لاوآهنيك ياتبوووك ( جديد )

كل فراق يهون , إلا فراق الأم الحنون ..
إلى أمي العزيزة التي إستبدلت ينبع بتبوك
فهنيئاً لتبوك , على أمل اللقاء بأمي في أقرب وقت .

ألقت عصاها وإستقر بها النوى بعد الرحيل = روح ٍ على فرقى الحبايب ضامها طول النوى
تعبت مطايا الشوق والرحلة تسير بلا دليل = لا قلت هانت قال مكتوب الولي مالك لوا
ياحادي الركبان دوب نحط بالحمل ونشيل = والأمر لله والله أعلم بالضمير وما حوا
ياملّ قلب ٍ تاه بين الهم والدرب الطويل = الهم يذبح والطريق إن زان عجّـل وإلتوى
والديرة اللي يوم أناظر في نواحيها وأخيل = أضحت خلى مخلي تقل في صحصح ٍ ذيبه عوى
الأم ثم الأم ثم الأم عن قول ٍ وقيل = قاله رسول الله محمد والصحابي له روى
صعب الموادع لونه موادع خليل مع خليل = وأشلون وأنا أودع أمي وأكثر القش إنطوى
وداعة الله يا أم عبدالله تحت عين الجليل = يحفظك رب العالمين اللي على العرش إستوى
وداعة الله يا أم عبدالله عليك الله وكيل = رحتي وزارتني جروحي وأنتي من أول دوا
إي والله إن موادع أمي فيه حزن وهد حيل = وإلا يازيني صامد وفي لحظه تخور القوى
يا أم السعد يالطاهرة ياربة الخلق النبيل = غبتي و غابت شمسنا اللي في مشارقها ضوا
ياللي عطيتينا كثير ولا عطينا إلا قليل = يجزاك ربي خير كل ماهبّ نسناس الهوا
الدار بعدك موحشه والعين مبصرها كليل = والقلب من دم ولحم لازادت النار إستوى
كن إجتماع الشمل بعيون المتيم حلم ليل = وأصبح عليه الصبح ماجت له على شف وهوى
ًٌٍََُِْ( لا وآهنيك يا تبوك ) بمن عليك أمسى نزيل = وأنا على ينبع أكاد أموت من فرط الجوى
وين أنت يالعزم القوى وين أنت يالصبر الجميل = فراق الأم العذبة وباق العرب ماهو سوا
الله يصبرنا على المكتوب والحمل الثقيل = ويصبّر اللي مثلنا في نار الأشواق إنكوى
وألقت عصاها وإستقر بها النوى بعد الرحيل = ياليتها ماألقت عصاها ولا إستقر بها النوى

أخوكم : عبدالله بن محمود المعيقلي
.

الأم ثـم الأم ثـم الأم عـن قــول ٍ وقـيـل

قاله رسول الله محمـد والصحابـي لـه روى

شاعرنا الكبير عبدالله المعيقلي
ماآقول الا الله يرزقك رضاه
وصح لسانك

عبدالله المعيقلي . .


أينما تسكب حروفك تخضر صفحاتنا


لله درك يا عبدالله


أطيب المُــنــى ،،

صح لسانك ياأبو لمار
.
ولسآن حالي من لسآن حالكـ
.
ألف شكر على هذا الحضور
.

أبو بدر .. وفقك الله .. ورزقك رضاه ..أشكرلك مرورك .. بارك الله فيك.

سلماااااااان العرادي :
الله لا يهينك يالغالي ...... مرورك شرف للقصيده ولكاتبها
بارك الله فيك ..... وزادك من فضله وإحسانه.