الصاحب اللي صد عني وأنا اشوف

..

الصاحب اللي صد عني وانا اشوف
إن قاله الله غير يلقى صدودي

ماني على كيفه ولاني بمكلوف
أتبع سرابٍ ما يبل الكبـودي

عسى التعب في داعج العين مخلوف
مزنٍ ترازم له بـروق ورعـودي

يلوف قلبي لاطريـت اسمها لـوف
لوف العديم اليا شبكه الشرودي

قلبي وحش ماهو على الحب معسوف
حتى سلب قلبي عريـب الجـدودي

هذا بلا قلبي وهذا عمى الشوف
وما ألوم قلبي لاتعدى الحدودي

والمعركة في جرئة النفس والخوف
تحـد قلبـي لايبيـح السـدودي

صحيح لا قالوا : ترى غيره ألوف
مير البلا ياحـمـود عنق العنودي

ياقلب كانك من محبتك مكسوف
على طريق أهل الهوى لاتعودي

لابد من يومٍ به الموت محتوف
ولابد ماندفن بوسـط اللحودي

لا صار مالي مع هل الحب معروف
طويت دلوي دون جـم العدودي

ولاشبت النيران في داخل الجوف
سهـرت ليلي والخلايق رقـودي

ولا صار مالي مع هل الحب مصروف
ماني بناشد ويـش نقصي وزودي .. !

هذا وانا ماني مع الناس مكتوف
أنأ زبون الطيب والجود جـودي

تشوم نفسي عن ردى الناس وتعوف
وأبيــع روحي دون غــض النهودي

قلوبنا صـمٍ ولاتـعـرف الخــوف
لا قربـوا لـنار خـشم الزنودي

أخوكم / حمود خلف البلوي