السلام عليكم ورحمة الله وبركاته
يسعدني ان اهدي لكم هذه القصيدة
والتي من ضمنها البيت الذي يظهر في توقيعي
___________________
!
!
يارجـل سجـي بالمرابيـع سجـي= خوذي بهن بالطول مدهل و منهـاج
سجي بروضٍ والنـدى بـه ينجـي= مسقيه بـرقٍ بـاول الوقـت لعـاج
ثالث شهـر والغيـث فوقـه يكجـي=وسيله تزاما مع جهاريـه ثـم راج
وزام وتحدر مـع شعيبـه يوجـي= ماكنه الا النيل مـع شـط سوهـاج
فيه الزهر غـب المطـر يرتهجـي= احمر من الياقوت وابيض من العاج
وعطر الخزاما والنفل بـه يعجـي=وان هبت النسمة صفق مثل الامواج
والـى رقيـت النـازح المبرهجـي= رجمٍ على كـل المراقيـب منبـاج
والورق حسـه فـي جنوبـه يلجـي=ويشرف على روضٍ تقل فرش ديباج
ارخي انظار العين مع كـل فجـي= حتى يهيض من الحشا كـل مـالاج
روابـعٍ مـع بـاب قلبـي تهجـي=ويفتح لهـن قلبـي ثمانيـن مـزلاج
تقفـي وتقبـل بالضميـر وتخجـي= بين الحنايـا كنهـا شعلـة سـراج
دنياك هذي مبلشـة يـا بـن حجـي=تعطي زباد بكـف وبكـف كربـاج
وحروفهـا مـا تنقـري بالتهـجـي= وان عاكست ما فادها طب وعـلاج
ايـام فيهـا امطـار وايـام عجـي=وايـام بيـن وبيـن مافيهـن انتـاج
احدٍ ضحك واحدٍ دموعـه تزجـي= واحدٍ رقد واحـدٍ رقـاده تغمـلاج
واحـدٍ زمانـه مقفـيٍ مستهـجـي= واحدٍ زمانه مقبلٍ ضاحـك حجـاج
دنيا جبـال الارض منهـا ترجـي= عندك خبرهـا نشفـت بيـر هـداج
يـا شينهـا يـوم انهـا تستلـجـي= لولا ولي العرش يفـزع بالافـراج
والله من اصحاب المصالـح ينجـي=اهل النفـاق معاونـة كـل هـراج
اهـل الكـلام السامـج المسمئجـي=سـود النوايـا والخفايـا والامهـاج
جنبتـهـم ياعـلـهـم للـمـدجـي=ماني رفيق اهل النمايـم والاحـراج
مـادام انـا لله صومـي وحـجـي= مالي ومال الخلـق عـدلٍ ومنعـاج
