من له ولد مامات لو حطو عليه النصايب = هذا الكلام اللي عقب موته يقولونه
وقول انا يمكن ويمكن ماهو بصايب = مار الصحيح مامات اللي بخيرٍ يذكرونه
واكبر دليل ان الولد لو طلع خايب = مات ومعه ميت بالحيا اللي يعزونه
والولد من عقب ابوه ما يستحق الندايب = الا ليا صار عن شوفه يذكرونه
واللي يموت وزوله عن الناس غايب = ذكره المحمود يبقى يوم يطرونه
وذكره الطيب خفف علينا المصايب = ميت وكثيرٍ من الناس بالذكر يحييونه
ماهو لجل انه ترك له ولد نايب = السبب فعل يمناه وبه طيبٍ يعرفونه
احدٍ يموت وكنه كما الملح ذايب = حتى لو ان له عيالٍ اسمه يشيلونه
واحدٍ يموت وكنه كما هل السحايب = يبقى لها خير لو هي مقفياتٍ مزونه
يابوي ماضنتي مثلك ينجبن النجايب = حتى لو ان وليدهم على اسمك يسمونه
كلٍ يبي بالتمني رقي الهضايب = وصعبٍ على اللي ما مشا ممشاك يرقونه
درب المراجل دونها نشبات وصعايب = واشهد انه نال المراجل فوق اللي تعدونه
والمدح فيه مايجي بكذب ونهايب = لا والله قليلٍ فيه المدح تعطونه
يابوي فيكم نعزي قريبين وغرايب = جانا على موته غريبينن يعزونه
صغير السن جانا وجانا معه شايب = نشوف الحزن بعيونهم دوب يبكونه
يابوي فيكم نعزي مال وركايب = لا والله الا نعزي طير تسقونه
ياراعي الجود كم مره للعون جايب = عرسٍ يقوم وطيب القعدان تهدونه
وكم مره بالمال ماتعد الحسايب = في قريب وبعيد من المساكين تعطونه
وكم مره بالقيلات بليت الرقايب = معونن به الماء لدواب والطير تملونه
وكم مره بالطلعات حلوات الطرايب = مسجدٍ للرحمن من الاحجار تبنونه
هذا الذي واضح وماكان غايب = علمه عند الله وياكثر الذي تخفونه
يابوي فيكم نعزي صغير اللعايب = ورعٍ صغيرولاجيتم قمتم تلاعبونه
وفيكم نعزي عيال عم ونسايب = يا واصل الارحام وكبير السن تودونه
وفيكم نعزي بيت يملوه القرايب = واليوم احس انهم عقب موتك يعافونه
والله ماعليهم لوم ولا فيها عجايب = لا سرت انا عايف البيت وركونه
والله يالولا امي اني للبيت سايب = ويحرم علي وعلى عيالي انهم يدخلونه
الله يطول بعمرها ولا يجيها نشايب = ويعيني على برها وحبها بالقلب اصونه
والله مدامني حي وعضامي صلايب = لخفض لها جناح الذل وافرش اردونه
واجعل لها كل اللي تريده وهايب = النفس والولد والمال كلها فدى عيونه
منها عرفت انا الصبر وقت الكرايب = مؤمنه بالله ومايصيب المرء ميقونه
مرحوم يامن هلو عليه الترايب = وعيوني تشوفهم يوم انهم يدفنونه
حاولت اصبر النفس وثريها كذايب = ونيت ونه في صميم القلب مكنونه
قالوا تصبر والموت حق وسبايب = قلت ماني معارض لحكمة اللي تعبدونه
امنت بالله سبحانه رب الربايب = سبحانه اللي بيده كل الارواح مقرونه
يا عين لا تهلين الدمع يكفيكِ سكايب = ويا قلب خل الحزن والدعاء له كثرونه
والله لو البكاء يعيد روح الحبايب = يا كثر ناسٍ بالبكاء ودهم يعيدونه
مالوم فيه النساء باكيات ونحايب = حتى الرجل لو يبكي بالله لا تلومونه
هذا عزيز القوم فكاك النشايب = اليا حضر اخلافهم بالحال ينهونه
هذا عزيز القوم يالعقول اللبايب = اليا اختلف رايين عنده الحل يلقونه
هذا عزيز القوم وافعاله صوايب = كلها خيرٍ بخير وله ربعن يقدرونه
يابوي والله جروحنا فيكم عطايب = ويبطي عليها الوقت والنفس محزونه
اضحك ووناتٍ بوسط قلبي تنايب = ونه تروح وتجي وونات مسنونه
الموت حق وصبرنا فيكم غصايب = غصبٍ علينا الصبر هو من وين المعونه
والله لو الموت تدفع فيه الضرايب = لنقض روحه وخلي روحي عنه مرهونه
الموت والله اني من الموت هايب = وكذاب اللي يقول ان الحياه مضمونه
البارحه وانت بيننا ما تشكي طبايب = واليوم وين انت يالله عساكم ترحمونه
والشوق ترى بالقلب نارٍ لهايب = وتنطفي نارها بلحظة انهم يشوفونه
مار البلا شوقٍ على شوف غايب = ومستحيلٍ على العين شوف اللي يحبونه
يالله عسانا نلقاه بجنات الرحايب = واشوفه شوفهٍ مابها موت مغبونه
يالله يامن لغيره مانوجه طلايب = تسكنه فسيح الجنات من غير ما تعذبونه
وتجعل على قبره من منشيات السحايب = مكفراتٍ له الذنب من قبل ماتحاسبونه
يالله مثل ماهو بالدنيا عزيز الجنايب = تجعله بالاخره من عزيزٍ تقربونه
وبالله عليكم يا سامعين الكتايب = ادعو له الرحمن له الفردوس مسكونه
ونصيحتي لك يامن ابوه عايش وطايب = قبل لا يموت دخيل الله تبرونه
قبل لا تجي ساعه الموت والسهم صايب = عقبها والله خيره غير تفقدونه
ويا محمد انت ابونا وعنه اليوم نايب = ماودي اوصيك وفيك العرف مخزونه
ابشر لك بخوانٍ ينطحون الهبايب = لهبت عليه الريح بالوجه يذرونه
تامر وتنهى ولا تشوف فينا معايب = واللي تقوله والله اخوانك غير يقولونه
يا شبيهه بالقول والفعل وايض المهايب = في شوفتك يا ابو احمد حيٍ يشوفونه
واقول مامات من حطو عليه النصايب = لا صار مثلك يا محمد اللي يعزونه
واليوم ماباقي الا ندعي رب الوهايب = ربٍ كريم ولا يخيب رجا اللي ترجونه
يالله انا ارجاك يوم نشر الكتايب = تجعله من اللي كتابهم باليمين يقرونه
وتجعله يالله جارٍ لنبي والصحايب = وقصرٍ له بعالي الجنات يارب تبنونه
وتجعل عياله من عقب موته حبايب = وفيهم الناس بطيب الذكر يثنونه
وصلاة ربي اعداد ماهبت هبايب = على النبي اعداد حجاجٍ يطوفونه
بيتٍ يجو له من جميع القطايب = واعداد اجساد بها ارواح واجساد مدفونه
