خلاص حابطل السجاير .. واكون أنسان جديد !
بسم الله الرحمن الرحيم
السلام عليكم ورحمة الله وبركاته
أعذروني أخواني عن الغياب اللي حصل والسبب هو أصرار أبو هيثم
والجده على أني أطلع معهم لقرية أبوراكه حيث أنه هذا الوقت هو موسم
توبير النخل (تلقيحه ) ولنا كم انخله ودنا انوبرهن والجده مغير ترفرف بهالمزرعه
ومن صبح العالمين وهي امصحيتني قم النخله هذه بها غرب منفضخ وهذه ودًيه
توها مبًشره وكل سويعه وهي معطيتني محاضره : يا اوسكار وانا جدتك تعرف زين
طريقة توبير النخل ترا توبيره مهو مثل بعضه عندك الحلوه حط بجنوها ثمان شماريخ
والبرًنيه من ست الى سبع شماريخ والودي الصغير من اربع الى خمس وأنا مغير أهز
رويسي وأمشي واوبر ولا مسكت العلم زين وصرت أحط بكل جنو عشرين شمروخ وأكثر
ويوم جا ابو هيثم وأنا مقعي براس النخله مثل الوبر على جال المجحره
وطلع عندي ويوم شاف توبيري ولنه يوم عوى وخبط يده على جبهته انا قلت ان قرصته
أفعى وسألته بفجيعه : وش فيه ؟ ولا كملت السوأل الا وانا بقعر النخله
وأسمع له سخمطه وزنيت والجده تجي تركض وش فيه يا بو هيثم علامك شان علامك
قفعت ولدك من راس النخله ؟
قال : هالمركوف هاللي مسوي نفسه فاهم بالزراعه بغى يحرمنا من التمر هالسنه !!!!!
كل جنو حاطن به بار أكبر من الجنو نفسه ولو أني ما جيته كان حتً النخل حتَ الله هالكشه
اللي تقل صيرة انخله .
كانت الجده تمسح عن وجهي المراغه ويوم سمعت كلام ابو هيثم وهي تنشب أصابعها
بجذلتي وتقوم تنفضني وتقول : اللي معمي عينك وش صار انا ما علمتك لكن أنت
ذهنك مهو معي يا دوحان بس العتب علي اللي وده أيخطب لك !
بس من هالجذله
وأنا جدتك أنك ما تقول يا لاليه على خطيبتك قبل ما تتعلم توبير وجني التمر
طبعا غديت دافور من يوم سمعت زمجرة الجده عاد كله ولا أني ما قول يالاليه
وش لكم بطولت السالفه وبرنا نخلنا ورجعنا على خير
وبمناسبة عودتنا الميمونه الى تبوك سوت الوالده وليمه دسمه على شرف ضيف العائله
الكبير أبو هيثم على أمل أعلان الهدايا اللي جايبهن معه وقالت له وهي أتقهويه:
من طول الغيبات جاب الغنايم وش جبت لي يا بو هيثم هديه معك ؟
والله حاله عسى الواحد ما يغيب يوم ويرجع الا والمره مادتن برطمها قدامها يجي
شبر أن ما جاب لها هديه>>> الهدايا صارت موضه هالايام الله يرحم زمان أول
يغيب الواحد سنه واللي يجيبه معه رطل سكر ونص مجلاد تمر
أبو هيثم : أنتي شايفتني رايح لباريس وتحترين الهدايا ..... وهنا الجده أهنفت
وحطت يدها على فمها باستهزاء على طلب الوالده وقالت : وايتمي .. هديه منين !!
ودش يجيب لش منين هديه !! من ارتمات الخفيج ولا من طلحات ضمر
والوالده أتكشر وتقوم أتلقط فناجيلها بزعل
وفهم عليها ابو هيثم وقال : هديتش بالصيف جنو حلوه
وهنا دق جوال الجده يا هل الشفر بالله معكم شيلوني الصبر انا ما اقواه لا تتركوني
لاعبن على جدتي كل ما لقيت جوالها راميته وانا خطفته وحطيت لها من هالنغمات
وهي من أول ما تدني الجوال بس غصبتها عليه يوم حجينا وخفت أنها أتغدي وعقب
جيتنا من الحج تولعت به وصارت تفصل مخباهـ لثيابها خصيصا للجوال
المهم اجلست ساعه وهي تفرس ودها أطلعه من مخباتها وتالي قالت : يا اوسكار
شف لي هالاغبر بطل يهرج هو علامه
وقلت : هذا رقم عمتي
قالت : يا وليدي وش علمها شيه دق عليها دقه وقفل >> من يوم قامت تشحن البطاقه
على حسابها تعلمت التوفير ومربذه بنا كل ما بغت شي دقت دقه وقفلت
المهم العمه دقت وكلمتها جدتي ولادرينا الا يوم جدتي أنتفخت وقام الشرار يتطاير
من عيونها وهي تردد اللي أوله شرط أخر نور أن ما سمى بالرحمن وطب الارض
ألين ما راسه يطق راسش ورا اليوم
وهنا ابو هيثم ثاع ولنه واقف وينتفض >>> مشاركه وجدانيه للجده
وسأل الجده وش اللي صاير ؟
قالت : وش اللي ما صار !!! رحيمك اغليوين رجع على الدخان وحنا شرطنا الوحيد
يوم زوجناه بنتنا أنه يكب عنه الدخان
طبعا قمت أتحقرص وأتمقرص وأتلمس البكت بجيبي خفت انهم شافوه ويفشون
غل رحيمهم بي ولا صدقت على الله أنهم أرسلوني أجيب العمه الطموح
وعند حضورها عُقدت جلسه أجتماع طارىء برئاسة أبو هيثم ونائبه الجده
وأتُخذ قرار بطرد الوالده من الأجتماع بحجة أن هذه الأجتماع يناقش شؤون داخليه
بحته ومواضيع سريه للغايه لا يجوز أطلاعها للعموم هذا القرار مصدره الجده
لا حوووووول يعني الوالده بعد خدمة سبع وعشرين سنه معهم لا زالوا يدسدسون
عنها أسرارهم ......... ولا دروا أن أبو هيثم مجبور يفرط السبحه من أول جلسه معها
طبعا العمه ماخلت ولا بقت عذروب بزوجها الا قالته >> الله حسيبكن يا نخاشات صدع مروان
وهنا تدخلت على أعتبار أني أحد المحققين وطرحت سؤالي على العمه : متى وأين وكيف
رأيتيه يعمر التتن ووش نوع الدخان كانش صادقه .. ومن زود الحماس بغيت أطلع
البكت واقول مثل هذا >>> يا شين الواحد لا تحمس
قالت : أنا وحظي بري ما شفته يدخن أبدن بس أني أًَرًوح بهدومه ريحة دخان
ولا طاري علي أعلم بس وش أسوي كل ما طلبته شي عياني ولا يخليني أسًير
على أخواتي كل ربوع وخميس >>> طراه المسيار صاير هالايام لزوم يتجمعن الاخوات
كل ليلة خميس وجمعه عند أهلهن وان صح لهن مراح ما قصرن
ويوم سمعنا الدعوه مجرد شك في شك نصحنا العمه بأن تتحرى الدقه والصدق
وعدم أشغال وإضاعة وقت الأخوه المحققين ابو هيثم وعائلته ببلاغات كاذبه وكيديه
الغرض منها أهواء شخصيه
ومن عقب هالقصه وردة الفعل اللي شفتها على شارب الدخان قررت وانا ولد
ابوهيثم أني خلاص حابطل السجاير واكون أنسان جديد ..............
مايستفاد من اللي حصل معي
1- لا توبر الحلوه بأكثر من عشر شماريخ >> ماسكه معي زين هالمره
2- لا صرت راقي لك انخله تمسك زين لا احد يقفعك على غفله
3- لا تسأل الحرمه عن سبب طمحتها الابعد ثلاث أيام
4- لا تعود الحرمه أنه على كل سفره هديه
5- التدخين يضر بالحال ومتلف للمال
مع تحيات أخوكم أوسكار الهرفي
