بسم الله الرحمن الرحيم
صار لي أسبوعين وأنا غايب عن المنتدى من بعد الأمطار اللي نزلت على تبوك الله يعم بنفعها البلاد
والعباد والسالفه بدت من اليوم اللي بدت به المزون متلبده بسماء تبوك ونادت علي الجده وهي
مرقبه براس العماره وحاطتن يدها على جبتها وتضهب وكل ما شافت لها مزن ظهر بالسما وهي
جرتها حسره وقالت : لا واهني اللي الحين مرقب براس حومل ( جبل بالديره ) ويشوف وادي
حمًيط ووادي الحنو ويجيب لي علمهن عسى السيل يدرج بواديهن
ألينه أشوى من سيل شوارع تبوك اللي دايم الما منقع بها
وألتفتت علي وقالت : يا أوسكار ما تخلينا وأنا جدتك نطلع الديره منها أنتمشى ومنها أندور
لك راعية بيت ............... يا حبي لهالجده تسمع بأستغلال الفرص أمبهذلتني كل ما بغت
شي جابت لي طريا الاستقرار والاسره تعرف نقطة الضعف عندي
قلت لها : يا الله مشينا بس خذي مفتاح الجيب من ابو هيثم اذا أنتي مصمله على الطلعه
وما أذن العصر الا وحنا متعدين قرية الرحيب شوي الا وهي تقول يا وليدي ترفق بجدتك
أنت علامك طاير أحس كبدي قامت تقلب وراسي له خاويه وقف دور لي بهالشعيب جعده
ودي ألهمها ترى ما ينعلًم بها عن وجع الكبد وسوي لنا شاهي تراي صاكني راسي من العماس
قلت : أقول يا جده تو الناس اللي مشيناه كله ما يجي له ساعه ومعازيبنا قريبين خلنا ناصلهم بضو
ووصلنا معازيبنا وقدموا لنا اللي الله أقسمه لنا ومرحنا وما وعيت من النوم الا على صوت جدتي
تنادي وتقول: يا راعي البيت أبشر لك براعية غنم (يعني جته بنت )
وقال لها المعزب : الله يبشرك بالخير وترها جت لخويك أوسكار >> الله من البلشه
هنا نطت الجده : ان كانك صامل ودك أتزوجنا فٌوًت لنا أختها الكبيره
قال : موافق أن بغى الصغيره ولا الكبيره مهنا فرق بس لزوم يوافق على شروطي
قالت الجده : واهمي شروطك وشي يا معزب الرحمن
قال : أسمعي شروطي 1- جيب صالون موديـــــــــل 2006
2- يبني لي بيت مسلح بالجو
3- يشري لخوها جيب مقفص
4- يعطي عمامها وعماتها من خمس ألاف ريال
5- يجيب لي راعي ويتكفل براتبه
6- عشر ألاف لأمها حق رضاعه
7- ولا ياخذها من عندي الا على الحول
قالت الجده : شروطك هذه ما نوافق عليها هذاك اول يوم البنات قليلات وأبو البنت كل يحي
به وما يطب الارض كلن وده يكسب رضاه أما اليوم تغير الحال وصار ابو الولد كلن يطلب رضاه
ونصيحتي يا وليدي لك شروطك هاذي لا عاد تطريها ولا ترى بناتك يطول مقعادهن عندك
وهنا تنفست الصعداء بأن الجده أنهت الموضوع بحنكتها السياسيه من غير تدخل من جهتي
لأني كنت ناوي أخربها يعني الحين أشتري لخوها جيب مقفص وأنا غير جيب أبو هيثم معي
وقلت يا جده روحنا
دارن جفت مظنون عيني وأنا اشوف ................. مالي بها عقب أريش العين مقعاد
قالت الجده : يا وليدي أثرنا مع الخط ما أنمحى أحمر الى الحين
قلت : أحمر ولا أسود مشينا يعني مشينا >>>>> ما أدري أحس أني أحرندبت من هالشروط
واحط جدتي بجنبي وينك يا تبوك
ومن يوم مشينا والمطر علينا والجده مغير تهذ من القصيد والسوالف وتاخذ بخاطري وتقول ما يهمك
وأنا جدتك لزوجك لو أنه من أفريكيا >>> تسمع بأفريقيا ولا تدري وينها فيه
ولا درينا الا وحنا بوسط وادي سيله من الجال للجال والجيب وطفى علينا
وزاد عماي بصعيك الجده ويهوك واطبتنا الزينه
ويهوك وجردنا الليله وجلة شوفي لابو هيثم
قلت لها : متعرفين تسبحين يا جده ؟
قالت : يا وليدي يوم كنت عويل كنت كل غدير أطبطب به
قلت لها : هذا وقت ما تنفع معه طبطبه أطلعي على تندة الجيب وأنا ودي أفزع غديني ألقى أحد
معه حبال نسحب به سيارتنا وما أوفيت كلامي غير وهي متقرعطه بحلقي وتقول : واسببي
هذه أخرة خوتنا ودك تتركني لحالي ما تدري أني ما أدني الخلا وتصيدني كتمه لصرت لحالي
ول شان فالك أخفس يا خلابيصك اللي تقل جزة نعجه >> كني تهزئت
قلت : خلاص ولا يهمك أركبي على ظهري ودي أسبح الى ما نزبن العزاز (مكان مرتفع عن السيل )
ولا طلعنا من السيل غير وانا تلفان وجدتي أيديها من البرد والذله يابسات على حلقي وما فكيتهن
الا وريقي ناشفه
ورقينا لنا راس بطين نتشوف أحد يفزع لنا غدينا شبهه من الجوع والبرد مغير انتنافض
وهذا كله يهون مع سيارة أبو هيثم لو ياخذها السيل عني غير يلحقني اياها
بس الحمدلله أنه جونا أهل سياره وأسحبوا سيارتنا ورجعنا بسلام
وأول ما وصلنا أذبحت جدتي وحده من معزاها رشوشه وهي تغني :
يا غنم حيَري دَيري وقرضي كل عود ..... قادكن الحويه وبنت الشرود
مع تحيات أخوكم أوسكار الهرفي
