هو/ عبدالله بن محمود المعيقلي البلوي
أحد الشعراء الشباب الذين نفخر بهم. نشر في العديد من مجلات الشعر المتخصصة
بصدق: عبدالله أحد أهم الشعراء الشباب في محافظة الوجه
احتفظ بالعديد من النصوص الرائعة للشاعر والتي سأقدمها لكم بإذن الله
وسنبدأ بقصيدة: يمه
يمه الآهات لا جت في بدايات الحكي=لا تلومين الخفوق إن ما لقاله غيرها
يمه الشكوى مذلة في عيون المشتكي= إن سلم من شرها ماهو محصل خيرها
أعبر حدود الندم يالطاهره لو مسلكي =ينشل أسرار السنين الموحشة من بيرها
واعترف لك واعترافي في ثناياه اشبكي=دعوه أصدق من حروفي لو برع تعبيرها
الليالي تشرح أخطاء المغفل والذكي =كلهم سيّان يمـــــــه، لو نـــسوا تحــذيرها
للمغفل حصه من معنا الطريق التهلكي =وللذكي عشرة حصص بيد الزمن تحضيرها
غلطة الشاطر بعشرة واحفظيها لابنكِ= ربما الغـــــــلطات تحيي همـــته وتــــــنيرها
أسرف ابنك ما طغى وانتي حكيمة تدركي =خفة الاخــــطاء لو بتقاس مع تــــكريرها
سهل تمرير الذنوب إن غاب عنها الجمركي=وصعب تبرير الخطايا لانكتب تقريرها
طيش عابر واعتبرنا من حياة الفذلكي= ضاق بالي من لـــــيالي طالني تقصيرها
وهذا انا جيتك ولد سامع مطيع لامركِ= ذكريات الامس دعوة صالحة تطهيرها
سولفي عن طيب أبوي وكيف كان وحركي=شيمة اللي مات كيف أصعب ظروف يديرها
اشتركنا بالقصيد وبالملامح واتركي = باقي افعاله على اليمنى بعد تشميرها
كان لي تكتيك ذاتي وهذي عندك تكتكي= مايجي من طاوع امه بالرجال أخيرها
ادري والله نفسك اني من جلالة قدركِ= أحفظ القرآن كامل آية وتفســــيرها
دوبي أصحى من سباتي والحق آخر حلمكِ=واستبيح دموع ما يخفاك وش تأثيرها
وازرع بذور استقامة بالزمان الشربكي=واعتني فيها وآخاف الماضيات تثيرها
ساعديني بالدعا وان طال زرعي باركي= يمكن أحمل مسك واترك للضرايم كيرها
ادخلي يمناك بين العوج حتى تمسكي = قلب يفـــخر بك ونفسٍ تفرح لتحريرها
انتي روحي والضلوع تقوم فيك وتتكي = بس اريد رضـــاك يمه ويتغنى طيرها
بي رجولة وانتي انثى ليت فيني بعضكِ= والله إن بعض النسا تسوى بلد باميرها
لك علي ماجيب علم الموت منه اريح لكِ=كلمة انظمها قصايد واقدر أدهن سيرها
ياعسى عمرك طويل وياعسى عمري لكِ= ويا من أقسم بالقلم والشمس وبتكويرها
أسألك لامي بها الدنيا سعادة تنحكي= ومن لهيـــب النار يا رب العباد تــجيرها
شـاعر انتج، لو تكون الآه عنوان الحكي =ما تضره يمـــــــــكن أنه ما لقاله غيــرها
