلالنا تصبح على النار مركاه ..
والنار للضيفان دايم مشيعه ..

عاداتنا للضيف حيلن منقاه ..
ومنزالنا روس الجبال الرفيعه.

ما نقبل الي مختلف في نواياه ..
روح الوفا في محتوانا طبيعه.

ولا هو بنقصن في قبايل مسماه ..
قبايل تتبع ولا هي تبيعه ..

كل القبايل كفو والطيب تقناه ..
والجود والمعروف فيهم ذريعه ..

والي هضم حق المخاليق تشناه ..
والطيب ضافي بالفجوج الوسيعه..

صح لسان الشاعر
والنعم بأهل الشمال وجميع القبايل والعاوائل

مشكور ابو شادن