يوم من أيام سعود والبنقالي..

ياخوي خلصنا ،، أوراقنا وكامله ،، والتسديد وسددنا الله يسد نفس العدو ،، حتى العطر تعطرنا ،، وش بقي ؟ .... راصنا من صبح الله علشان فيزه بنقالي مايسوى التاليه من الغنم موظف الاستقدام : ياسعود قل لا إله إلا الله وش أسوي قبلك سرا فيه ناس ماسكين سرا قبل اسبوعين ولا بعد جاهم الدور ،، كلها نص ساعه وأخلصك
صبرت لي 3 ساعات وطلعت معي فيزة البنقالي ونصيت المكتب وشرطت إنه مسلم حافظ القرآن ( يالله يكفينا شره ) وماقد اشتغل في السعوديه يعني أنا أعجنه وأربيه ولو يصير مهوب رجال كان أزين لا فضا عقب العشاء خليناه يودي حريمنا ويجيبهن دام مامنه خوف
تعاقدت مع الموردين ومع الشركات وركبت الثلاجات في البقاله وإلى الفجر وانا أطمس في صور الحريم والبزور على هالعلب ،، وحطيت صورة الملك عبدالله على المدخل ،، وكتبت تحتها كلنا فداء للوطن ،، ورزيت جمبه صورة الأمير سلطان ،، وتحتها نموت ويحيا الوطن ،، ولزقت شعارات السعوديه كلها ،، سيفين ونخله ،، وشعار مائة عام ،، وشعار عشرين سنه ،، والجنادريه وسباق الخيل وصور معالم المملكه قصر المصمك ، وقصر الحكم ، وبرج التلفزيون <( الله من زين المعلم ) والمملكه والفيصليه ، وسليمان العيسى ،، واشتريت دبابات للتوصيل وشرطت على البايع إن صوتها يسمعه سكان المريخ وخياسها يتلطم منه ابليس علشان يحس الحي إن فيه توصيل وتكثر الطلبات وتربح البقاله ...

اسمع وانا عمك يا محمد اسلام ماجبناك من بنقلادش علشان تفسق وتغسل حوشة العالم وتمسح سياراتهم ،، لا جايبينك علشان البقاله أبيك تجلس فيها وتقابلها إلا منه نقص شيء تجيبه ولو دق أحد يبي توصيل تقفل البقاله وتروح توصل له وترجع ،، ومالك إلا طيبة الخاطر أبدسم شاربك ولحيك هاللي تبشر بالخير إن شاء الله بس لو تخففها شوي علشان نميز وجهك وخديداتك جعلي ما أعدمهن ...
وماعندي مانع ندور لك مسجد قريب من البقاله ونخليك تذن به دام نفسك في الآذان ،، لالا ماشاء الله الظاهر إن هالمكتب عرف من يجيب ،، نبي التمره وعطونا النخله الله يعافيهم ...
أنت وش حليلك لكن ماذبحني إلا خياسك تقل لك قرن ماطب جلدك الماء ،، والله إن دخلت البقاله على هالحال إن يخرب كل إلي فيها
،، تدري عن شيء !! ،، كل اسبوع خذ من البقاله شامبو وصابون وكلونيا على حساب البقاله وخذ لك حلاقه وموس بس مهيب غاليه ،، جلدك جلد ضب لو تحلقه بمقشعة روض ماضرك ....

ماشاء الله ماشاء الله ، 500 ريال ربح في أول شهر ،، صدز إنها مهيب واجد ،، لكن مهيب شينه ،، بيض الله وجهك يامحمد اسلام ،، لكن ترى تو حنا في الماء والطين ام خمس ذي ماتوكل عيش هالحين كل شيء غالي حتى البيض الله لايحقرنا ارتفع سعره ،، نبي 5000 ريال ولا تكفي بعد ....
شوف بابا سعود ،، أنا كل يوم موجود بقاله ،، ساعه 6 صباح ،، ساعه 1 ليل ،، روح سوي أذان صلاة بعدين يرجع بقاله ،، 500 ريال مافيه زياده ،، يبغى زياده لازم جيب 2 نفر علشان سوي توصيل ،، أنا مافيه سوي توصيل كل شويه يجي زبون ... بعدين انا مافيه معلوم سوق دباب أنا معلوم سايكل بس ..
قلت وأنا أجغم في علبة ببسي وأقشم حب مصري ،، يامحمد ودي أجيب ظنك ما ودي إلا تقطر تسبدي ياخوي بس وزير هالعمل حاجرنا في ربعه ،، يبي سنه على ما أطلع فيزه ثانيه ويبي لها حب خشوم ومسكة سرى ،، وانا والله مافيني حيل مطارد ،، مايكفي يوم أطارد في جيبتك أنت ووزرك ،،، على طاري الوزره أنا كم مره قلت لك لا تلبس وزره في البقاله ،، لا ومن الدلع رافعن رجليك على الطاوله ،، أنت تبي تحوم تسبود خلق الله ؟ .. إن شفتك لابسن وزره مره ثانيه والله لأسبحك بكلونيا ثم بالولاعه لأرعد فيك ..
نزل رجليه ونزل راسه وقعد يلعب في شعره بعدين سفعه على ورا ورفع راسه ... شوف بابا سعود ،، انت فيه نفر كويس ،، وانا سوي خدمة إنتا ،، فيه أثنين صديق أنا موجود سعوديه مافيه شغل ،، مافيه مشكله شغل توصيل ،، نفر كويس ميه ميه ،،
رشفت جغمه من الببسي وناظرت الصور إلي على الباب http://msa6el.com/vb/images/smilies/KMZH.gif ونويت إني أبسوي هالشيء مهوب خيانه للوطن لكن وش أسوي محدود وأهم شيء النيه ... قلت خلاص توكل على الله يا محمد اسلام ....

حوار محمود الجذلي :
ماشاء الله على عاملك ياسعود،، عز الله انه مامثله ،، مايفوت ولا فرض ،، وققلبه مبتسم ،، سبحان الله تشوف علامات الإيمان في وجهه لا إله إلا الله .. تصدق إني منول أطالب الدوله بوقف الإستقدام من بنقلاديش لكن عقب عاملك ذا تغيرت الأمور ،، فراستي تقول إنه بيكون له شأن في الدين
اقول انثبر بس لا أنشب هالبياله في ضروسك ياوجه البوم ،، أنت بالذات يامحمود لاتحتسي في الفراسه ،، تذكر يوم إنك تشوف شغالة اخوك وش قلت ؟ ،، تراك قلت هذي ماشاء الله عليها فراستي تقول إنها مصليه صايمه ،، وعقب اسبوعين مسكوها في الملحق معها اثنين كل واحد معه كرتون فياجرا ،، اترك ذي ،، ذاك اليوم مقومني من النوم وغاثني الله يغث تسبدك تقول ياسعود فراستي تقول إن السوق يبي ياصل الثلاثين نقطه في اسبوعين ،، اشتر بكل ماوراك ودونك ،، أشوى اني عارفن فراستك ودجتها ولا طاوعتك ،، عقب يومين جلس السوق اسبوعين نسب تحت ،، كل ذولي يهونن ،، تذكر يوم تشوف صورة ابراج التجارة على غلاف مجلة القافله قلت فراستي تقول إنهم بيتوهقون لا جو يهدونها بعد سنين ،، من بكره جتك مجاوبه مابغت ولا ربع ساعه ... ،، تذكر يوم تشوف صورة الملك ..... وإلا خلني ساكت بس
شف ياسعود لايهمك محمود وفراسته ،، لكن اسمع الكلام إللي يجمد على الشارب ،، ترى العماله البنقلاديشيه ينخاف منها ،، تراه لو وصلت لحيته لخنصر رجله لاتامنه ،، شفهم كل يوم ماسكين لهم عصابه بنقاليه ،، وإن كانها عصابه سعوديه تبي تلقى طرف فيها بنقلاديشي ، يعني افطن له وتراني أنا ماش ما أعجبتني هالجمعات إلي عنده فاتح سرك أنت وإلا بقاله ؟
يقولون بعد إنهم ماسكين عصابه منهم توزع الدجاج الفاسد على المطاعم ،، الظاهر ماتفخ كرشك ومقفاك ياسعود إلا فخيذات هالدجاج الله لا يحرمك طعمهن
اقول هها بس أنت وياه الشرهه مهيب عليكم الشرهه على إلي يعطيكم فراسته لابوكم لابو من جمعكم ..................

محمد اسلام الله لايسلم فيك مغز ابره ،، لعنبو دارك بقاله ذي وإلا مكتب ترحيل ،، هالسلق إلي مجتمعين برا وش عندهم وش يبون ؟
قال محمد اسلام وهو يراجع فواتير معه ويقارنها بالدفاتر ... شوف بابا سعود أنا مسؤول داخل بقاله برا أنا مافيه مسؤول ،، هذا كله زبون يجي يشتري ،، كيف يبغى فلوس مافيه زبون ؟ إنتا مافي مخ إنتا ؟
والله وطالت وشمخت يا التراب ( قلتها عقب ماصفقته كف على وجهه من قوه طبع سماره في يدي )
مأليش مأليش بابا سعود انا مافيه معلوم ،،، بس أنا كلام هذا زبون لازم إحترام ،،، خلاص مافيه مشكله ،،، فيه موزوع أنا يبغى كلام إنتا سوا سوا ،،، هذا بقاله هالحين في كبير فيه فلوس كثير 15000 واحد شهر لازم نفر زياده ،، فيه اثنين نفر كويس م ......
قاطعته وأنا متكي على كيسه فش فاش ومعي هولستن فراوله خلاص يامحمد مافيه مشكله جبهم وسكنهم معكم في الشقه إلي فوق البقاله ،، تاخذ عشره موب أربعه ،،
بعدين على فكره فيه أشياء ناقصه البقاله ،، أبيك تجيب كرتونين من فضفاض حق الملابس خبرك هالحين الشحوم زادت ولزقة الثياب مامنها فكه وجب صدور دجاج ساديا أبشرك بنات هاليومين تقرف لاجت تقطع الدجاجه http://msa6el.com/vb/images/smilies/KMZH.gif ،، وجب بطاقات شحن ترى الحب واجد وجب تراب في خيش علشان الواحد إلي غالي عليه الرز يشتري تراب ،،، وفيه فكرة في راسي مدري تضبط وإلا لا ،، ودي نجيب كراتين الحليب ونجمدها همن نفتتها وننشفها علها تطلع بودره ونبيعها بسعر أرخص من هالحليب إلي حول مايصير أغلى من الفضه وشل الفحم تكفى لاتخلي ولا كرتون نبي نقطعه ،، ياخي هالحين البزران يطلعون من سادس ابتدائي يشب الفحم ويزين الشيشه منحب مستاثمين فيهم ،،، وشف نبي نقطع المنتجات الدنماركيه ،، ودي نعلن في الجرايد ترى حنا قطعناها نصره لرسول الله ومدري وش بعد بس أخاف إن نيتي تصير تسويق ولا آخذ أجر تدري عن شيء نبي نسوي زي الناس بس نعلن في الجريده وحنا قاطعين نصهن ومخلين الباقي ،، وبعدين إذا سوينا دفاتر نوزعها على البيوت والشقق مانحط فيها صور المنتجات الدناماركيه
توحي أنت وإلا ماتوحي ؟!!

الله يقلع ذا اللوقي ،، محمد اسلام الله ياخذك أخذ عزيز مقتدر ،، كم مره قلت لك ياثور لاتشتري أشغال من الصيدليه ،، قبلي اقولك لابغيت تشتري شامبو وفازلين وفكس ولزق جروح خذهن من موزع الجمله لكل شركه ،، لاتاخذ من الصيدليه وتبيع بأعلى ،، ترى العالم مهمب دلوخ يبي يخلون الصيدليه إلي جمبك ويشترون منك ،، متحالي خشك أنت وضروسك وإلا وزرك يوم إنك مغير رازن مقفاك ورافعن رجلينك ،، بعدين وش ذا الفاتوره وش أنت شاري من الصيدليه ب 20000 ،، ياخوي لو نجمع مقاضي البقاله كلها ماجت ب 50000 يعني ثلثها من الصيدليه !!
اكترب وتغير وجهه وخذ الفواتير مني ودخل يده في الدرج وطلع 20000 ريال قال بابا شيل ربح هذا شهر أول ،، بعدين هذا صيدليه مافي كله بقاله ،، فيه بقاله في صديق أنا شيل دوا ماما بعدين هو في يعطي أنا فلوس ،، مافي مشكله بابا ....
قعدت أقشم حب وامزمز لي على عليبه ديو ،، وإلا هاك البنقالي إلي جا ووقف شوي همن رقى فوق ،، شوي يوم جا الثاني ورقى ،، عقب نص ساعه نزل الأول ،، ورقى ثالث ،، قالبين هالشقه مزار شريف ،،، شقيت كيسه مسواك المسلم ودعسته في خشتي قلت يامحمد اسلام يالله مداهمه أبشوف الشقه هالحين في التو واللحظه وش زودي عن حملات الملازم المطرفي كن مافي الرياض ملازم إلا هو إلي ماشاء الله عليه بادن على الرياض كلها ،، أنا منيب عجزن أداهم شقتكم ،،، رفع السماعه محمد اسلام وكأنه ماسمعني وكلم شوي بعدين نزلها وراح للثلاجات ،،، تستاهل يالثور لامن حتسيت اسمعني مهوب تمشي وتخليني ( قلتها بعد مانشبت علبة الديو
في صلعته ) يالله قوه للشقه يالله ...
رقينا وأنا أفرك بهالمسواك ،، يوم إني أقبلت على الشقه وإلا ريحة( ن ) غريبه عجيبه ،، ما أدري زفره ،، مدري جيفه ،، مدري شعر محسحس ،، المهم دخلنا وإلا فيه بنقالي ما أعرفه والله لكن الوكاد إن عليه مايستر عورته بس ولاهنا شيء في الشقه قلبت في هالكنبات دخلت الغرف ماهناش ،، أبد وش زين الشقه ،، وأنا ألتفت وإلا محمد اسلام وراعين الدبابات وراي ،، قلت شف أنت وياه ،، أنا أهم شيء عندي هالوطن ،، سوو إلي تبون في البقاله اسرقوني وأتفاهم معكم لكن تسوون شيء يضر بالمملكه ،، لأدفنكم تراكم ماتسوون عندي شيء ،، توحون ؟
هزوا روسهم ونزلنا ،،،

سعود ( قالها محمود ومعه جريدة الرياض ) ،، هها وانا أخوك وش عندك ...
منتب مصدق ،،، شف هالخبر تكفى ...
تعدلت في جلستي مسكت الجريده وإلا مكتوب ،، القبض على وكر دعاره ومخدرات يديره بنقالي بتستر من مواطن سعودي
كتب : مناحي الشيباني
ألقت قوات المهام الخاصه بقياده الملازم أول فهد المطرفي القبض على متاجلره بالمخدرات يديره بنقالي بتستر من مواطن ...
وقد كان البنقالي يستغل البقالي وشقته الواقعه أعلاها في استدراج بني جلدته لكي وقد وجد في الشقه 14 كيلو حشيش ،،
والله لو إني من الدوله لأشب في هالسعودي ،، أجل داري إنه يسوون هذا كله ومخليهم ،، والله لو العلم معي تسان أربط يدينه في شاص ورجلينه في شاص آخر ويدقون ريوس إلين ينفصل جسمه لابو لابو جده بس بيض الله وجه المطرفي عساه على القوه ،، مايتعب ماشاء الله عليه ؟ كان هذا كلامي بعد ماحطيت الجريده وقمت متوجه للبقاله .....

شف ياتعترف ياتخيس في السجن .... قالها الملازم المطرفي وأنا جالس قدامه عقب ماتلوني من عند باب البيت ،،
شف يا سعود ،، ماشاء الله عليك بادن على كلش تداهم وتقبض وتحقق ماعاد بقي إلا تحكم وتعدم http://msa6el.com/vb/images/smilies/biggrin1.gif أنا مالي شغل في هالموضوع كله ،، والله مادريت عن محمد إسلام جعلي أعدمه بيدي ،، أنا يجيني ربح هالبقاله وأشيك عليها كل اسبوع مره ،، وارقى أشوف شقتهم ،، ولاعمري شفت فيها شيء ،، وهالتراب ذا ماشكيت فيه ،، يذن ويصلي ،، ويحفظ كثير من القرآن وعلى قولة أبو سعد الله لايسعده هو وفراسته واضح عليه الإيمان
شف ياسعود أنا مافي يدي حل ولا ربط قضيتك حولنها على المحكمه وفي كل الأحوال أنت متستر دريت وإلا مادريت ،، يبي يحكم عليك الشيخ لكن احتسب والشكوى على الله !!
ارتزيت على الكرسي وطلعت عيوني ،، قلت يالحبيب وش إلي يحكم علي الدعوه فوضى ،، ياخوي أنا مادريت عنهم الله ياخذهم وإلا والله أول من يبلغ عنهم أنا ياخوي ،، وش ذا الكلام الفاضي ،،
والله يا سعود يصير خير ان شاء الله ...

القضيه العاشره ،، المتهم سعود ،، التهم التستر تهريب الخ...،،
ياشيخ والله لاتسترت ولا طرا لي ،، ماله داعي تعدمون مستقبلي ب 50 سنه سجن و100 ألف ريال غرامه وإلا إعدام وأنا مالي ذنب ،،
مس الشيخ بشته وواسى لحيته قال ،، جميع القرائن تدل على إنك تراجع الفواتير وترقى فوق دايم وداري عنهم ،، ولذلك حكمت عليك بسجن اسبوع وغرامه 5000 ريال ...
لا والله !!! بس !!!! هذا وأنا متستر ومخدرات ،،، والله دينكم يسر أجل ياشيخ أنا هالحين لي اسبوع في السجن ،، يعني أدفع الغرامه وأروح للبيت ،،
الشيخ وهو معصب ... إيه ادفعها وانزلع ... وبالنسبه للعماله حكمنا عليهم بالسجن شهر والتسفير و20000 على محمد اسلام ... رفعت الجلسه ..

مايستفاد :
1- لاتامن البنقالي http://msa6el.com/vb/images/smilies/biggrin1.gif
2- لايغرك المظهر http://msa6el.com/vb/images/smilies/biggrin1.gif
5- الله يوفق الملازم المطرفي وربعه ،، بس لو يجيبون أسماء غيره علشان نحس إن الديره فيها ناس يداهمون واجد http://msa6el.com/vb/images/smilies/biggrin1.gif http://msa6el.com/vb/images/smilies/KMZH.gif
5- يالبى قلب مناحي الشيباني في جريده الرياض ،، ماعنده إلا أخبار هالبنقاليه عسى الله يفضحهم
6- لاتقرب البطحاء يوم الجمعه ،، لايغلطون فيك

يعطيكم العافيه والمعذره على الإطاله ....

مع القاااادم أكثر بأذن الله لسعود..

هـع هـع هـع