يا رفــــيق الســـــــــــــهـــــــــــــــر
يارفيق السهر
_____
!
روح الليـل وبـروق المخايـل تنـوض =كل مـا نـاض بـرقٍ نـاض بـرقٍ وراه
يا رفيق السهر جب للسفر جيب حـوض =من تايوتـا يوسـع خاطـر اللـي شـراه
من حفيزه ما وقَف بالحـراج معـروض =باقـيٍ فـي غبـاره مثـل لـون القطـاة
ان مشى كنه الشيهـان عنـد النهـوض =منتهض مـن طويـل الحيـد وده عشـاه
وان مسك له خميلة راح وصوته يجوض =ويتـردد فـي جبـالٍ طويـلـه صــداه
وان غشى ودايٍ خضخاض وسطه يخوض =ينحـدر مـع حـدوره ويتصـعـد نـبـاه
والكفر محكم التصميـم ضـد القـروض =أن مشى مع زباره وان مشى مـع صفـاة
وقفـه يارفيقـي بيـن طـعـسٍ وروض=خايـعٍ يبـري النفـس العليلـة هــواه
مغتشيتـه سحابـه نقعهـا بالـغـروض =والنجوم السـواري ترتعـش وسـط مـاه
يانعـاتٍ زهـوره مقبـلـة بالـبـروض=وان غشاها نسيـم الليـل مالـت معـاه
في يمينه حموض وفي يسـاره حمـوض=والنفـل والبختـري والخزامـا شــذاه
وشب نارك وقنـن حمستـك بالنجـوض=واحكـر الهيـل والـبـراد زود حــلاه
وانس كل الهموم وصل خمس الفـروض=واطلب الله دوام البسـط عقـب الصـلاة
يارفيقـي تـرى الدنيـا ارزاق وّحظـوض=حكمـةٍ مـن ولـيٍ معتلـي فـي سمـاه
غامضة بالوضوح وواضحـة بالغمـوض=تصبـح بوجـهٍ وتمسـي بوجـهٍ سـواه
فاتنة خادعـة قشـرا نقـوضٍ غيـوض=تبتسـم بسمـةٍ صفـرا بلعـس الشفـاة
واعرف ان يوم باكر بامسنا مـا يعـوض=كـل يـومٍ يـروُح مـن رصيـد الحيـاة
لكن انس الهموم وصل خمس الفـروض=واطلب العفو والغفـران عقـب الصـلاة
رد: يا رفــــيق الســـــــــــــهـــــــــــــــر
زيدان الهرفي
وقصيده تستحق البقاء والإحتفاء
دمت بكل خير
محبتي لك
.
رد: يا رفــــيق الســـــــــــــهـــــــــــــــر
السلام عليكم ورحمة الله وبركاته
شكراً شكراً جزيلاً للاخوان الذين رفعوها لهذا العدد من الصفحات كي يتسنَّى لي لمحها والقراءة
من اجمل وأعذب واحكم واجزل ماقرأت بدون مجاملة يا أبو علي
صفحة ذهبيَّة سكبت عليها أجود الشعر
إستمتعت جداً بالقراءة
صح لسانك وطيَّب الله فالك
وتقبَّل حضوري المتأخِّر
تحيَّاتي
وترفع مرَّة اخرى
لنتشرَّف بها في المقدِّمة
