قصيدة للشاعر بشير عرابي البلوي وهي بالنجر والدلال مع نصيحة للشباب

بسم الله الرحمن الرحيم

قصيدة للشاعر بشير عرابي البلوي وهي عن النجر والدلال مع نصيحة للشباب

يلي تقولون دنت النجر به عيب=هات الديل ولانبي شي ثاني
قلتوا تعوض المطحنه فيه وتنيب=ومتطورين ولانبي قرقعاني
النجر عندي مابصوته عذاريب=وبننً بليا دنته مايهناني
بين الأصابع ياعوا كنه الذيب=قنيب عودٍ طالع الصبح باني
النجر صوته يطرب البال تطريب=يشدى قنيب الجايع السلوعاني
يازين صوته بين بيضٍ محاديب=مثل الفحل من بين وضحٍ سماني
مايودنً للمطبخ لشغل الرعابيب=بين القدور وبين درج الصياني
بيضً يصالن حاميات اللواهيب=وببهارهن هيل وبه زعفراني
يحوفهن خطوا المشبب بترتيب=طلق الحجاج الوافي البهلواني
في مجلسٍ راعيه رحب تراحيب=ماصك باب البيت عن كل عاني
واللي يجونه كاملين المواجيب=رجال لهم بالطيب ساس وبياني
واللي يسولف شامطٍ لحيته شيب=بأفعال فرسانٍ بماضي الزماني
عصم الشوارب متعبين المناجيب= بالقيض وألا بالشتاء الترهماني
على الأصايل يقطعون العباعيب=كسَابة الناموس بالإمتحاني
راحتبهم سود الليالي مغاريب=ولاباقي إلا علومهم بالمكاني
راحوا وأنا قلبي جروحه معاطيب=وديبهم مار الزمان يعصاني
وجدي عليهم وجد شالح على ذيب=أو وجد ابن عدوان راع التماني
اللي تطورهم على منهج الطيب=ماهي تطور شلة السيكراني
وناسٍ تطورهم على شقة الجيب=بمتابع الأفلام هي والغواني
من أكل الحبوب وجيههم به شواذيب=يرقص لهم شيطانهم بالتهاني
أصحاهم العاقل يغيب تغاييب=مثل المريض اللي به البنج باني
تكفون ياعقب الرجال المواهيب=ترو الذيابه ماتعقب حصاني
وحنا عرب لنا سلوم ومقاضيب=ونحمى شرفنا عن دروب الهواني
وعلى الشريعه ناخذ الحق ونجيب=ونمشي بحق وبالله المستعاني
وأسلامنا مافيه شكٍ ولاريب=ولانقلد اليهود والكيفراني
تم الكلام اللي نظمته بترتيب=بإحضار من جاشي لفظبه لساني
نصيحةٍ لأهل القلوب الملابيب=من تاب تدبل سيته له حساني
وصلوا عدد خط القلم بالمكاتيب=يالله على الدرب الفضيل تهداني

أترككم مع المقطع بصوت الشاعر

http://www.youtube.com/watch?v=ACQPNi3Op9I&feature=youtu.be