زان ليلي, وامسكت روحي مفاتيح الكتابه=لا اجتمع شمل الثلاثه , ودّ المعنى وجيب
مجهر الجمهور مِشرط يفضح بجرحه صوابه=يا كبر وقع المصيبه مع عدم ستر الطبيب
للقصايد فن, والشعار ترصدهم رقابه=ماتبي شاعر بيوته "ياتصيب ويا تخيب"
قال أبوي اللي مشى له درب لا يتعب ركابه=لين يلفي وافهم الأمثال يا لعقل اللبيب
كان يا ما كان ذيب استوحش الليل وعوابه=نبّه النايم عليه وجابه يجره صويب
وش يفيده بعد موته لا غدا جلده ربابه=كان ذيب ولا بقى من ورثه إلا جلد ذيب
قالها كنه يلمح لي عن الشعر ونصابه=ما تجيب الزبده إلا بعد ما تجيب الحليب
هذا يعني من يدق الباب يستحمل جوابه=لا يدق الباب قبل يهندس البيت العطيب
فِهم ابوي وفِهم جدي ما لحق فِهم الصحابه=و لالحقنا أجدادنا لو راس واحدنا يشيب
كانوا أرباب الحكي لو هم قصايدهم تشابه=السجّّل صدورهم والمعني مايخطي يصيب
وهي كذا الدنيا عمل والخير يستوفي ثوابه=تكدح يدين الخلايق و الله بفضله يثيب
أما بعد:أشوف عيني للسهر فيها طرابه=وفيها من عين الخفير اللي محسّب للرقيب
والثنا لأصدق رحم يبقى وتملاه الصبابه=يوم أبوي استمسكت يمناه بالركن المهيب
الرجال بكل عشيره عَدّهم محدٍ وفابه=واذكر أولهم خوالي, سم لعيون الحريب
عزوتي يحفظهم الله صاروا رموز النجابه=حي هالجين الوارثي والنجيب من النجيب
قالوا إن الزين غالي بس الأزين ينحكابه=والنجوم نجوم,لكن الجدي منها عجيب
استعدي يالحروف وجيبي لشعري زهابه=و استميتي بالقلم يبني لكِ البيت الرهيب
خطي اسم "ابوسجى" تلقين لكِ عز ومهابه=القلم يجري نهر والحرف كالغصن الرطيب
خطي اسمه وابشري بوسام يصدر من حسابه=بالورق تنبت رياض يجول فيها العندليب
هذا خالي راس مالي شيخ ربعه في شبابه=والله إنه خالي من عذروب لأمثاله يعيب
هذا من ضحكه حجاجه يعلن إعدام الكأبه=هذا سهل وممتنع ويحلحل الأمر الصعيب
عنبر اسمه عطّر الأبيات لو فيهل غرابه=الغريب أسلوبها و أبوسجى ما هو غريب
أجودي من جود كفه تنكسر عين السحابه=لا مشى بالقاع تلقى موضع أقدامه خصيب
متزن صادق صدوق الصدق حتى في سرابه=صاحب الوقفات بالضيقات والوقت العصيب
ما تحلا بالعطا ألا واحداً يعطي ثيابه="في ثيابه شيخ وإن مازرّر ثيابه نقيب"
التواضع والشهامه سر كلمة يا هلا به=والمحاسن والسعه شريان للصدر الرحيب
صار قمة, فيه كل الناس تجمعهم قرابه=هوه مثال الطيب واللي طاب من طيبه يطيب
الذهب وزنه ذهب وابوسجى كلاً درابه=ماتغير من عرفته هوه على ماهو حبيب
الفخر والمجد والإحسان عنهم بالنيابه=اكتب بخالي قصيده ترسخ براس الأديب
ما مدحته لو مدحته ماتجمل مع جنابه=يكفي أفكاري عليه تنافس أفكار الخطيب
وهاجسي لوما سقيته قال قلبي مرحبابه=يستقي صافي زلال يجّم في قلب القِليب
كل نبأ له مُستقّر, وكل بيت أدق بابه=لين اشدّه واحكمه واحسب حسابات الحسيب
أما بيت يسرني معناه وأطرب لإنسيابه=وألا يعطيني قفاه احسن لي واحسن له يغيب
ما تحمّل بيت تلحقني من اسبابه معابه=لا ولا اماري عليه ومِشرط الناقد قريب
وشاعر يجيب النهايه عكس ماقال وبدابه=يحمل أسفاره بلاش يريب وألا يستريب
تمت ومهداه للي جابه الشعر وغدابه=مايجيب أعماق "ديوان العرب"غير العريب
الشاعـــــر:[blink]عبداللــه محمـــود البلـــوي[/blink]
