حترت مابه ماشفت شي يحاليه
السلام عليكم ورحمة الله وبركاته
شـي بقلبـي يامـلا حايـر فيـه =شي تحير بـه العقـول الفهامـي
اخفيـه بفـوادي ولا ودي ابديـه =وادور الخيـرات شـرق وشامـي
احترت به ماشفـت شـي يحاليـه =واليوم ابنشد عنـه مانيـب كامـي
سيل حدر مع وادي غيـر واديـه =مـدري حـلال مـاه والا حرامـي
كانه حلال وجايز شـرب صافيـه =وش حلله يـا مفسريـن الحلامـي
هاتـو تفاصيلـه وهاتـو معانيـه =نبي الدليل اللـي عليـه الكلامـي
نبي دليـل يفهـم الـدرب ماشيـه =يمشي بـه التايـه بليـل ظلامـي
يمشي به التايه ويقـدي مواطيـه =ويشرب قراح الما اليا صار ضامي
لاشك هجسي يـوم خـلا مماشيـه =انـه حـرام ومنـه زود الاثامـي
احرم مـن الزقـوم مـره وحاليـه =وشربه على الظامي يزيد الهيامـي
الله مـن قلـب همومـه تقـزيـه =تدك بـه مثـل الجـراد التهامـي
من مما جرا قامت تتلـه مشاحيـه =تل الرشا من فوق هدف المقامي!!
روابـع قامـت تصيبـه وتخطيـه =شاف الهوايل واختـلاف الاسامـي
ما يسمع الداعي اليا قـام يدعيـه =يعوم في بحـر مـن الهـم طامـي
ما ينتبـه للـي بصوتـه يناديـه =يزيـد همـه يـوم كـل ينـامـي
يشـوف وقـت ماعرفنـا تواليـه =وقت يشيَب من بسـن الفطامـي!!
هـذا زمـان كـاثـرات بـلاويـه =والغيم يقلـب فيـه عـج وكتامـي
يابعد شرب الما على كبـد راجيـه =ما سيَل الغبـرا زعـوج الجهامـي
انبيك يامن كلمـة الحـق ترضيـه =اعطيك ما ينفعـك وافهـم مرامـي
قصـر يذلـك لا تقابـل مبانـيـه =خله عسى شامخ طويله هدامـي!!
خله عسى ما صاب اغادير يفنيـه =يودع منازله الطويلـه رجامـي!!
لو زان مدخالـه وطالـت حواميـه =شيَد على الخيبـه قليـل الرحامـي
وحـي يوريـك المذلـه وتغلـيـه =انا اشهد انك ميت القلـب عامـي
مـن لايـودك لا تـوده وترجيـه =ارفـع مقامـك ياعزيـز المقامـي
ارفع مقامك عن عـدوك وتوذيـه =ويلحقك من تركت رفيقـك ملامـي
حـق الرفيـق وواجبـه لا تخليـه =يلزمك مثـل الوالديـن الحشامـي
اختر عزيز الجار والحـق يعطيـه =شبل على هـرج يقولـه يحامـي
مادك به عـرق المذلـه وطاريـه =ويسبق على فعل الفضيله شمامـي
ومن قارب الاجرب بالامراض يعديه =عداوة تسطـي باللحـم والعظامـي
درب السلامـه بينـات مماشـيـه =ودرب العطب يرث عليك اللكامـي
ابعد وقلبك نـازح البعـد يشفيـه =وتلقا عن الدار البغيضـه مقامـي
دار بدار وداعـي الـذل عاصيـه =ولا تقبل الذلـه نفـوس الكرامـي
الـذل مـوت حايمـات ضواميـه =ادخل على منزل فروض الصيامـي
عن مقعد بالـذل عينـك تراعيـه =الموت عند الذل امـان وسلامـي
يرضى المذله من تـردت هقاويـه =والذل يجفل منـه قلـب العصامـي
والعبد له رب عن النـاس يغنيـه =ولولاه ما صاب الهدف كل رامـي
الامير محمد السديري
احمد عبدالله البلوي
