قصيدتي بمناسبة تكريم الشاعر/منيف منقره

أبتــدي بالله خـــلاَّق الـــبريـه
وحده المعطي ويامجزل عطاه
كاشف الاسرار علام الخفيه
بالشدايد والرخا مالي سواه
يوم فاض من الغلا غيث برديه
وكـل عرقاً(ن) في شراييني مـلاه
أمطر الهاجوس ياربعي حميه
وجاء يعبر بالقوافي عن غلاه
يابلي لعيونكم سقت المطيه
سقتها والشوق واصل منتهاه
وقفتي مابينكم حقٍ(ن) عليه
اكبر من حقوق الأمانه والوصاه
والفخر لا شك في هاليوم ليه
جيت البي دعوة الشيخ ونداه
ابن رفاده منبع الجود وسميه
شيخ شمل وجامع منصب وجاه
بالفعايل حازها طبع وسجيه
يشـهد الـتاريخ وأقلام الـرواه
للكرم فنجال كيف وشاذليه
والحجاج الطلق للضيف وعشاه
من رحابة صدر وكفوف(ن)نديه
شـرَّع أبـواب السـعد للي نصــاه
ويوم كانت حد سيف وبندقيه
مـاتجـرا المـعتـدي يـدخـل حـماه
دون ربعه واقفٍ(ن)في كل هيه
مـزبن المـحتاج حمـاي قـصــراه
حي والله هالقبول السمح حيه
حـي مـن للمـجد حـلق واعـتلاه
ودون تحديد الاسامي والهويه
ياهلا بمن شـرف الـحفل ولفــاه
عد ماناضت بروق العقربيه
وارتخـا همـالـها يـسقـي ثراه
جو وفا لمسامِر الشعر وخويه
مـن رسـم تاريخ للشـعر وبنـاه
ذا منيف المنقره وأبصم بيديه
إن مــالـه مــن يــــوازي مـــسـتواه
لا انتهـض للحونها جاب العصيه
مـعجزه تصعـب على روس الدهاه
ينتقى من واحة الجزل برويه
صفوة ابياتٍ(ن) تسامت عن رداه
لين فاض الطيب من حالي دليه
وكـل عـطشـان(ن)من الجمه سـقاه
ذا منيف المنقره والنار حيه
هـيبة حضـوره تشـد الانـتبـاه
ياهل المعنى أبعطيكم وصيه
أحـفظـوها كـان تبغون النجـاه
البحر لا صارت أمواجه عتيه
يـَتعب الـغواص مــاياصل مـداه
قــلتهـا لا شــك مــادور جــزيــه
واجبـي مــالي مـشاريـهٍ(ن)وراه
وباقي(ن)في خاطري منها بقيه
حـافظـاً بـين الـحـنايا مـحـتواه
والصـلاة خـتام للـهادي نـبيه
طــاعــته هــي راحـة الـقلب ودواه


وازن يحيى أبوشامه البلوي