ما أدراك مالطارق
ياقو صبري صبرت وطالت المدّه=إلى متى سالفة صبري وقوتها
الحظ يعطي قفى والياس له لدّه=منها تشيل الحنايا فوق طاقتها
لا الطير حايم ولا هوه ناوي الهدّه=ولاهي غريبه على الدنيا ولعبتها
ياقلب لاتستحي بعض الحكي بدّه=للروح ثارات فيما لاع مهجتها
عزًّاه يا ذالعزيز اللي نضب عِدّه=يضمي ولا يرجي الغيمه وقطرها
مادار للدار عندي صدّه بردّه=خطوه تجيها وخطوه ماتعدتها
الباب دارت عليه أقفال مسودّه=ولي من ورا الباب نبته حي منبتها
يقهر بسدّه ويقهر حاجباً سدّه=وش ضرّهم لو يمين الشوق حاشتها
يالباب أنا اللي تمنى من ثمر جَدّه=في روضةٍ تجري العِفّه بتربتها
ماأدراك مالطارق وماأدراك عن ودّه=والزهره اللي ملت عينه مودتها
لو عاقني صمت فيني قلب لابدّه=ينطق ويدرا بساتينك وزهرتها
العين بالعين والهجمات مرتدّه= والراس بالراس والعبره نهايتها
الأوله جت قوافيها على الشدّه=والثانيه تجبر الأولى بشدتها
إن كان قصدك تذل الشوق وتحدّه=القلب مايرخص الزهره وطلتها
حرام لو ما لقاها ماغسل يدّه=يرحل وهو حالفٍ يحفظ محبتها
وكانك تبي ترسم الدمعه على خدّه=تعمي عيونه ولاتفرح بدمعتها
الشاعر:عبدالله بن محمود البلوي
