ياشار ياضلـــع طويلـــــة ملاويك = اتعبتني ياشــار بكثر الطلـــوعي
ياشار مرقاب الحــــرار المشاويك = لاهيفت شمس العصر للخضـوعـي
يازين مرقابك على الحد باديـــــــك = وموج البحر ياشار هيج ضلوعـي
ياشار هو أرقبك غيـــــري يناجيـك = وإلا أنت ياشـار سرك مايشــوعي
لاصرت أنا ياشار وحدي مخاويــك = ون الحبيب اللي حسين الطبوعي
رفعت أنا صوتي من الوجد راجيك = وودي جسد خلــــي منك يثــــوعي
رجع علي الصوت حاير يراعيـك = وأظلم علي الليل وحالي جزوعــي
وسمعت أنا ياشار ذيب يعاويـــــك = يقنب قنيب اللي همومه تلوعــــي
أبا أنشدك ياشــــار وش به يناديك = هو جايــع وإلا وليفه قطـوعــــــي
ياذيب لاتشكي عليه وأنا أبكيــــــك = ياذيب أنا مثلك حبيبــي نزوعــــي
عهدي بهم ياذيب من قبل مااجيـك = قبل سنة ياذيـــــب آخر ودوعـــــي
ياذيب لو شفته من الهم يسقيــــك = تبقى عليل الحــال دايم وجوعــــي
خطر علي ياذيب أمشي وأخاويـك = وأنسى حياة المجد وأنسى ربوعي
أم اللحم بيــدي وحلفت مااذيك = ياذيب أنا مثلك حيـــاتي تروعـــــي
