قبل عشر سنين قابلت فلان دوبه متوظف والحمد الله اموره ميسره ومستوره واليوم قابلته نفس الوضع ماتغير شي بس انه زاد الشنب وسوا له عوارض وبعد عشر سنين اذا الله احيانا يمكن اقابله وبنفس الوضع اتوقع ماراح يتغيرشي بس انه طلع الشيب بدقنه ويمكن معاه سكر يمكن ما معاه الله واعلم
هذا حال مجتمعنا الواحد يكد له سنين والحال على ماهي مافيه تطوير للذات ومافيه نظره مستقبلية وش انا الحين وش انا بعدين
فجأه واحد من اللي قابلتهم على هذا الحال باني له عماره بالعليا قلت له كيف يابو فلان تبني لك عماره وحنا ياهالمجتمع متفقين ان الواحد يموت وما كون له شي تدرون وش قال
قال لي تصدق يابو فلان كان تفكيري مثل تفكيركم لكن دقني واحد من اخوياي جنوبي بكلمه قال لي كم لك بالوظيفه قلت خمس سنين قال منت رجل ان كملت العشر وان ماامنت اعيالك بمسكن ومأوى وراحت الكلمه ويومن جلست الحالي قمت اقلب وش قصده ابو ........ ليه ماحنا ارجال على قولته وقمت احسبها ولا هو صادق المرجله صارت بفلوسك ما هي بفعلك وقمت اتذكر جدانا الله يرحمهم يوم يسولفون لنا عن ايامهم ويقولون اول ( ارجالك وارد الماء والحين تغيرت الامور ماهي مثل اول اريالك وارد الماء )
انا يامحاكيكم يمكن انتقابل بعد عشر سنين بس مشيب ماقصدي تحطيم لكن هذا الواقع اللي نعيشه مع زيادة التكاليف والضيق في الحياة المعيشية الحالية
تحملو هذرلجتي
