وإذا يعنى تضايقنا..؟
بنغيّر شى؟
وإذا مات الزهر ف اجمل حدايقنا
بنغيّر شى؟
وإذا ب هدومنا ضقنا
بنغيّر شى؟
كثير نمر بعض احيان بـ ضيقة بال
زعل صاحب
شتيمة شخص مايعرفك
عتب قاريء
ونزعل حيل نتضايق
وإذا يعنى تضايقنا...!
http://www.photographyblog.com/image...%20Sunrise.jpg
وإذا يعنى تضايقنا
هي الضيقة تكون الحل!!
إذا كانت شموس الوقت تحرقنا
هي الضيقه بتكون الظل!!
إذا غابوا جميع الناس وتفارقنا
هي الضيقة بتكون الخِل!!
http://www.friendsoflight.com/pp/data/507/Moon14.JPG
وإذا يعنى تضايقنا..!!
وكثير من التعب ذقنا
وسهرنا الليل
بيجى صبح ويفرقنا
ونبكى سيل ..لين الدمع يغرقنا
ولابه شخص فالدنيا بليا هم
أحد ضايق
بسبب فاتورة الجوال
أحد ضايق
عشر سنين متزوج وربك مارزقه عيال
أحد ضايق
لأن البيت به صجه وزحام أطفال
أحد ضايق
من السكّر
أحد ضايق
لأنه نايم مبكّر
أحد ضايق
لأنه حبها بـ خبال
هموم أكثر من اللازم وتخنقنا
سؤال الحال..!!
وإذا يعنى تضايقنا..؟!
وإذا يعنى تضايقنا..!
من اللاشيء
إلى اللاشيء
على اللاشيء
تخانقنا
وندخل فى نوايا الناس
أظن فلان يقصدني
أظن السيدة فلانه تسب الآنسه فلانه عشان العانسه فلانة
أظن الناس هنا بالحيل تكرهني
أظن السيدة فلانه تعالج من مرض نفسي
أظن فلان غبي ويشابه الكرسي
أظن فلان لها يكتب شعر حتى تغنى به
أظن البنت بنت شيوخ
أظن البنت لعّابه
أظن البنت كذابه
أظن البنت حطت (ورد) وسط(الرد) سبب من شان نتعرّف
ترانا ناس فينا كذب
وغبى منهو يصدقنا
وإذا يعنى تضايقنا..!!
http://rafee9.jeeran.com/files/148386.JPG
وإذا يعنى تضايقنا..!
إذا راحوا
وخلّونا
نسوا كل الكلام العذب
وبكّونا
وعرفنا بـ يوم بأن كل الحكاية كذب
ملّونا
وإذا خيّم علينا الليل
ماأشرقنا
وإذا ضقنا
وصار الحرف حبال في مشانقنا
بعد هذا
وإذا يعنى تضايقنا..!
http://gallery.dll3.com/data/media/4...of_the_Sea.jpg
وإذا يعنى تضايقنا..!!
إذا هذا الزمن لبّسك ثياب فيوم مو قدّك
بتحط إيدك على خدّك
وتبكي حيل
إذا هذا البحر ضيّق ولايقدر على مدّك
بتحط إيدك على خدّك
وتبكي حيل
إذا كل الجمر هذا عجز يصنع عطر ندّك
بتحط إيدك على خدك
وتبكي حيل
إذا خدك طبع حزنه على يدك وعرّقنا
أقول لك شيء
وإذا يعنى تضايقنا..!!
وإذا يعنى تضايقنا..!
وطفينا دروب النور
وعتّمنا المدن والدور
ويتّمنا شجر وزهور
وكتّمنا رقيق شعور
وشتّمنا علو السور
عشان أشياء هي الأتفه من الأتفه من الأشياء
رجل خاين
" ماهى دوم الرجال تخون..!"
وماهو باين
وجود عيون
خيانة بنت
" ماهى كل البنات تخون..!"
لكن إنت
ترفرف من تنادي لك" حبيبى العاشق المجنون"
وبعد هذا
وإذا يعنى تضايقنا..!!
وإذا يعنى تضايقنا..!
ومشوا عنّا كثير اصحاب
وتفارقنا
وشققنا الورق للريح
بعض فرقا
تكون الحل قبل مانطيح
بعض فرقا
كثير أكرم من التجريح
بعض فرقا
تجى جيّة دعا وتسبيح
كثير أصحاب فارقنا ونسيناهم
كأن كانت علاقتنا علاقة وقت
مصالح وانتهت
يمكن
قرابة دم أو جيران
يمكن
تشابه هم
وإذا يعنى تضايقنا..!!
وإذا يعنى تضايقنا..!
وطيّرنا فراش النوم
ومسحنا كل ألوانه
وإذا سيطر على جوّك حزن ووجوم
وبديت تفسر الأشياء على كيفك
زعلت ... لـ غِيَبة فلانة
وبنت كنت تعرفها قبل مدة وتفارقتوا وجتك تقول:
ولهانه
وبنت كل ماتحاول تصارحها بـ أحبك حيل
تستأذن:
بروح آنام نعسانه
وبنت تعشق الدافي من الهرج
وتمرّك حيل بردانه
كثير أشياء غلط حولك
وجوه الناس
تعبانه
قلق مدرى.. طفش مدرى.. تعب مدرى ..ترف مدرى
مدرى الناس زهقانه
كثير أشياء
تزهقنا
وإذا يعنى تضايقنا..!
وإذا يعني تضايقنا!!
بتصنع هذي الضيقة علاقة حب مابين الحطب والفاس
وإذا يعني زعلنا بيوم
لأمرٍ ما
وطار نعاس
وإذا فينا خنقنا أنفاس
وحلّقنا
يتغيّر شي إذا يعني تضايقنا؟؟
وإذا يعني تضايقنا!!
ماهو حتى المطر يهجر حديقتنا
وتنبت فينا ضيقتنا
وتغرقنا سيول الملح
ولابه شخص فالدنيا تهمه ضحكتك غيرك
لذا إضحك
ولاترمي بذور الشر في خيرك
لذا إضحك
كثير أشياء من الأجمل تحاول دوم تسرقنا
لذا إضحك
وقول بحب: وإذا يعني تضايقنا!!
http://i115.photobucket.com/albums/n...love_cloud.jpg
وإذا يعني تضايقنا
بهدوء أكثر...!!
وإذا يعني تضايقتي
وجمعتي كل هـ العتمة ولا أشرقتي
وقلتي في قرف مُزمِن :
أحس الوقت مو وقتي!!
وإحس إني تعبت أكثر من الأكثر من همومي
وقولي لطيحتك: قومي!!
وقولي لكل هذي الأرض:
بآعلّي.. وإنطري غيومي!!
تعبتي كثير تلومي النفس
ويخنقك البكا ساعات...!!
ولا واحد بحزنك حس
بدفا العبرات..
وإذا يلمح أحد تقصير كذا من غير مانقصد
هنا تنصب مشانقنا
بعد هذا
وإذا يعني.. تضايقنا؟؟
وإذا يعني.. تضايقنا؟؟
من ألحان بريدي
