قصيدة وصيّه الميّت لـ حسين قسام الخفاجي..؟؟

قصيدة وصيّه الميّت لـ حسين قسام الخفاجي..؟؟

بطلوا من البواچـي لا تخرعونه
ميتكم فطس ومبحلج أعيونه

وصّه أجبيّر وشمخي على التنور
وگاللهم بعد عندي عجل مكسور
وگاللهم بعد عندي هويشه وثور
للخطار ثوري لا تذبحونه

وعندي بعد خنجر ماكو بيه أگراب
وعندي طاكَ رحه ومعجنه وجراب
وعندي أجاجه عوره وعندي تسع أچـلاب
وعندي چـلب أعرج لا تبيعونه

وعندي بيت بردي ماعليه أحصير
لو گـام الهوه كل الحنايه أتطير
وعندي تانكي بي چـنت احط اشعير
أمزرّف والتنـكــچـيّه يلحمونه

وعندي جرد قوري بغير بلبوله
مو سكسون محد شايف اشـچـوله
يخر من صفحته لوهيّس أبلوله
خلوه بثوابي لا تكسرونه

وعندي جرد دوشك خذته ربيّه
شغل بيروت جبته من الصليـچـيه
وعندي حزام بردي وجرد صينيه
وعندي صخل أعشم لا تجوعونه

وعندي ميجنه وجاون وجرد الحاف
شريته العام من أجبير النداف
أبدال الگطن حطوله ورك َصفصاف
للخطـــــــــــار يا ولادي تخلونه

وعندي شماغ شعري مشتريه بفلوس
بصندوگي مطّركَ بعده ما ملبوس
وعندي كحل صافي جايبه من ( الروس )
بثوابي للأريمد كحلوا أعيونه..
لمن ألأدب الشعبي العراقي..
ولكم تحيات
ماجد البلوي