كنت اقول

.:: كنت اقول .::

كنت اقول ان الهوى عني بعيد ...

لين شفتك وابتدا ليل السعد ...

صرت اشوف ان الهوى عمر جديد ...

تجتمع فيه القلوب بلا وعد ...

يا الجمال النادر الحر الفريد ...

يحرسك ربي من أسباب الحسد ...

يا الغرام اللي جرى وسط الوريد ...

يا شبيه الروح يا روح الجسد ...

وأنت صرت بخافقي حب وحيد ...

حب لا قبله ولا بعده أحد ...


.:: يعجز الشعر .::


قالوا إنك تحب وقلت ليه السؤال ؟
كل شخص يحب وكل شخص يميل

والهوى ديرة ما بين صد وصال
دوم فيها نزول ودوم فيها رحيل

يا عرب والقلوب أشوفها بألف حال
بين قلب جريح وبين قلب قتيل

والا أنا لو باحب أحب بنت الخيال
نادره ما لها بالناس شبه ومثيل

فاتنة ناعمه فيها هدوء ودلال
حاوية كل زين وكل طبع أصيل

من يعرف الجمال يقول هي الجمال
وصفها في قصيدي يشبه المستحيل

كن في وجهها صبح ضحك لي وقال
يا صباح المحبة من خليل لخليل

وكن في عينها رمش ينادي تعال
واعذابي من الرمش الكسول الكحيل

شعرها ليل أسود فيه صمت وجدال
إن تحرك يضيع الصبح بأطراف ليل

إن تناثر جديله من يمين وشمال
ضمني في بياض الصدر تحت الجديل

والشفايف مثل جمر يزيد اشتعال
ودي أضم جمره لين أشب الفتيل

إن مشت كنها غصن مع الريح مال
هزه الشوق من فوق خصر نحيل

كن فيها رسوخ علمته الجبال
وكن فيها شموخ علمته النخيل

تجمع الكل فيها من جمال الخصال
بنت قلب رشيد وبنت عقل ثقيل

كامله والله اللي يستحق الكمال
صورة كل ما فيها فريد وجميل

يعجز الشعر عنها حتى لو في الخيال
كنه يقول يا ناصر ترى مستحيل


.:: خل العتب .::


خل العتب واسمع لروح تناديك
وان ماسمعت اقرى في عيني اشتياقي

لا تحسب ان اللي يحبك ويغليك
ينساك لو عيا الوصل والتلاقي

قلبي رغم بعد المسافه يناديك
من وين ماصديت لك طيف باقي

وعيوني تسأل من كثر ماهي تبغيك
لي حد متى بطول هذا الفراقي

هيهات انا انساك او انسى طاريك
حد ينسى مثلك انت محبوب راقي

حتى اذا فكرت او قلت اخليك
علمني مثلك انت من وين الاقي