معاناة جماهير الاهلي...ياساتر

http://img.aljasr.com/icon.aspx?m=blank

السلام عليكم ..

للأسف .. معاناة الجماهير الأهلاوية تستمر .. والظلم والإجحاف بحق الجماهير الأهلاوية مازال موجود ..

والمسؤولين .. متفرجين من بعيد بـ صمت ..!!

أمس .. كان موعد جديد لـ 31 مشجع أهلاوي مع الظلم والإضطهاد من قبل رجال الأمن في الملعب ..!!

ناس إسمهم ( رجال أمن ) .. وللأسف كانوا مصدر القلق والخوف الوحيد يوم أمس ..!!

وكان لي تجربة شخصية من بين الـ 31 مشجع أمس ..!!

بدأت المعاناة بوصولنا للصالة .. وللأسف وصلنا قبل موعد بداية مباراتنا بـ 10 دقايق تقريباً الساعه 6.50 .. واتفاجأنا بأن البوابات ( مغلقة ) من قبل ( رجال الأمن ) والأسباب مجهولة .. أكثر من 1000 مشجع محبوسين خارج أسوار الملعب بدون أي سبب ولا عذر مقنع .. مع العلم إن الدخول مجاناً ومافي أي سبب يمنع دخول المشجعين ..!!
عساكر يشتغلوا على هواهم ويطلبوا ( هويات ) و يشيلوا أي قطعه قماش ماهي متصلة بالبنطلون أو الفلينه بداعي إنها شعار ..!!

وهادي صور يظهر فيها الجماهير المحبوسين بلا وجه حق خارج الملعب :-

http://www.alrage.net/upload/3ashe8-...tures/Jm-1.jpg

http://www.alrage.net/upload/3ashe8-...tures/Jm-2.jpg

http://www.alrage.net/upload/3ashe8-...tures/Jm-3.jpg

وإليكم بعض المشاهد روائياً زي ما عشناها أمس ..

* رجال الأمن يلقوا القبض على طفل عمره 13 سنه بحجة إنه ( قفز من فوق السور ) ..!!
مع العلم إن السور أعلى من الطفل بـ 3 مرات .. وعملية القفز من فوق السور مستحيلة بالنسبة للطفل رياضياً وفيزيائياً ..!!
والأدهى من هذا وذاكـ .. لمن جاء الأخ الأكبر للطفل وحاول يتفاهم مع رجال الأمن .. أخذوه هو وأخوه وحطوهم في الـ ( باص المشؤوم ) ..!!

* رجال عمره 32 سنه بعد عبوره البوابة بسلام .. وصل إلى واحد من العساكر المسؤولين عن التفتيش .. وفجأة أخونا العسكري يطلب ( الهوية ) من المشجع ..!!
الأخ وقف مستغرب من الطلب ... ففي أي مذهب وأي قانون وأي نظام يتم طلب ( بطاقة أحوال ) أثناء الدخول للملعب ..؟
ولمن سأل العسكري عن سبب طلب الهوية .. بكل أسف تجرأ قليل الذوق والتربية و ( صفع ) الرجال اللي أكبر منه بـ 6 ولا 7 سنوات على وجهه وقدام 1000 مشجع محبوسين خارج البوابات ..!!
وأكثر من كده .. بعد صفعة الكف .. أخونا في الله خاف من ردة فعل المشجع .. وقام استنجد بواحد من زملائه لأجل يساعده على توصيله للـ ( باص المشؤوم ) ..!!
المشجع وصل للباص وأزرار الثوب مقطعه نتيجة الشد والسحب اللاأخلاقي من قبل رجال الأمن ..!!

* شاب أهلاوي .. ألقي القبض عليه وتم الزج به في الـ ( باص المشؤوم ) بحجة إنه يحمل شعار على رقبته .. مع العلم والله العظيم إن الشعار ماعليه أي صور أو رسومات .. وكل اللي عليه عبارتين ( فرقة الرعب بالعربي ) و ( Alahli Club بالإنجليزي ) ..!!

* مشجع ثاني وقفوه بسبب ( سيجارة ) يشهد الله ماهي ( باكت ) .. للأسف كانت ( سيجارة وحده ) لقيوها معاه .. والله ما قدرهم يطلبوا منه يتخلص منها ويرميها .. ولغة التفاهم الوحيدة عندهم ( يالله قدامنا على الباص ) ..!!

* أخوكم في الله "عاشق الأهلي" كان واقف في الشارع خارج سور الملعب أساساً وبعيد كل البعد عن البوابة .. وكنت أصوّر الجماهير الأهلاوية اللي خارج الملعب .. وفجأة طلع لي واحد من العساكر الله يعطيه العافيه يقول ( هات الكاميرا ) .. طالعت فيه من فوق لتحت ومافهمت بصراحه وش الغرض من طلبه وانا ساكت .. فجأة يكمل كلامه ويقول ( تصور العساكر هاااه ) اعطيته الكاميرا وقتها وقلت خذ طالع .. اذا لقيت فيها صورتكـ ولا صورة أي عكسري فالكاميرا حلالكـ ..
أخينا في الله ما قال غير ( انا ما أعرف اشغل الكاميرا .. امشي معايا ) .. ووصلني جزاه الله خير إلين الباص ..!!

* ضرب لبعض المشجعين اللي ما عملوا أي حاجة .. مجرد إنهم ( حاولوا يتفاهموا ) مع الضباط كلامياً .. وكانت النتيجة انهم انضربوا وتم سحبهم للباص معانا ..

* مشجع أهلاوي ( الوحيد اللي وصل لداخل الصالة من بيننا ) تم سحبه من وسط الصالة قبل بداية مباراة الأهلي أساساً .. بحجة إنه كان يصوّر المضاربات اللي حصلت في اللقاء اللي قبل لقاء الأهلي ..
والأدهى من هذا .. إن عساكرنا الموقرين ما أخذوا منه الجوال اللي ادعوا انه صور بيه المضاربة .. والجوال تركوه معاه إلين ما تم إطلاق سراحه .. وهذا إن دل على شي يدل على إن كل التهم ( ملفقه ..!!
واللي يفقع القلب أكثر وأكثر إن المباراة كانت منقول ( على الهواء مباشرة ) وكل الصحفيين صوروا المضاربات .. وطلعت على التلفزيون السعودي ..!!

منتهى المهزلة شفناها أمس يشهد الله .. معاملة أسوء من السوء نفسه .. وكل واحد لابس بدله يعتقد إن البشر
ملكـ له وهو حر يتصرف فيهم زي ما يبغا ..

ولو حاولت تجادلهم بالإحسان .. الواحد فيهم حافظ الجواب حفظ يرد عليكـ ويقول ( انا مصرح لي بالضرب ) .. ويقول ( ليش أعطونا العصي الكهربائية إذا ما نستخدمها ) ..؟؟

ماشاء الله عليه الأخ .. عبقري جداً .. على باله عشان أعطوه العصاية الكهربائية لابد إنه يستخدمها في جميع الحالات ومع كل الناس ..

أجل اللي اعطوه ( مسدس ) وش يسوي .. يطلع مسدسه بين الجماهير ويطلق عليهم عيارات نارية عشان المسؤولين أعطوه مسدس ..؟؟

لا حول ولا قوة إلا بالله ..

* عبارات ترددت على مسامعنا كثيراً أثناء إحتجازنا داخل الـ ( باص المشؤوم ) .. واحد من العساكر يقول ( انثبر ولا بأجي أتوطى في بطنكـ ) ..!!
والثاني يناول زميله العسكري عصاية كهربائية ويقول له على واحد من المحتجزين ( خذ العصا وروح اعرج فيه لين يسكت ) ..!!

* احتجزونا في الباص حوالي 3 ساعات .. طبعاً بدون أي نوع من أنواع التكييف ولا شي .. وبعض العساكر يطيب له الهوى ويدخل يدخّن جوا الباص عشان رئيسه ما يشوفه .. وبعدين يطلع ..!!
وخلال الـ 3 ساعات .. كان في واحد من الأخوان مصاب بالسكر الله يشفيه .. طلب من العسكري إنو يسمحوا له يروح لـ ( دورة المياه ) .. وبكل أسف جاه الجواب بالرفض ..
مع العلم إن ( الهوية ) موجودة وكان بإمكانهم يحتفظوا بيها كضمانه .. أو كان بإمكانهم يرسلوا واحد من العساكر كمرافق ولكن للأسف ما حصل ..
وفي الأخير .. اضطر أخونا في الله يقضي حاجته ( وراء الباص ) في المواقف الداخليه للملعب .. مع العلم إن بين الـ ( باص ) و بوابة الدخول للملعب أقل من 15 متر وقتها ..!!

* خلال وقت الحجز .. حاولنا نسأل ونستفسر من الضباط والعساكر الموجودين عن الإجراءات المتبعه واللي راح يطبقوها في حالتنا .. هل بياخذونا لـ ( مركز الشرطة ) أو بيفكونا بعد المباراة مباشرة أو بيكون فيها حجز ..؟؟
وللأسف ما جاتنا إجابتين متطابقة .. كل عسكري يعطي إجابة على كيفه .. والبعض منهم أعطانا إياها على بلاطة وقال والله مدري وش الاجراءات المتبعه ..!!
فهل معقول رجل أمن ما يعرف الإجراء المتبع ولا يدري عن الأنظمة والقوانين ..؟؟

* بعض العساكر أثناء إحتجازنا في الباص كان طفشان .. لدرجة إنه كان ياخذ جوالات بعض الشباب ويتصفح محتوياتها .. وياخذ اللي يعجبه من الرسايل والمحتويات ..!!

* رئيس رابطة الأهلي ( حسن مريع ) وقت خروجه بعد نهاية المباراة .. مر من جنب الـ ( باص ) فبعض الأخوان نادوه بإسمه .. ويوم التفت على الباص اتغيرت ملامح وجهة واستغرب من المنظر .. وللأسف كانت الصدمه أكبر من إنه يستوعب الموقف .. وما كان بيده شي يسويه ..!!

* بعد نهاية المباراة .. وبعد 3 ساعات داخل الباص .. أخذونا إلى ( مركز شرطة الجنوبية ) في وسط ( مشروع الأمير فواز ) .. وحجزونا في غرفة مكتومة بدون تكييف لمدة 45 دقيقه تقريباً .. وبعدها نقلونا إلى غرفه خارج الحوش على الأقل كان فيها سقف مكشوف يدخل شوية هواء ..
وبعد 2 ساعتين ونص تقريباً .. طلعونا من الغرفة لأجل استكمال إجراءات إطلاق سراحنا ..

* من ضمن الإجراءات كان التوقيع على ( تعهد ) فيه إعتراف ظالم بقيامنا بـ ( شغب جماهيري ) مع العلم إن اللي سويناه لا يمت إلى الـ ( شغب ) بأي صلة .. والشغب كله صدر من رجال الأمن وماهو من الجماهير ..!!
والأغرب من كذا إن كلنا وقعّنا على نفس التعهد ونفس الإقرار .. بالرغم من إختلاف الـ ( تهم ) الموجهة لنا ..!!

* وقت دخول "عاشق الأهلي" للضابط المناوب لأجل التوقيع على الإقرار .. طالبته بالكاميراً اللي صادروها .. فسألني ( انت ليش تصور العساكر ) ..؟؟
جاوبته بسؤال ( الكاميراً معاكم .. أخذتوها مني من قبل 6 ساعات .. بالله لقيتوا فيها صورة عسكري واحد ..؟ )
جاوبني نفس إجابة الأخ اللي مسكني في الملعب وقال ( والله ما عرفنا نشغّل الكاميرا ) ..!!
منتهى المهزلة .. الواحد فينا يتوقف 6 ساعات وينحرم من متابعه المباراة .. لأجل عسكري ( اعتقد ) مجرد اعتقاد إني صورته هو وأخويائه أثناء ضرب الجماهير وكان خايف الصور تنتشر ..!!!
والأخوان ما كلّفوا على أنفسهم وطلبوا مني تشغيل الكاميرا في الملعب .. ووصلوني إلين مركز الشرطة .. وفي الاخير طلبوا مني تشغيل الكاميرا واتضح إنو مافيها صورة لأي عسكري ..!!!

* بعد إطلاق سراحنا .. للأسف مركز الشرطة كان في وسط مشروع سكني مغلق ومنعزل .. والوقت كان تقريباً الساعه 12.30 - 1 الليل .. وطبعاً مافي أي ليموزين داخل المنطقة السكنية كونها على أطراف مدينة جدة ..
فالبعض مننا اللي ماعنده أحد قريب من أهله اضطر يطلع مشي على رجوله ويمشي إلين خارج حدود المنطقة السكنية .. ويقطع الـ ( خط السريع ) مشي على رجوله عشان يوصل للخط الـ ( راجع ) ويحصل سيارة تاخذه لسيارته ..
وبعضها اضطر يمشي أكثر من ساعتين على رجوله وفي هذا الوقت في الليل عشان يوصل لسيارته ..!!

* في الاخير .. كل اللي تلقى تهمة الـ ( قفز من فوق السور ) معروف مسبقاً إن التهمة ملفقة لأن الدخول مجانا ومافي أي سبب للجماهير لأجل القفز من فوق السور ..
ويشهد الله إنو كل التهم الثانية ملفقة وملعوبة لعب لأجل تعبئة الـ ( باص المشؤوم ) ..

* وقت تعبئة الـ ( باص ) كان في أكثر من 1000 مشجع باقين خارج الملعب وممنوعين من الدخول بغير وجه حق .. مع إن الصالة كانت فيها مساحه كبيرة والدخول مجاناً .. وبعد ما تم احتجاز الـ 31 شخص فتحوا البوابات ودخلوا كل الجماهير الباقين بدون تفتيش ولا يحزنون .. هذا إن دل على شي يدل على إن كان همهم فقط ( تعبئة الباص ) لا غير ..

* أروع حدث في اليوم كله يوم دخل علينا واحد من العساكر وسألنا ( انتو شفيكم .. ليش عملتو كذا ..؟ ) ..
فحاولنا إقناعه إننا ما سوينا شي وإن كل اللي حصل ظلم وإجحاف .. لكن أخونا في الله ما اقتنع .. وأصر إننا إحنا أساس المشكلة ..
فجأة واحد من نهاية الباص قال ( مجانين مجانين جمهور الأهلي بحبه مجانين ) وصار الباص كله يردد ( مجانين مجانين ) ..
والعساكر صارت ملامحهم مابين ضحكـ واستغراب ..!!

في الأخير .. ما بأقول غير الله لا يسامح اللي كان السبب .. وحسبنا الله عليه ..

وإن شاء الله جماهير الأهلي راح تتواجد في الصالة أكثر وأكثر .. وراح نحضر بالشعارات والكاميرات .. وماراح يوقفنا شوية عساكر

صبراً جميل والله المستعان ..!!

وفي الأخير .. يا جماهير الإمبراطور .. الله يسعدكم ويوفقكم يارب .. بالتأكيد منتو بحاجة أي دعوة للحضور ..

ولكن من بكرة إن شاء الله هالله هالله في الحضور بدري ..

بإذن الله من الساعه 4 نبغا نعبي الصالة .. وياليت اللي ينزل الصالة يمر على شباكـ التذاكر في ملعب القدم وياخذ تذكرة لمباراتنا مع الهلال ..

يصير بكرة من الساعه 4 إلى الساعه 10.30 واحنا ( أهلي × أهلي ) ويوم أخضراني بإذن الله ..

وبإذن واحد أحد نرجع بيوتنا بكرة ومعانا ( بطولة + تأهل للنهائي ) ..

http://www.alrage.net/vb/images/smilies/smile.gif

دمتـــ بود ـــم

منقووووووووووووووووول من منتديات الامبراطور ..