ياقبر فيك اللي على ابـوي سميـت (سعد الحويماني)

ياقبر انـا لاجيـت يمـك تمنيـت=اني بداله تحـت الاحجـار مدفـون
ودي يكون الحي عمري وانا الميت=لو الثمـن كـل المخاليـق يفنـون
ياقبر فيك اللي على ابـوي سميـت=دايم وانا مع قرة العيـن مشطـون
ياقبرلو تدري بعـد ويـش كنيـت=لتقول ليت الموت ماكـان مسنـون
ياقبـر والله عنـه مايـوم سجيـت=اسمع صدى صوته وانا منه محزون
كم مرةٍ باسمه على اخـوه ناديـت=والناس من حولي يقولون مجنـون
اذكره حتى يوم فالفـرض صليـت=والناس باسمه لا بغونـي ينـادون
ماتدري انه كان لي شمعـة البيـت=وانه يساوي الكون والكون والكون
واني اشوفه كل ما اصبحت وامسيت=قدام عينـي خطوتـه دوم بالهـون
ماانساه لو اني دلهـت و تناسيـت=ودنياي عقبه يا مـلا مالهـا لـون
وقت العزاء لوي تظاهرت واخفيـت=حزني عن اللي في فقيدي يعـزون
لكن تراني من كثر صبري ازريـت=وعقب العزاء بيحت انا كل مكنـون
الله مـن ليـلٍ بتالـيـه ونـيـت=ونة كريمٍ داخـل السجـن مديـون
والله مـن ضلـعٍ بعاليـه عديـت=ودموع عيني فـوق خـدي يهلـون
انا اشهد اني عقـب فرقـاه وليـت=والحال عقبه صار من دون في دون
ياقبر انابانشـدك بالحـزن حسيـت=في قلب والد صار بالهـم مطعـون
هذا شعـوري يـوم يمـك تعنيـت=والله يفرج هم قلـبٍ بـه شجـون
مرحوم ياللي طلته كنهـا( الليـت)=اعداد ناسن فالحرم جـو يصلـوون
ومرحوم ياللي فالمرض حيل عانيت=اعداد مايبغض هل القدس شـارون
وانا اطلب الله يوم للمقبـره جيـت=الصبروالسلـوان والثالـث العـون
ماغيره احدن في حياتـي ترجيـت=ورضيت بامر اللي له الكاف والنون