هزّ قلبي ولملم جروحي هدايــا
لا يطيب الجرح دامه في يديـنك
كل جرحن بي سكن ظلمه زوايا
خايف (ن) تلمس خفوقه في يمينك
مـايبي يرتـاح لو يبقى بقايـا
خلّـه بكيفه عسى الله لايـهينك
خلّـه ينزف وردّه يمّ المنـايـا
وازرع بدربه زَهـرَكْ ويـاسمينك
شوف عيني ( نطع ) وبيدينك مدايا؟
وش بقا للموت شمّر ساعدينك
نطع..... وريحـه موت..... ودمـوع البرايا
وصوت قيدي اتعبك ايقض حنينك
لاتحّن ارجوك .. يبسّت الشفايا
صـدّ عـني لاتنـاظرنـي بعينـك
واطعن بيمناك لاتخـاف القضايا
في حلالك من على فعلك يدينك ؟؟
الجروح اللي من يدينك عطايـا
اه يـامغـلا عطايـاك لضنينـك
اه يـايمناك سوّت بـي سوايـا
كل مـاقفّت زهمها الجرح وينك ؟؟
والطعون اللي انحنت عندك عرايا
في كفنهـا استرهـا يرحم والدينك
وقلبي اللي ذاب من بين الحنايـا
اقسمه نصفين ما( بينك ) و ( بينك)
مدّ لي يمنـاك خـذ مني الوصايا
لايطيب الجرح دامـه في يدينـك
