البارحه مرت عليه تفاكير = لو مرت أكبر ضلع يمديه منهار
قامت تواردني هجوسي طوابير = شياً خفي وشي ملفت للانظار
وامسيت من كثر التفاكير ماسير = حتى على الجيران ماريد مسيار
واتابع الونات واخفي عن الغير = اخاف من هرجة حسوداً وثرثار
واتعب رجليه بكثر المشاوير = على المراقيب اتردد بتكرار
ما فارق المرقابه الصبح وعصير = مثل الرقيب اللي عن القوم سبار
وهموم قلبي واردات ومصادير = غديت للأحزان مارد ومصدار
واجيب من زين التماثيل تذكير = أسلي النفس الحزينه بالأشعار
واسهر لياما اسمع لحون العصافير = وتابع الاخبار ياشين الأخبار
واحيرتي هبت بوجهي معاصير = تحولت من ريح زينه إلى اعصار
دار الزمان وصار بالوضع تغيير = وانا شغلت الفكر في كثر الأفكار
والناس عن وضعي تسوي تقارير = كلاً حسب عرفه يصدر له اقرار
قالوا عطاالله خاطره فيه تكدير = قلت إي نعم مشغول بالي ومحتار
قالوا علامك قلت يالله عسى خير = جاني نصيبي من صواديف الأقدار
علماً لفاني دمر الحال تدمير = واَضحك وانا كني على صالي النار
قالوا سلمت من البلاء والدعاثير = وش علمك اللي جاب لك مر الأمرار
قلت القضية تجرح الصدر وتثير = نفسي ليا حل الحديث أو بها دار
قالو لي اصبر قلت حكم المقادير = راضيه والمكتوب ما عنه معذار
فكرت بالدنيا بحكمه وتدبير = ولين ما للعبد عن صايرٍ صار
شياً كتب للعبد ما عنه تحذير = مكتوب قبل الخلق تقدير الأعمار
لكن ليا صكت علي الدواوير= وجهّت للصاحب تماثيل واشوار
ياطير ياللي تنفض الريش ياطير = ياللي على كيفه لينه بغا طار
بلغ لأبوساري تحيه وتقدير = مني عدد ما هل هتاف الأمطار
واشرح له اوضاعي بدقه وتفسير = مالي صديقً غيره أعطيه الأسرار
قله تراني صرت ماودي أصير = عرضه لصفقات الليالي والأخطار
واليوم غير اخدر القلب تخدير = واللي مضا قلبي على الجور صبار
محصور بين أمرين يحتاج تحرير = يا ليت قلبي حر من ضمن الأحرار
وافرح بتحريره وازف التباشير = ويطيب جرحاً بالحشا عقب الضرار
هذا كلامي يابوساري وتعبير = عن حالتي وانته بالأمثال بيطار
وصلاة ربي عد ماحل تكبير = على الرسول المصطفي خير الأبرار
الشاعر عطا الله بن ضبيعان البلوي
رد على قصيدة الشاعر عطا الله ضبيعان البلوي
ياراكبٍ من فوق زين التواسير = أشقر طويل الباع من فج الازوار
حذرٍ وشذر وضارياً للمسافير = ممشا ثمان أيام يطويه مشوار
يطوي بعيد الدار فد ومغاوير = يعجبك في زوله ونوله ليا غار
وان جا نهارٍ به ملز وجماهير = الأوله لهله على كل مضمار
ماهي على قومت بعيرين وبعير = يندر على مية شناحي بمندار
ما فوقه إلا الخرج ودويرعٍ دير= والميركه هن دل حصات الاوبار
في طيهن نقشة عروج وبواكير = وافنان فيهن من زيهات الازهار
شغل العفيف الظرف زين الغنادير = اللي زها دله ضيا نور والأنوار
ورسالةٍ من جيب قرم المناعير = يا وّي ركاّباً ويا وّي مغوار
قرمٍ شهير من الرجال المشاهير= يفوق في قضي الغرض كل معيار
رسالةٍ تحمل تحايا وتوقير = عد النجوم وعد حيتان الانهار
واعداد ما يرسّن سفن وبواخير= وعداد ما خاض البحر كل بحار
للصاحب اللي يشكي الهم ويسير= ويحير ويحّير بشكواه الاخيار
يشكي علّي من الليال المقاشير= جور الزمان وستّر الوضع بستار
وانا على نهجه وضفّي تساتير = واخفي المواطي عن معمر وعمار
لجلن في دروبي وعور وعواثير = ماودي أطا فوق حساس الاوتار
ماغير الّمح له تلاميح واشير = مقدر على بث الخبر عبر الاقمار
محكوم حكم الزير فوق الزرازير = مارداه الله مالنا عنه مدحار
وانا اعرف اللي فّور الدم تفوير = والحق أحق يقال والخمن غرّار
شخصاً شخص شخصه على زيد وعمير = ماهو بنصابٍ ولاهو بفشار
يسعى لشيٍ ما سعوله الطراطير = ما زاغ عن سنة رسوله والانصار
ياصاحبي مالك عن الصبر تحوير = والله للصابر مجازي وغفّار
لو في ضميرك مثل دق المسامير = صبرك على بلواك بيحط الاوزار
وان طال صبرك بالليال المعاسير = الله يعيضك بالفرح عقب الاعسار
خلك سواة الضلع عال المواكير = ماحركه عاصف ولا سيل حدّار
وامسك بحل الله ترى فيه تجبير = وان كان جودته ترى الحبل هودار
جعل الولي رزاق عكف المناقير = يفرج همومك لو تناجيه بصخار
قلته وانا في هم عشرة قناطير = وازددت من همك ثمانين قنطار
وامسيت تشلاني هجوس ونواطير = ذولا ذوان أقفاً وذولاك حضّار
آخذ مع الهوجاس لفات وانير = كني لضيعةٍ مع الدور دوار
وامشي مع العالم وكني على كير= همي مجنزر ثومة القلب جنزار
من خلقتي مارتاح وصحيبي مكير = أفرح بفرحاته وكوّر ليا كار
وليا نصاني ما عطيته معاذير = أركض معه في كل دربٍ ومعبار
هذا وانا لك بالسهل والمواعير = أقضي لزومك فايمن الدار ويسار
علماً طلع مني ولا عنه تأخير = أنا وبو نايف سو سر وجهار
يومنّ بعض الناس مثل الخنازير = يجزون راع الطيب في صد وانكار
يناظرون الناس شحف وتحاسير = وعيونهم تهجل ورى كل دينار
وقت الوساع يفوّتون المعايير = وليا لزم لازم يولون الادبار
هذه طبايع كل غادر وزنقير = الله يبور بكل بايق وغدار
والمعذره لن كان بالقيل تقصير = ولا انت محمي يبن الاجواد ومجار
حيثك قطفت من الغصون المثامير = وانا نحته من طق من صم الاحجار
وختام قيلي قلت ولكم وكمهير = واعطيك علماً ما كتب بالاسطار
وصلاة ربي عد شغل المواطير = واعداد من وضى وصلى بالاسحار
وعداد ما يرعّن حمرُ ومغاتير = على النبي واعداد ما بالوطا سار
الشاعر عبدالله بن احمد المعيقلي
