نم وتهن بنومتك تصبح بخير= لاتمتحني ياحسين الدلالي
توك صغير لاتحط المناكير= لاتسبق احداث الزمن ياحلالي
لايجرفك درب الهوى والمخاطير=يكفيك من درب الهوى ماجرالي
صارت حياتي في يدين المقادير=تلعب بها شرق وجنوب وشمالي
ابى أتريح وليالي مدابير= عيت تذوق العين نوم الليالي
تعبت وأتعبني كثير التفاكير= وأصبحت مثل اللي من العقل خالي
بأسباب من تسوى جميع الغنادير= الأولات ونادرات التوالي
بنتٍ بقلبي ساكنه حبها غير =حبٌ بقاموس المحبه خيالي
احيان احس بكلمة الحب تقصير= ابي لها شيٍ صعيب المنالي
شيٍٍٍٍٍ يصور داخل القلب تصوير=يكشف لها عن كل شيٍ فبالي
لا شك راحت ما تفيد التعاذير=واصبحت من بعده وحيدن لحالي
هاذي حياتي وانت تصبح على خير=دور على شخصٍ يحبك بدالي
اخوكم ابو ريان
