ديـوان الأســطورة ( مـتـعـب الـتــركــي ) ..!

( 12 )

طاب السهر

يوم طاب السهر عيت تطيـب النفـوس=جت من الله وانا كـم كنـت محتاجهـا
كنها مـن حلاهـا كـل ليلـه عـروس=خايفه مـن عيـون النـاس واحراجهـا
حي هالطول يا زول ٍ عسـاه محـروس=مـن عبـث لوعـة الايـام وازعاجهـا
تزعل نفوس ولا تمتلـي غيـض روس=من يقـرب لهـا وضلوعـي سياجهـا
لي متى وانت يا شوق القلوب محبـوس=طالـت السالفـه وابطيـت بعلاجـهـا
جعل قلب ٍ على نـار الغيـاب محمـوس=يحتـرق بيـن صاليـهـا ووهاجـهـا
من خبر له غلا بين الضلوع مغـروس=غرسةٍ كل ابـو شعـري مـن انتاجهـا
لا تقرب لك الفرقـا هذيـك الهجـوس=من متـى والبحـور تفـارق امواجهـا
لازم اصبر على وجه الزمان العبوس ..=لين سـود الليالـي يضحـك احجاجهـا
من بغى يقطع الفرجه يعـاف الجلـوس=ليـن ياصـل نهايتـهـا ومخراجـهـا
كان شعري قصر ما طال شمس الشموس=تستريـح القصايـد داخـل ادراجـهـا

( 13 )

بعض السوالف

ليـه وطيـت عـن خيـل السـروج=ليه مديـت عقـب القـراح الهمـاج
لا تجمل لي الغلطات والعـوج عـوج=يضحك احجاج او ينعقد لـي حجـاج
اصبر اشوي وش علمك تهوج وتموج=ميت القلب مثلك ما يعـرف الهيـاج
ما تعودت أجامـل معتليـن البـروج=الزم العلم قبل يصير هرجـك سمـاج
المشاعر تجي مثل المعاصيـر هـوج=وأنت مالك على هوج الرياح احتجاج
جيت وقلوب حسادي تميـل وتـروج=لا صفى جوهم ساعه قفـاه العجـاح
ابتسم لك وهمي فـوج يقفـاه فـوج=من يحبك لزوم يصير مثلـك هجـاج
بس قلي وانا غلطان لـك ومحجـوج=وين يلقون لجروح النواعس عـلاج
القمر غاب وانت اطفيت نور السروج=قلت يكفيك نور الوجه الاصبح سراج
كن بين الضلوع العوج صفقات مـوج=يوم فاض الغلا والشوق والقلب هـاج
ضيقة الصدر لو بين المحاني تلـوج=كل ضيقة لها عنـد الكريـم انفـراج
ماهو الغيض سبت كل ابو هالهـروج=بس مالي على بعض السوالف مـزاج

( 14 )

قبل أسافر

قبل اسافر وتنسى جيت اسلـم عليـك=جيت ابي عمري اللي من يديني غـدى
ضاعت اجمل سنيني من عمايل يديـك=اكذب ان قلت راحت لاجل عينك فـدى
فرصة العمر قالوا لا غدت مـا تجيـك=جتني اكثر فرص عمري وضاعت سدى
جرب الخوف مره حـس بـه يعتليـك=وارفع الصوت ماتسمع لصوتك صـدى
تدري اللي ذبحني قولتـك مـا ابيـك=ما بقالـي لثـاري لـو بغيتـه مـدى
ما هقيـت المشاعـر كلهـا ترتجيـك=قل لها بالمفـارق منهـو اللـي بـدى
هاك دمعـة عيـون ٍ باكيـه تشتكيـك=هاك ريح ضمير ٍ ما استـراح وهـدى
ما تناظر عيونـي زول هـذي وذيـك=ما يهز المسامـع اسـم ريـم وهـدى
قلت ما عاد لي رغبة وشوفـات فيـك=قلت يا نفس طيبـي يفرحـون العـدى
قلت عايف ونفسـي بالخفـا تشتهيـك=عزة النفس تدري طيب ما هـي ردى
خل عينك تهـل دموعهـا وش عليـك=انت خدك ورود ودمـع عينـك نـدى

( 15 )

ياســعــود

يا سعود لا تنشد ترى مانـي مجيـب=خل الذي خافي لـه شهـور.. خافـي
إن شفتني مغتاظ.. لي حق و مصيـب=يا سعـود مزعلنـي جديـد اكتشافـي
الغالي اللي كـان مـن قلبـي قريـب=بيني و بينه.. صـار مثـل التجافـي
إن قلـت زلـه.. مثلنـا زلتـه عيـب=من قال لك شمس الضحى مـا تشافـي
إن قلت هقوه.. يمكن تصيب و تخيـب=كم لي سنه .. ما شفت فيـه اختلافـي
و إن صار في نفسه بعض شكة و ريب=حتى البحر ما هو على طـول صافـي
صرنا من الصده .. سوات المصاويب=كلن نقـل جرحـه و قـال: امتعافـي
أصعب فراق.. فراق عكف الأشانيـب=مـا هـو مفـارق لابسـات الغدافـي
و الذيب لا منه عوى.. جاوبـه ذيـب=و العلم حامض.. بس وين الأشافـي؟
دامه لقى لـه غيـر قلبـي معازيـب=الله يسمـح درب هــاك السنـافـي
يروح.. لا يرجي رسـول و مكاتيـب=هو خابر إنـي.. مـا اتلفـت خلافـي
واللي تعلـى فـوق روس المراقيـب=أكيـد مـا تسقـى عليـه السـوافـي
رح بشر اللي _شال شلفـا_ تريحيـب=قلـه: تـراهـا كلبـوهـا عـوافـي
اليوم نفسي طابـت.. و باكـر يطيـب=جرحي.. لو انه مـن يديـن المشافـي
خلصت.. و الدنيا دروس و تجاريـب=سجل يـا بـو عبدالعزيـز اعترافـي

( 16 )

وسيع البال

يا وسيع البـال .. ضيقـت الصـدور=رحت ما علمتني وين أنـت سـاري؟
في غيابك.. مـا لخلـق الله حضـور=وفي حضورك.. ما لهم بالبال طـاري
ليـه مـا تختـال يـا بـدر البـدور=و القصايد لك وصيفـات و جـواري
لـك بنـات الفكـر ربـات الخـدور=.يكشفن الثامهن.. و الجـرح عـاري
جعل قلـب مـا مـلاه الصـدق نـور=عند وجه الريح.. ما يلقـى مـزاري
التغاضـي عجـز لا طـال القصـور=ليه أداري؟.. و انت عني منت داري؟؟
الزمـان قصيـر .. والدنيـا تــدور=كل يوم يضيـق فـي عينـي مـداري
صاحبي محتاج لـك شعـر و شعـور=و إحتياجي شي.. ما كـان إختيـاري
من متى و الغصـن يختـار الطيـور=من متى و البـال يختـار الطـواري؟
لا تسمي صمتـي البـارح .. غـرور=إنكساري خلف هالصمـت امتـواري
في غياب الشمس وش ذنب الزهـور=و المطر لا شح وش ذنب الصحاري؟
اللقـا لحظـات و الغيـبـه شـهـور=تقصر الخطوات و يطـول انتظـاري
لو قريـت المنكتـب بيـن السطـور=ما كتبـت لغلطـة العمـر اعتـذاري
صمت هالمينا.. مثل صمـت القبـور=ما رسى مركب.. ولا لاحت صـواري

( 17 )

من زمان

كل حاجه طعمها مـر فـي هـذا الزمـان=هـم هـالدنيـا و حنٌـا نعيـش لهمهـا
المكان اللي عرفنـاه مـا عـاد المكـان=و القلوب.. أحـداث الأيـام زادت غمهـا
صاحبي حتى أنت ما عاد تستاهـل حنـان=أنت بعثـرت المشاويـر و انـت تلمهـا
البكا في مثل هالحال نـوع مـن الهـوان=و المهونـه كـل رجـال حـر يذمـهـا
صاحبي.. لو كان للناس و الدنيـا أمـان=ما تمـوت ورود الأحـلام قبـل نشمهـا
خل عنك علوم الأحبـاب .. واللـي كـان=انتهت..وسيـرة الأشـواق مانـي يمهـا
كلما تظما لياليـك قمـت اكتـب عشـان=.تنزف جروحي و الأيـام تشـرب دمهـا
الكلام الموحش يخـاف نـور الشمعـدان=تحتـرق أسمـى معانيـه قبـل يضمهـا
من زمان أكتب على شان تقرا.. من زمان=بس ما شفـت المكاتيـب جابـت همهـا