للمرجله مسرى الذيابه.للشاعر مقبل سليم البلوي

تسوقنا الأقدار ونسوق الأقدام=يوم(ن) لنا يحسب ويوم(ن) علينا
للخلف ما ننظر والأرزاق قدام=وللمرجله مسرى الذيابه سرينا
على يقين بقسمة الله والأحكام=مقسومنا الطيب تحوشه يدينا
أحرار ما عشنا على الأرض خدام =نسوقها غرب وشمال ويمينا
إما ننال من الفخر تاج و وسام=ولا على أنفسنا زعلنا و رضينا
ما نعيش بالدنيا وساويس و اوهام =وما نعيب الايام والعيب فينا
ضعف الإراده من مفاتيح الإسقام=يفتح علينا أبواب للطامعينا
لا والذي شرف رسوله بالإسلام=ما تنحني هاماتنا لو فنينا
نبني قصور المجد ما نبني خيام=وندرى القدم عن زلته لا مشينا
نخاف بالزلات نشفع للأخصام=وأرداهم اللي في خطانا يهجينا
قولوا لهم عن كثرة الحكي صيام=لا صار ما به لازمه ما حكينا
بعض الحكي كنه صواريخ قسام=لا محرر(ن) دوله ولا له يقينا
أحوالنا دايم على خير ما يرام=لا يفرحون أصحابنا الشامتينا
وليا رموها صوبنا أقراب وأعمام=ما كن حنا عن خطاهم درينا
العفو عند المقدره طبع الاكرام=فيه الصلاح ومنهج الصالحين