( سمعت عنها و أعجبتني )
هاكم هالقصيدة اللي يسمونها أم الوصايا ويقالها بعد أنها الشيخة والشيخ عند عنزة 3 قصايد قصيدة الشيخ مشعان بن هذال وقصيدة الشاعر محمد المقحم النجدي الصقري العنزي وهذه القصيده الثالثه للشاعر محمد الدسم الدوامي السبيعي العنزي يقولها يوصي اخوه أبو زعزوع :
يا خوي لك عندي وصاة مصيبـــــــــــــــه=خذلك وصاة تلمس العقل وتصيـــــــــــــب
ترى وصاة أخوك مابه معيبــــــــــــــــــــه=لا صار أخوك مكمل العقل ومنيــــــــــــــب
أخاف اموت ولا ضلال تجيبــــــــــــــــــــه=توزي لضيقات الدروب الضنابيــــــــــــــب
حيث الليالي ما تعلم بغيبـــــــــــــــــــــــــه=ولا يعلم الا صاحب العلم والغيـــــــــــــــب
ودي تحرص عن بلاد كل ويبـــــــــــــــــه=ويصير بك عرف وكمال وتأديـــــــــــــــب
والا المقدر صار ما ينحكيبـــــــــــــــــــــه=ولا ينمحي هذا من الله مكاتيـــــــــــــــــب
افهم وصاتي كان قلبك يصيبــــــــــــــــــه=تطلعك من كل الامور الحراديــــــــــــــــب
أول وصاتي بالفروض الاديبــــــــــــــــــه=صوم وصلاة وعدهم بالمواجيــــــــــــــب
وثاني وصاتي للامور الصعيبـــــــــــــــــه=أحرص عليها قبل هون وتصعيـــــــــــــب
جر عبيله ما يكلف طبيبـــــــــــــــــــــــــه=ولا شي الا ماضيا له تجاريـــــــــــــــــــب
وثالث وصاتي تلعة ينعدى بـــــــــــــــــــه=تلقى عليها بينات المساريــــــــــــــــــــــب
واللي عداية ذيب من بطن ذيبــــــــــــــــه=ولا واحد عدى بها غبر هو ذيـــــــــــــــب
ترى هذاك العرف من غير ريبــــــــــــــــه=راعيه لايطلب ولا له مطاليــــــــــــــــــــب
ورابع وصاتي كثرة الهرج خيبــــــــــــــه=هرج بلا معناه مسموج ويخيــــــــــــــــب
لاصار ما عندك علوم غريبــــــــــــــــــــه=بين الرجال ترتب الهرج ترتيـــــــــــــــــب
وخامس وصاتي خفة الرجل عيبــــــــــــه=من راكض الفرقان يركض له العيــــــــــب
لا صار ما تنحر لزوم تجيبــــــــــــــــــــــه=تنحر غرضك ان كان ماجاك وتجيــــــــــب
وساسد وصاتي لك معزة وهيبـــــــــــــــه=عليك بسفن البر حرش العراقيـــــــــــــــب
ولا يعجبك الزبد هو والرويبـــــــــــــــــــه=ترغب لحوش الضان وتخلي النيــــــــــــب
راعي الغنم يشيب من قبل شيبــــــــــــــــه=والبل معزه تجلي الهم والشيـــــــــــــــــب
الى أشهلب الوقت لو هو حليبـــــــــــــــــه=يوصلك لديار الهناء والتعاجيـــــــــــــــــب
وسابع وصاتي كان صابتك سيبــــــــــــــه=تقدر على كثر الثمن والمطاليـــــــــــــــــب
بنت الحمولة والاصيل العريبـــــــــــــــــــه=اللي قناهن ذاق لذة وترغيـــــــــــــــــــــب
واللي قنا بنت الردى والهليبــــــــــــــــــــه=أصبح بهم وجنب الربح تجنيــــــــــــــــــب
والعجز يرث لك مذله وخيبــــــــــــــــــــــه=اردى الرجال اللي يذمونه السيـــــــــــــــب
عليك بالسقمة ولو هي تعيبـــــــــــــــــــــه =ما دام بك حيل تنط المراقيــــــــــــــــــــــب
ترى كثير المال كلن حبيبـــــــــــــــــــــــــه=ويقال له فت جاي لو مافعل طيـــــــــــــــب
والا قليل المال شنا أرويبــــــــــــــــــــــــه=لو كان طيب يكثرن به عذاريــــــــــــــــــب
وثامن وصاتي شرها ينحري بــــــــــــــــه=ترى الدروب الفاسدة ما بها طيــــــــــــــب
درب الزنا والعايزة والقريبـــــــــــــــــــــه=أحذر هذيلن من كبار العذاريــــــــــــــــــب
ثنتين من داخى عليهم احكي بــــــــــــــــه=مداخي على وجهه تعيبه معاييــــــــــــــب
مداخي على عرضه مثل شق جيبـــــــــــه=علم يبين من أذان الاعاريــــــــــــــــــــــب
وتاسع وصاتي عن مناقر شريبــــــــــــــه=الى صار ماهو من وساع المشاريـــــــــب
خله ويلقى بالموارد لعيبــــــــــــــــــــــــه=عند الظوامي يكثرون الواعيـــــــــــــــــب
ومن دور العيلات غربل نصيبــــــــــــــــه=أحسب حسابه من حساب المذاهيــــــــــب
ومن جنّب الشيطان حقه غديبــــــــــــــــه =ومن هاب طبات الملاعب ما هيـــــــــــــب
عن واحد يبلاك أو تبتلي بـــــــــــــــــــــه=ينهج حديكم يم دار الاجانيــــــــــــــــــــب
وعاشر وصاتي الى صارت مصيبــــــــه=وبلاك ربك وابتلوك المغاضيـــــــــــــــــب
أحذر تمضي ما تسمى غليبــــــــــــــــــه=امض وتبين عن الحاق المشاعيـــــــــــب
وازبن على حصن الرجال الصليبــــــــــه=عدك بعيطا عن سموم اللواهيــــــــــــــب
ومن غيرها عندي وصايا عجيبــــــــــــه=لافكر الفاهم يصيب المتاريـــــــــــــــــــب
والكل منهن يوم تفطن صعيبــــــــــــــــه=والكل منهن يلحقنك مشاعيـــــــــــــــــب
الضيف ضيف الله وصابه حبيبـــــــــــــه=استقبل ضيفك في تهل ٍ وترحيــــــــــــب
قلط له الميسور وماهان جيبــــــــــــــــه=واحلف على الماجود دين المعازيــــــــب
وخويك اللي بالخلا تبتلي بـــــــــــــــــــه=خيال والا فوق عوج المصاليـــــــــــــب
أو راجلا حفيان ماله نجيبــــــــــــــــــــه=أو عورة يبلي بها عالم الغيــــــــــــــــب
اصبر وراعي الصبر محمود طيبـــــــــه=عند الذي يبي الفخر والمراتيــــــــــــــب
وقصيرك اللي مايصيبك يصيبــــــــــــــه=وصابه الله لا تحسف به الطيــــــــــــــب
حقه عليك تزود القدر هيبــــــــــــــــــــه=الى مايروح بزود حشمة وتوجيـــــــــب
وراعي الجدى حق الردى مايصيبــــــــه=ومن لاعرض جنبه على الطعن ما صيب
الشيوخ والحكام زمل منيبـــــــــــــــــــه=فيهم عمار وقضي لازم وتخـــــــــــريب
ما ينومن من شأن منهم حليبـــــــــــــــه=عقب الصداقة ينقلب كنه الذيــــــــــــــب
أهل خفايا وغيبهم ما دري بــــــــــــــــه=يتحدرجون بدون عذر وتذنيـــــــــــــــب
عشرانهم هل العلوم العجيبــــــــــــــــــه=وصدقانهم مروين حد المغاليــــــــــــــب
الى صار ما حدا الثلاثة تجيبــــــــــــــــه=مالك بهم والدرب شرق وتغريــــــــــــب
خوريهم ما يشتهي نفض جيبــــــــــــــه=حكاي وجهين يقص العراقيــــــــــــــــب
هذي يودها وهاذي يجيبــــــــــــــــــــــه=وهاذي يسويها بصدق ٍ وتكذيــــــــــــب
واللي حكي بين الصحيب وصحيبـــــــــه=مخرب ويخرب بين ناس ٍ اصاحيـــــــــب
وسوالفه دايم نميمة وغيبـــــــــــــــــــه=ولا يستحي من كلمة الكذب والعيــــــــب
راعي النقيلي لا توارد قليبـــــــــــــــــــه=اموارده ما يبهج القلب ويثيــــــــــــــــب
هذاك لاتنزل جوانب شعيبــــــــــــــــــــه =بالك تحطه يابو زعزوع بالجيـــــــــــــب
