للصبر حد ويقتل الصبر لطال=ياويل قلب(ن) جاوز الصبر حده
أرخيت دمعي فوق الأوجان همَال=على حبيب(ن) يقتل القلب بعده
قفى جنوب وخافقي معه رحال=ياويل قلبي ياهلي من يرده
معاه فكري لأخر العمر شغال=أبيع كل الكون من أجل وده
من أجل عينه أدفع الروح والمال=عمري أطشه وأنحره فوق خده
العقل من حبه تقل صابه خبال=القلب من وده غدى الوقت ضده
ياللي بعيني كنكِ برق واخيال=عودي لتبوك اللي لها عنك مده
لا تجرحين اللي به الجرح قتَال=يكفي شبابه ضيعه فوق خده
مرت ثمان سنين بالفكر رحال=ياللي خذيت القلب وشلون رده
ماقدر على فرقاك في كل الأحوال=حبك جبل بالقلب وشلون هده
له جنت(ن) في داخل القلب وظلال=العمر مدًلي وصل كف يده
له ضحكت(ن) يضحك لها تل ورمال=حتى البحر من ضحكته زاد مده
أحبكِ حب(ن) تعانقه الِـ جْبال=وأدري أنا قلبي على الموت وده
عليه دمعي لأصبح الصبح شلال=الفكر عنده.. ليتني كنت عنده
والليل لأقبل يطرق الفكر موال=وش هي حياته ياعرب وين مده
لأربطك قلبي في سلاسل مع اِغْلال=ولا ينزلك مخلوق والله بعده
أخر قصيدي حُطِمت كل الأمال=راحوا بحيبي .. والقدر من يرده
