(( وصية الشعر ))
شـــعــــر
ياوجـودي وجـد منهـو ماتـو أعيالـه وشـايـب = أو وجـود اللـي توجـد ضاقـت الدنيـا بعيـنـه
هاجسي لا طال ليله ساقنـي .. وسقـت الركايـب = لا تغنـى بالجـزايـل .. خابريـنـه .. خابريـنـه
هاجسي لامن تهيـض مثـل غيـم المـزن طايـب = والله أنـه مـا يشـح الهـاجـس .. الله لا يهيـنـه
يشبـه لمـوج البحـر لاهـاج بمواجـه عجـايـب = ادري أنـه يشبـه الربـان .. فـي متـن السفينـه
لا تهيض ساق رجلـي غصـب لطـوال الجذايـب = يوم جيت الرجم ضاق الصدر في وقتـه .. وحينـه
شفت عود(ن) مرقب المرقـاب وأدموعـه سكايـب = أيتعبـر .. ويتهضـم .. يفـرك الشايـب .. يدينـه
أشهـد أنـه هزنـي منظـره والخـفـاق ذايــب = ياجماعـه هالنـي مبحـوح صوتـه مـن ونيـنـه
شايب(ن) عدى على المرقـاب وأجروحـه عطايـب = من يشوفه .. من يشوفه .. يخلف أعقول(ن) .. ذهينه
كل يوم أيزود همه .. من ذهايـب .. فـي ذهايـب = مايهيّـد مـن ونينـه .. مايهـيّـد مــن حنيـنـه
شفـت بعيونـه ملامـح مـن علامـات النـوايـب = يشبـه لكهـل الضـواري أشهـب(ن) فاقـد يقينـه
لحيتـه بيضـاء بوجهـه كلهـا أغبـار .. وترايـب = أنحدر شعر الحواجب وأختلـط .. برمـوش عينـه
أحدب(ن) حاله هزيل وجارت أظروفه .. صعايـب = يبتـرم ويهـز راسـه واضحـه فيـه .. الغبيـنـه
مثل عود(ن) فـي سمـوم القيـض يبّسـه الهبايـب = زفرتـه تفضـح مشاعـر كانـت أبصـدره كنينـه
شايب(ن) لاشفت حاله يشتكي ضيـم .. ومصايـب = بانت الحسره بوجهـه والحـزن .. غطـى جبينـه
ألتفـت وده يقـوم ويشـر أبـصـدره .. لهـايـب = نارهـا .. ولا سناهـا .. تحتـرق منهـا .. مدينـه
قال انا المنهان عفت الوقـت مـن زود .. الغلايـب = يشتكيلي مـن زمانـه عايـف(ن) شينـه .. وزينـه
قلت وش بك ؟ وش علامك ؟ قال من ضيم القرايـب = قلت قلي من تكـون ؟ ورد فـي نبـره .. حزينـه
قال انا الشعر الجزيل اللـي لـه اعلـوم وطرايـب = في زمان(ن) فات دوره شامخ(ن) .. محـلا سنينـه
لي تواريخ(ن) عضيمه .. سامكـه فـوق السحايـب = عنـد نـاس(ن) لاحكـو بالشعـر قـدره حاشمينـه
بالجزايل .. والفرايـد .. والمعانـي .. والغرايـب = عالي(ن) قدري رفيع وكانـت أعلومـي .. رزينـه
دارت الدنيـا باأهلهـا وغابـت أعلـوم الحبـايـب = وين راح أفلان .. وأبن أفلان .. وين فلان .. وينـه
مابقى للشعر قـدر وكـل شـي(ن) لـه .. سبايـب = جاء زمان(ن) .. ماعرفته .. ثقل دمه .. ثقل طينـه
قال لي أرجـوك جهّـز للشعـر عـوج النصايـب = وأدفن الذكرى أخير(ن) وأتـرك أعلومـي .. دفينـه
خليـف الجهيلـي
عن مجموعة النداوي الشعبيه
