محاوره قويه بين مستور والرياحي

فيصل:

سلام الله عليكم من ضميرٍ دق به هوجاس // يهندب والعصيمي عارفٍ قصـة هناديبـه
لقيت إبليس أخو مره يدبر في عقول الناس // وأنا عقلي سليم ولالعبـي فـي ملاعيبـه

مستور:

هلا يامرحبا في حفل قومٍ يرفعون الرأس// رجالٍ يالرياحي تعطي اللافي مواجيبـه
تعوذ من بليس ليا لقيته وإترك الوسواس // وخل اللي يشيل الكيد يقبل به ويقفي بـه

فيصل:

أنا مأبغاك يامستور تلبس للعلـوم لبـاس // يعذرب فيك بكره واحدٍ نـاسٍ عذاريبـه
وأنا مأبغى صديقٍ كل يوم يجرد الأمواس // يشذّب في عراقيبي وأشذّب في عراقيبـه

مستور:

أنا ماقلت لك دخّل جحا في بيت أبو نوّاس // أبو نوّاس يعط العلم مايحسـب عواقيبـه
ألا ياصاحبي ماينبني بيـتٍ بليـا سـاس // ليا منا بنينا البيت نصبح به ونمسـي بـه

فيصل:

ولا يامطوع الهادي لاجيت مطـوع العبـاس // حديثٍ مـارواه أبـو هريـره لايجينـي بـه
بنيت البيت مير أحرص وحط الباب والحراس // قرب منه الحرامي وإن دخل فتـش دواليبـه

مستور:

ترا حنّا العرب والإسم واحد والطبوع أجناس // أحد يبدي عذاريبه وأحـد يخفـي عذاريبـه
وأنا ماودي إن السلك يجرح لين يضرب ماس // ليا راحت وجت ماللصحيب آكود أصاحيبـه

فيصل:

لاشفت من العرب رجلٍ يرحب بك على الإفلاس // لاتضحك لو ضحك سنـه ولاتسمـع تراحيبـه
ليا دن الجرس للحرب دنـت باقـي الأجـراس // وبعض القوم مايلقى المكان اللـي يصلـي بـه

مستور:

علامك قمت تنشرها مع العالم بدون قياس // ترى طرقٍ تغني به مع العالم نغنـي بـه
أنا قلت إلك لاتفهم غلط يالشاعر الحساس // أملنا فيك زين وكل علمٍ زين تحري بـه

فيصل:

لاوالله مانشرت النار لو يقبس لهـا المقبـاس // جريده صادره من سوق عمك وأنت تدري به
لياراح الكلام العاطفي حبرٍ علـى قرطـاس // زهمتك لين أشوف العلم وش مخطيه وإمصيبه

مستور:

علامك محترق ماكنك إلا بن في محماس // وأنا وأنته ماننزل فالشعيب اللي عوى ذيبه
ولاياصاحبي لايلتوي حبل الرجا واليـاس // ترى المجنون ولعهـا وطفينـا مشاهيبـه

فيصل:

أنا مألعب يابو تركي مع اللي يلعب الدسـاس // أحد السيف وأضربه وأشد الخصم وألوي بـه
لكن إجلس معي ساعه وترضى باقي المجلاس // ترى ماهمنا المجنون لو كـان إنفـرا جيبـه