قصيدة حبر الدواه - للشاعر سليمان بن حمدان الجبيل
بسم الله الرحمن الرحيم
هذه قصيدة من الشاعر سليمان حمدان الجبيل موجهه للشاعر محمد سالم المهيوبي
وين حبر الدواه النفس ثاير جدلها = دقت السالفه سلف العنا وجيت ساري
كل ما قلت نفسي خفف الله ثقلها = أومت بحال مجنون الطواري طواري
غفلتي يا محمد ما تنوّخ جملها = ودها بالرفيعه و أبعدن المحاري
يا الله إني زبنتك لا توعر سهلها = دامهم قالوا إنه مستكن بمذاري
و الخوافي على الله كل عوجا يعدلها = العرب ما تعرف الا البيان الجهاري
فيه أمور أحتملها و ذيك لا ما أحتملها = لو أخفي مواجعها تبين المواري
شف حوالي وش اللي يا محمد نحلها = ما تشوف العظام مكسيات عواري
يا الله إنك ترد الذاهبه و تعقلها = شاردات الخواطر بين بايع و شاري
يوم أصرف هذيك و ذيك جتني هولها = يضربن الحشا بمسممات الشباري
ما تريح قلوبٍ تشتكي من زعلها = و لا تنام العيون الى هجس خطو طاري
و لا يفيدون عقيلن تبين جهلها = العور في صفوف العمي كاتب و قاري
وشف فوايد ذلولن ما تذومل بأهلها = في نهار النخاوي يوم صاح المثاري
و الله إني لأهملها لمن يهتملها = لو لحقني من الهراج لوم و مزاري
باح مكنون صدري هرجتك ويش قلها = دق سلف الجزيله ما أنت راعي هذاري
القوافي خبير الشعر عزل يعزلها = ناس ترد الجمام و ناس ترد الخباري
و أنت ماردك جمه يرتوي من وصلها = يا منومس خويه فيك و الله نماري
و الثمايل لها ربعن تجي تثتملها = ياردون الضحى و يصدرون العصاري
تم بيت القصيدة و أعتذر عن زللها = و السلام لرسول الله ما هب ذاري
