هذا الموضوع قرأته و اعجبني واحببت أن تشاركوني متعة قراءته ..يالنشامى والنشميات
الشاعرين هم
سعد بن عبدالله بن حسين الهتلاني العجمي - الله يرحمه ويغفر له -
ضيدان بن صبحان اللزيزي العجمي - الله يطول عمره على طاعته -
__
(1)
ضيدان اكبر من سعد بواجد .. وهو شويب .. المهم تنوم ضيدان بالمستشفى .. وزاره سعد قاله (
الحمدلله ان عادك حي .. ولا انت لا مت برثيك .. لكن ودي تسمع مرثيتي وانت عادك حي ) .. قال ضيدان: (
اسلم . خلني اعرف وش بتقول ؟
http://vb.eqla3.com/images/smilies/soujojo.gif )
قال سعد :
عسى النفل ينبت على قبر ضيدان ...
قاله ضيدان : ( وقف وقف .. \\ النفل بتاكله الدبش وبيغدي قبري مرعى .. لا عاد تقول شي .. كفيت ووفيت ! )
__
( 2 )
هذا يومٍ من الايام ظهر سعد مع ضيدان الصبح ووقفوا عند بنشري يصلحون الموتر قبل لا يكملون مشوارهم .. وشاف سعد هالمطعم مدري البوفيه القريبه من البنشر .. راح يجيب له ولـ خوييه شي .. كان معه250 فلس
اشترى لنفسه حليب شاهي بـ 150 فلس .. ولـ ضيدان شاهي بـ 100 فلس \\ وعطا ضيدان الشاهي وخذا الحليب ..
تطلب لي الشاهي وتطلب لك حليب __ وانا على الحليب كبدي ذايبه
انا احمد الله يوم منت بلي نسيب ___ ويقطع صبيٍ ما يقدر شايبه
تبغي حليب اطلب من المطعم وجيب ,, لاني بطالب لك ولاني جايبه
ازعجتني من يوم طرّيت المشيب ,,, واتعبتني مثل الوزير ونايبه
في خوّة الطيّب انا مالي نصيـب ____ ومن خوة الرديان نفسـي طايبـه
وقد كان ظني فيك للعلـه طبيـب ____ والاريا.. بها مخطي وفيها صايبه.
كل ٍ يبي يرمي رفيقه فـي قليـب __ وابليـس نـوّخ عندنـا ركايبـه
وعلّمته الممشى سبقني في الخبيب ___ اللي علومـه كلّبوهـا خايبـه !
__
(3)
هذا طال عمركم كان عند سعد الله يرحمه بيوك اتماتيك ( وتمثل الراحه للبدوي عقب العنى
http://vb.eqla3.com/images/smilies/biggrin.gif ) المهم وانعزم هو وصاحبه ضيدان عند المحامي ثامر المجدعي في منطقة هديه .. والعشا لضيدان ولـ سعد .. المهم ويجي سعد لـ ضيدان العصر ويقوله
نمشي ياخوك .. قال
والله يابوك اني واني . خلها على وقتها ونشوفه
اييييه .. وراح سعد العشا ولا جا ضيدان .. عاد عوّد سعد تالي على ضيدان قاله (
وش عندك يومك تترك عشا الرجّال وهو موجبنا ؟) قال
( والله يابوك التعب والشيب وانت خابر العمر ).. قال سعد(
اجل هذا العلم .). قال ضيدان .. اي والله .. قال سعد (
اجل اسمع http://vb.eqla3.com/images/smilies/biggrin.gif )
إن مت ياضيدان ماني بباكيك ...و ان مت انا لياك تبكي عليـّه
مانت بكفو ياعود لامت نرثيك ... ما خبر منك الا الشقى والأذية
نسيت يوم اتعبتني في ترجيك ... العصر يوم ان العشا في هدية
تبغي المحامي يالردي يتصل فيك .. وش انت حتى ماتجي بالوصية
عود معقد والتعاسة تباريك ... و مؤهلات معالجيتك ردية
ياخف نفسك قبل تثقل مخابيك .. و اليوم حتى ماترد التحية
يا والله اللي به رجال تساميك .. لاشك يابعد السمي عن سميه
جاتك و انا راعي البيوك التماتيك ... فيها اعتزي و لا اعتزي بالمطية
نقطع امداد من طرفنا يغذيك ... يومك بطول و نيتك قلبية
__
(4 )
هذا انت ياسعد شاب لكنه مهب ذاك النشاط .. وضيدان شايب لكن - الله يعطيه الصحه - متعافي ومبينّه عليه اثار النعمه .. وياكل ولا عليه من كلام الدكاتره ولا اللي يقولونه .. وايده دايم للشحم واذا اكل اكل
http://vb.eqla3.com/images/smilies/icon120.gif
مايشبع الا فالولايم والافراح
ذا المسلم اللى صار بطنه فضيحه
ماأدرى معاه الجن تاكل والاشباح
والا شفاح اهل الكبود الصحيحه
يحضر عند الناس والقدر مافاح
لين العشا عنه الستاره نزيحه
ماهمته نسبة دسمها والاملاح
وعيا من الدكتور يسمع نصيحه
والمشكله ماهوب للضان ذباح
استادكم ياللى ألسنتكم فصيحه
لادل من رايه ولاهوب نصاح
جعله يطيح وينثبر فى مطيحه
قال ضيدان .. ( العلم كذا .) . قال سعد( هالله الله ) .. قال ضيدان
( اجل اسمع ):
ابوحميد بيتعشى ويرتاح
وماكل ليل عند ربعه ذبيحه
فى بيت منه للمواجيب نطاح
محمد منصا الوجيه الفليحه
والحر ياتيبه من البعد ملواح
والعود يجذبنا من البعد ريحه
ودنياك يابن حسين ماجات به راح
وعزى لكم ياهل النفوس الشحيحه
اضحك وانا فى ايدى زقاره ومسباح
وخل الزعل لاهل الوجيه القبيحه
العود يطرح له ثلاثين ماطاح
مهوب مثلك عاجز فى نطيحه
يغشنى غش البريكات مزاح
الله لا يثرى ثراه ويبيحه
