قمة البرقا
عديت برقا طويلة حلوة المرقا"=" قلت اتفضا مادام الهم ناسيني
وقمت اتذكر وانا في قمة البرقا"=" عصرٍ تقافت سنينه وينه وويني
وقام يتصافق خيالي غربي وشرقا"=" مرات يبعد بعيد ونوب يدنيني
وفكيت ابوابٍ قديمة للهوى غلقى"=" وقام يتلاطم غرامي في شراييني
ومرت على البال صورة جادلٍ طرقى"=" من قدها غارت غصون الرياحيني
ومن خدها غارت مزون السماء الزرقا"=" ومن ثغرها غارت ورود البساتيني
ما كنها الا شعاع من القمر فلقى"=" وان غاب نوره بدل نوره تكفيني
وسمعت صوتٍ ينادي يامل الفرقى"=" صوتٍ يجلجل صداه بماضي سنيني
اول احسبه قريب ونوحة الورقى"=" بعدين احسبه بعيد وشيلة هجيني
يوم انتبهت وشعوري بالهوى غرقى"=" عضيت ابهامي وذاب الحلم في عيني
وحولت وقلبي مليان هموم ومعرقى"=" انقل صواب الضماير وافرك يديني
واقول لنفسي لجرح الحب وين القى "=" دكتور حاذق من اوجاعه يداويني
ومادام قلبي من اول كارهٍ يرقى"=" مادري وش اللي على المرقاب حاديني
