الشاعر محمد بن سند العرادي\\ نويت اصير من الهوامير بالدين
هذه قصيدة رائعه للشاعر محمد بن سند العرادي
في الاسهم السعوديه تعبر عن نصيحه نابعه من القلب للجميع المستثمرين الصغار
هات القلم واكتب من الشعر بيتين = نويت أعد أبيات وأنا لحالي
اليوم أنا كسبان بالسهم عشرين = وخسران ميه بالسهم راس مالي
حسبت وإليا مخسري به ثمانين = ياليت ما سويتها في حلالي
بعت البيوت وثم بعت البساتين = وبعت العشاير ثم بعت المتالي
نويت اصير من الهوامير بالدين = بعد الحصيره فرشنا من الزوالي
مني نصيحه للضعوف المساكين = لا يغرهم كثر الرعد والخيالي
ياهل المحافظ صابرينً الى وين = المكسب المطلوب مبلغ خيالي
يضحك معك والدمع في حاجر العين = واليا سالته قال مالك ومالي
ياهل العقول الراجحه بالموازين = لا تدخلون السوق والجيب خالي
الناس فيهم يشتغل بالملايين = وفيهم لقى له مال من غير والي
لا تصير مثل الي يخاوي المجانين = ويطيح مثل مقيط من راس عالي
إن القناعه كنز وأما الطمع شين = والصبر مفتاح الفرج لا تبالي
كلن خذا خابور ويقول بعدين = إن مت يبقى للمره والعيالي
صلو على المختار حيناً بعد حين = مرسول من رباً عظيم الجلالي
