السلام عليكم ورحمة الله وبركاته
كل عام وأنتم بخيـــــــــــــــــــــر
ومن العايدين الفايزين وعساكم من عواده
الحمد لله الذي بحمده تتم النعم وبتوفيق من الله تيسر لي ولجدتي حج هالسنه والله يكتبها
وييسرها لكل مسلم ومسلمه .
والأن بأسرد لكم قصتي مع جدتي في رحلة الحج :
هذا يا طويلين العمر رحت لحدا هالمكاتب اللي دعايتها ماليه الشوارع وعند الاشارات
تلقى كل هندي معه ربطه يوزعها وقابلني واحدن لابسن له ثوب وكاسر هالعقال
قلت له : مساك الله بالخير قال: كلو نفر خير أش مشكله ؟ طلع هالغبر هندي وين السعوده
اللي رجونا بها المهم خذاني من يدي وقام يشرح لي خدمات الحمله تكيف مركزي وشيوخ
يفتون علينا ووجبات بوفيه مفتوح وفنادق فايف ستارز وبأسعار رمزيه ومن هالكلام قام يبربر
علي ألين عبا راسي وأقتنعت وحجزت واخذت الأيصال وركضه لجدتي أبشرها
يوم جيت وهي مغير هالصرر من أيمنها وأيسرها وش هذا يا جده ؟
قالت : هذي عزبتنا هديمات ما من شي صريرة رز وصريرة سكر وشوية طحين
ومطيرفة سمن ومويعينات طسيل وبريريد شاي وبكيرج قهوه وقشوع حزا وبعيثران
وجعده وشيح ومريره عن الروايح
قلت : والله يا جده لو انا بدو أمحيلين ما أخذتي هذا كله
قالت : يا وليدي حنا حجتنا الأوله اللي زمن الدبا ( الجراد ) أخذنا زهابنا ملي الفراد
حمل ثلاث بعارين ولا كفتنا والله يا وليدي أخرتها أكَلنا غير من الصمغ والبله والحماظ واللهق
ولحم الحجل والعرافي والشنانير >>>> الله يرحمنا شكلها حجتهم قبل توحيدالمملكه
قلت : يا جده هالحين كل شي تغير والناس بخير ونعمه والمسافه صارت قريبه
قالت : واهمي والله ما خليت هديماتي لو تطق راسك بالبطين
وجا يوم السفر وكان يوم الجمعه العصر وكان وداع ابو هيثم حارا لأمه وتوصيه على
غنمها ... علفوها.... الغنم لا تمرح مقاوى .
ومشى بنا الباص وكلن أخذ مكانه الا انا وجدتي قمنا نتناقر مين اللي يجلس جمب الشباك
الين أخذت تلوح لي بأن لا زواج ولا واسطات مع ابو هيثم فطنقرت براسي وأذعنت للأمر
ويوم أقبلنا على تيماء قامت توصف لي الارض قالت يا وليدي ترى هاذي جريدا يا
عمِرا عام الاول وحنا امحيلين لشملي مريناها وما مرحنا غير عند خبراء ابن فرحان ورا
العسافيه وانا مغير فاتحن فمي ما ادري وش تقول ونمت ولا صحاني غير صوت الهجيني
يا محلا نزلــــــــــــــــــة العــــــــــــــــــــــربااان ...... بالنقرا اللي ورا تيما
النقـــــــــــــره اللي بها الحيــــــــران ..... اللي بها ترزم اسحـــــيما
ألين حويـــــــــــــــــه على شقــــران .... أحـــــسن من أركــــــــــوب مكسيما
وأصعك لها يا جده حجي وخلي عنكي الهجيني
قالت : واكوبتي حتى الهجيني عندكم عيب يا خويا القشل الينكم ما تونسون عساكم مانتم
العوض ببو هيثم واخوياه اللي من يوم مشينا الى ما رجعنا وحنا زغاريت وحداء
قلت : والله يا جده ما هي حجه هذي زفة زواج
وهي تزعل وتدق اللثمه وتنام المهم وصلنا المدينه وأحرمنا وسلمت الجده لأحدى هالحريم
وقلت لهن أذهننها زين أرعنها غير أتغدي ان ما احترصتن عليها
وفي يوم عرفه والكل يلبي ويدعي وبعد الصلاه رحت أشوف جدتي وش أخبارها
يوم جيتها قالت : والله يا وليدي أنا أحس كتمه من كثر الناس ودي أتوديني براس
هالبطين هذاااك وتشر لها على جبل بحدود عرفه قلت لها يا اللا مشينا
ويوم جينا براس البطين قالت : يا عمِرا يا العشب واحلالاه يا طروم والربيد وزرعه
ونواره وكلبي بيوض ( اسامي معزاها ونعاجها ) يا وليدي ما تدق على ابو هيثم
يرسل لي غنمي ودي بعد الحج أعزب بهالديار
قلت لها : يصير خـــــــــير
وجا يوم النحر وقالت غير أخاويك للمجزره وأشوف ضحيتي حاولت أقنعها تجلس منا منا
عيت المهم رحنا وشافت ضحيتها وقالت : يا الله عسى أجرها وثوابها عني وعن أمي وأبوي
وعييلي وبنياتي وكل من له حقن عليناما خلت احد ويوم بحرَت ولنها معبيه كيس لحم هذا ليه يا جده
قالت لنا ولجيرانا .
قلت يا جده الدوله تكفلت بتوزيع الضحايا على المحتاجين
وثالث العيد اللي منها ودنا نرمي ونغادر ونروح الحرم قشت الجده عفشها معها
أحاول يا جده وش هاا للهلوم اللي انتي منتقلته خليه عنا بالباص
قالت : أقول خل عنك الفقايض ( الهرج اللي ماله داعي ) ما اني مخليتن هدومي وراي
يا فرقى عين ابوي هذا اللي بقى
أ خذت عفشها ومشينا وسط هالزحمه وكل ما دقها أحد من الحجاج قالت : ول دقك الجرين اللي
يدقك هذا علامه متولجني قلت لها : يا جده مهو متولجكي هذا فوج فلبيني وانت اتحسبنيه
غير واحد
وبهالكلام أعثرت الجده ودوبي أنشلها وأطلعها من الزحمه وهي مغير متقرعطه بهدومها الغبر
اللي مسويه بهن زحمه ومضايقه العالم
يا ترى حتى متى يبقى الأفتراش وحمل الأمتعه ديدن بعض الحجاج سؤال لا نريد أجابه
عليه سوى بالفعل من الحجاج ومن الجده على وجه الخصوص
الحمله كانت دعايتها أكبر من أمكانياتها وهذا أسلوب بعض الحملات يا ليت ما تعطى
التراخيص الا لمن يكون قادر على اداء هذه الخدمه على الوجه المطلوب
أخوكم أوسكار الهرفي
