الأعراس في في سوريا وبالتحديد الشام " دمشق
اكتر الزواجات عادة زواجات تقليدية محافظة وليس كما يعتقد كثيرين , غالبا الحكي بيكون بين النسوان على التلفون واذا كان في قبول بتجي الأم مع حدا من بناتها او اقاربها , وان صار في قبول بيجي العريس بالزيارة المقبلة وبيشوف العروس طبعا بحضور والدها او اخوها , في حال ربنا تمم على خير يبدا التحضير للخطوبة الرسمية , يتم الاتفاق بالبداية بين الرجال في زيارة بيسموها " فصل النقد " عن المتقدم والمتأخر وهيك امور , وبيعطي العروس مبلغ بيسموه " ملبوس البدن " مشان الجهاز .. بعض الأسر تعلن الخطوبة مجرد اعلان وبالتالي مابيقدر العريس يجي يشوف عروسته بدون حجاب او لحالها , بعض الأسر بتعمل " كتاب شيخ " يعني عقد غير مسجل بالمحكمة بتصير البنت زوجته شرعا وبيقدر يجي يشوفها لحاله ..
بعد ايام عادة بييروح العريس والعروس وامه وامها حتى يشتروا المحابس " خواتم الزواج " , وبتصير كما العادة في كل مكان فترة الخطوبة العزايم والمشاوير والطلعات وبدا تأثيث بيت الزوجية .
بالنسبة لحفلة الخطوبة فيتولى اقامتها اهل العروس , البعض بيحبوا يعملوها باليت والبعض بالصالات , بتكون حفلة بسيطة مافيها تكلف زيادة بيجتمعوا فيها اقارب وصديقات العروس و اهل العريس من النساء وبيصير فيها هيصة ورقص وفرفشة , وطبعا الزلاغيط الشامية المعروفة :
اووووووها ع الهشي الهشي
اوووووها وطبخنا المحشي
اوووووووها عروستنا حلوة
اوووووووها بيلبقلا كل شي
لوووووووووووووووووووليش
اوووووووووووها صلو عالنبي
اوووووووووووها وزيدو صلاتو
اوووووووووووها ويلي مابيصلي عليه
اوووووووووووها تطء مرارته
لوووووووووووووووووووليش
وبآخر الحفلة بيجي العريس شوي وبيلبسوا الخواتم قدام الحاضرين ..
اجينا للعرس , الاغلبية العظمى بتعمل الاعراس منفصلة يعني النسوان لحال والرجال لحال , في عادات حلوة كتير خاصة بالتحضير لهذا اليوم سواء للعريس او العروس ,, بالنسبة للعريس بيحلق وبترتب و اهم شي حمام العرس من قديم كانوا يروحوا على حمام السوق وفي ناس لسه محافظة على العادة , وبنسمع انه كتير بيصير ضحك ومزح بحمام الرجال و الكل يشارك و بيدعكوه العريس لما ينهري , وبعدين في شغلة بيسموها " التلبيسة " هون اصدقاء العريس مع والده او حدا من اعمامه , وفي عادة تتمثل في انهم بيفرغوا عليه قارورة عطر بالداية وبيفتحوا الملابس بعد البسملة وبيجهزوه لليلة العمر .
وبيعملوا مولد تحكى فيه السيرة النوبة الشريفة وتنشد الاناشيد الدينية , وضروري بيوزعوا " الملبس " على الحضور (اللي طبعا كلهن رجال ) حتى يصير موعد العرس بالصالة .
اجينا للعروس ,,
قبل العرس , في ناس بتحدد نهار بيروحوا فيه مع العروس على بيتها الجديد مشان يساعدوها بتعليق تيابها غالبا قبل يوم او يومين من العرس , اما نهار العرس فتحضيرات العروس العصرية وحدة بكل مكان , يعني المكياج والشعر والفستان الأبيض وكل هالقصص , وبالوقت المحدد بيجي العريس لبيت العروس مع السيارة المزينة والسيارات المرافقة وفرقة العراضة اللي رح احكي عنها بعد شوي . بيجيب العروس وبيوديها على الصالة وبيروح مابيفوت معها هلأ (العرس طبعا مسؤولية اهل العريس عكس الخطوبة ) , بيستقبولها البنات بالزلاغيط والأغاني وبتروح بتقعد على " الاسكي " يعني الكوشة وقبل ماتقعد بتروح بتسلم على امها وحماتها , بيكمل العرس عادي , في اعراس عادية اغاني و DJ طبعا بس بنات , واعراس تانية دينية مافيها اغاني لكن بيكون فيها فرقة انشاد مع الدفوف فقط ..
ايضا بعض الاعراس بحسب القدرة بيعملوا بوفيه , وفي اسر بتكتفي بضيافة البوظة العربي بالفستق ( مشهورة فيها الشام ) او كاسيتا وطبعا عصيرات وبيتفور , وهيك ضيافة تعتبر كافية وما حدا بيقدر يقول انهم قصروا , لأن من احلى العادات بالاعراس عنا بشكل عام انه مافيها تكلف واسراف والحمد لله .
بعض الأعراس الخاصة بالطبقات البسيطة ( البلدي وعفوا على التعبير ) بيخلوا العروس تدخل تبدل فساتين من جهازها , لكنها عادة قليلة وبدأت بالنحسار وبصراحة انا مابلاقي الها طعمة ومو حلوة
بعد حوالي ثلاث ساعات بيعطوا خبر عن وصول العريس , البنات بيتغطوا , وبتكون خارج الصالة شغالة العراضة , العراضة ياسادة ياكرام احلى واشهر شغلة بالعرس الشامي , هي عبارة عن فرقة من الرجال بيرددوا كلمات معينة وبيدقوا على الطبول وبيصير في استعراض بالسيف والترس , بيحملوا العريس على الأكتاف والدور والباقي على اصدقاء العريس يحموا العراضة ويشعللوها بالحماس والتصفيق والهيصة . طبعا لا داعي لذكر ان البنات بيكونوا واقفين ورا الأبواب عم يتلصصوا ويتفرجوا على العراضة وعن جد عن جد فرجة بتجنن
صلــــــــوا
على محمد
مكحول العين
نير وغضير
والعادينا وهيييييييه
أول مانبدا منقول
صلوا على طه الرسول
أول ما بدينا
على النبي صلينا
يا صلاتك يا محمد
والصلاة بالصوت صلوا
ياصلاتك يامحمد
والصلاة صلوا عليه
وعلينا وعليه
وعلى من زار قبره
وعلى من حج إليه
حجيت الحجاج لاجله
انشق القمر بنص الليل
من هيبة رسول الله
لا إله إلا الله
محمد رسول الله
شنكليلة شنكليلة
الله يعينه على هـ الليلة
من هالليلة صار له عيلة
الى آخر من هنالك من العراضات ..
بهاد الوقت بتروح العروس لباب الصالة استعدادا لاستقبال العريس اللي بيدخل بمرافقة والده و اخواته الشباب واخوان العروس وابوها بعد فترة ( من العادات الغريبة ان البنات بيوصوا العروس بالسر انها تدعس على رجل العريس اول ماتشوفه حتى تصير بالمستقبل كلمتها ماشية عليه )
اول مايشوف العروس بيرفع عن وجهها الطرحة وبيسلم عليها وبيتوجهوا على الاسكي , بيلبسها الدهب و بيبدلوا مكان الخواتم من الايد اليمين الى اليسار , وببيسلموا على الناس وبيرقصوا عادي وبيرقصوا slow , وبعدين بيقطعوا الكيك وبيتصوروا وبيكون العرس بدا يخلص , متوسطيا بتخلص الاعراس حوالي الساعة 12 او 1 , وفي اعراس بتضل للاربعة الفجر تقريبا ..
بنهاية العريس بيطلعوا العرسان بالسيارة المزينة ووراهم سيارات الاصدقاء والاقارب وطبعا التزمير شغال بيوصلوهم على الأوتيل او على البيت , ان كانوا رايحين على البيت من العادات القديمة انه مستحب بيدخلوا معهن على البيت اول شي مصحف وسجادة صلاة ويحطوا اعند الباب نبات اخضر ( باعتبار النبات رمز الخصب والحياة ) .
تاني يوم الصبح في ( الصباحية ) والتحية المعروفة فيها ( صباحية مباركة )بيجوا امهات العروسين بيزوروهن وبيباركوا الزواج ..
بعد الزواج بفترة قصيرة ام العروس بتعمل " مباركة " للعروس , وكمان بيجوا بنات العائلة والصديقات بيعملوا بالبيت حفلة صغيرة ..
وبيعيشوا بتبات ونبات وبيخلفوا صبيان وبنات ..
والى اللقاء في الجزء الثالث من هذة العادات ..ولكم تحيات/ ماجد البلوي
