مصادفة موارات سلطان للثرى يوم الثلاثاء تجدد كلمات "ليت الثلاثاء ما كتب يوم بكتاب"

وداع سلطان الخير يعيد للأذهان قصيدة كُتبت قبل 14 عاماً: وين أنت يا غيثٍ من الجود صبَّـاب

"وين أنت يا غيثٍ من الجود صبَّـاب"، شطر من قصيدة طويلة كُتبت في فقيد الوطن والأمة، صاحب السمو الملكي الأمير سلطان بن عبدالعزيز، رحمه الله، قبل نحو 14 عاماً، المصادفة التي تعيد للأذهان قصيدة الأمير بدر بن عبدالمحسن، تعود إلى قصة القصيدة، وأحد أهم أبياتها الذي قال فيه الأمير بدر:" ليت الثلاثاء ما كتب يوم في كتـاب، من غبت يا جبر القلـوب المكاسيـر"، حيث صادف يوم أمس الثلاثاء، مواراة سلطان الخير الثرى بعد تشييع جثمانه والصلاة عليه.

وتعود قصة القصيدة الحزينة إلى عام 1997م، حيث كان سموه يجمع أبناء الأسرة المالكة في مجلس قصره بالعزيزية كل يوم ثلاثاء، ونتيجة لإجراء عملية جراحية لسموه، توقفت وقتها الجلسات، فأنشد الأمير بدر بن عبدالمحسن القصيدة، التي يشكو من خلالها الحزن على سمو الأمير سلطان، واللهفة والشوق والحنين للقائه، رحمه الله.

الليل هوّد واكهف النجـم لغيـاب
قضى الحديث وودعونـا المساييـر
أحدٍ قفل دون هوجاسـه البـاب
وأحدٍ غدت جدران بيتـه تفاكيـر
يا ساكن الهوجاس ممسـاك ما طـاب
راحـت مجاهيـم وجتنـا مغاتيـر
لا والله الا ضامنا بعـد الاحبـاب
والشوق ظالـم لا تعـدى المحاذيـر
أحبابنا اللي عقبهم كننـا أجنـاب
لو ما جفتنـا الـدَّار دار المناعـيـر
ليت الثلاثاء ما كتب يوم في كتـاب
من غبت يا جبر القلـوب المكاسيـر
كل ما ذكرته قمت للوصل طـلاَّب
وقلت القطاعة في هل الرحم تقصير
وين أنت يا غيثٍ من الجود صبَّـاب
يمينك أكرم مـن سحـابٍ مزابيـر
وين أنت يا معتق من الحاجة ارقـاب
ايضا وبك لطفٍ وحكمـة وتقديـر
قالوا مريض وقلت لشفاي لاطـاب
وقالوا بعيد وقلـت حنَّـا المعاتيـر
والله لو تطوى له بحـور وهضـاب
ما هو جزا له مير للشـوق تصبيـر
أنا أشهد إن الحب تكتب له أسباب
وما كل قاعٍ فيـه تنبـت نواويـر
يا شيخنا تكفيك لو ضحكة النـاب
وشلون وانتَ ما تحسـب المخاسيـر
حنَّا مثل غرسٍ سقي ديـن وآداب
وتاريخ من فعله تعـدى الاساطيـر
وقت الرخا نرجى وفي الحرب ننهاب
ولاجا لزوم الشيخ حنـا المذاخيـر
كبيرنا في السن نحسب له حسـاب
وكنَّه مع اللي سابقٍ سنَّـه صغيـر
أنتم عمود العز وحنَّا لـه اطنـاب
نرسى ولو هبَّت هبوب ومعاصيـر
وأرض الجزيرة ما بها ربع وأغـراب
الاصل واحد والشـرف والمقاديـر
والله فوق الكل والشـرع غـلاَّب
حب الوطن من حب والي التدابيـر