واقلبي اللي الرهيفه غدت به
بسم الله الرحمن الرحيم
السلام عليكم ورحمة الله وبركاته
شريت لي من خيرة الهجن ناقه ..............حايل و ما لاج الحوير تحتها
حطيت وسم اوسكار والوسم شاقه ........... ثلاث خطوط بفخذها ميًزتها
هذا يا طويلين العمر في يوم من الايام كنت جالس بهالبيت وهاجد هجده واحد جاي
من الدوام ومتغدي وده ينام ويوم توازنت لنومه والى ابو هيثم لابق علي
وقال : وش هاه !! نايم قم يا خامد الريح خاوني للحراج ودنا أندور
حاشي أنقوده على خالك فرحه القابله عجًزنا خالك كل سنه وهو يا لاليه
قلت : أيه زين ما يخالف بس دور لي معك قويده ودها لحوش خالي متعجز من مشوار الحراج
وعلى الراتب أخلصك
قال : والله ياراعي هالفقايض أدعاني الله امدلي لخليك تعيف درة أمك اللي رضعتها
أرا قل نفعك .. واهدم بيتك من طلعت له ... العجز منين جاك
قلت بأستهبال : ماأدري ... هي بين ثنتين يا منك يا من الخوال والظاهر
أنها من جهتك لان خالي هالحبيب نار ولها سنا ما حوله عجز كل سنه وهو متزوج
وهنا صحصحت وطابت لي السالفه واتربع على سريري وقلت : اقول يا ابوهيثم
ما ودك أنخطب لك أخت زوجة خالي ويصير على قولة اعلانات الشامبو خذ أثنين
والثالث مجانا غديهم يعطوني أختهن الثالثه بدون مهر ونسوي حفلنا بليله وحده
طبعا ابو هيثم مع هالكلام أرخى سمعه معي تقل طابت له السالفهه
وقال : صار ارحام خالك بقى عندهم بنات !!!
قلت : أفا ااا الخير واجد بس انت وافق وخل الباقي علي
ولا اوفيت هرجتي غير والوالده داخله علينا تنتفض تقل لاذعها
كهرب فولت 220أثرت هرجنا كله باذنها
وقالت : يا غبار أنت احد مرسلك علي ... واهدم بيتك كل ما انفردت انت وابوك وانت
قمت تبرق وترعد بهالسوالف اللي تغث البال أرعد عليك اللي ما ياوي لك وألتفت
للوالد وقالت : أملهي الرعيان لا يلهيك أن طاوعته ما انجزت من شغلك
شي >>> تصريفه للوالد حتى لا يتأثر بسوالفي
وتنحنح ابو هيثم واقفى مع الدرج غير طقيش حذاه وانا أخطف شماغي ورا ابو هيثم
وتخطفني أمي مع جيبي وقالت : واللي رفع سبع وطًا سبع سمعت هالعلوم
منك ثاني مره لا أطا على ضلوعك لما اخليها حطب أخفس يا خلابيصك المًدليه
وانقز واحب على راسها واغني لها :
ماما ماما يا ماما ..... يا عالية المقاما
لكِ كل احتراما ..... حسب ما امرنا الله
قالت : الفناجر واجده تحدر وادي وتسند وادي واهني من شاف انك متزوج غديك تهجع
وتبطل من اللقلقه اللي تغث البال
المهم لحقت ابو هيثم ووينك يا حراج الابل ويوم وصلنا ولا الناس متكومه على المحرج
على الخلفات على الاصايل على اللقايح على الزمل .. على المخاليل
وانا أطيح عند ناقه معها احوير قلت لابو هيثم وش رايك نشريها قويده
قال : أخفس من جيل يا جيل الفلس اللي ما يعرف يفرق بين الجمل والناقه
ذي يا كوبان خوَاره والخواوير مشهورات بكثر الحليب
واللي هناك الاصايل مشهورات بركضهن واللي هناك زمل ونفس الشي
فيهن خواوير وفيهن أصايل وحنا ودنا اندور حاشي من المخاليل
قلت : وتس ميننق مخاليل أند واي وليه ما ودك غير حاشي ؟؟
قال : أهرج هرج أهلنا الاولين لا أرمعك على فمك أخلي ثناياك بالارض
الحاشي يا الحضري الحمه أطرى وألذ لأن سنه صغير وهو المرغوب وقت
الفروح
وانا انسل من عند ابو هيثم واتمشى بين الابل واشوف ذيك الناقه اللي
سنامها طول يدها واكبر النياق جسم وانا اشتريها من غير
ما يدري الوالد وبعد كم يوم جبت سياره وحمًلتها وديتها السيدا ( مكان سباق الهجن)
وش اسوي الناس كلها صايره اهل هجن قلت خلني أطب طبتهم واشوف
النتيجه وش !!
وأول الخير أشتريت لي راكب ألي بألفين وخمس ميه وحوش كلفني
ألفين ريال وهذا من غير العلف والراعي ومكاليفه وهذا من غير التعب اللي
يجري لي صرت من عملي على السيدا ولا اروح غير الفجر ويوم حطوا موعد السباق
الله لا يبلا تقل مهرفل لا أتهنى لا باكل ولا نوم بس اركض مع هالسيدا
والجهاز بيدي ويهوووك أر الرهيفه >>> اسم ناقتي قعدت يومين وانا ادور لها
أسم الله لا يبلا غدت على راسي طاسه ما جيت اسمي هالذلول
وهذا انا مدهر واشوف الناس توقت لهجنها واوقت مثلهم خمس كيلو
اتجيبها الرهيفه بساعه اللي يوم اركض ومعي الجهاز عشان أوجها نوبات
أسبقها غير اقصر من ركضي
وكعادتنا يا هل الهجن نجمع كل خميس قطه وانسوي سباق يبدا مع ذرة الشمس
وقبل السباق بيومين قلت لابو هيثم خبر الناقه وقال وشي من ناقه ؟
قلت : من الابل اللي بالحراج
قال : وانا اشوفك ما انت اوسكار الاول متغيرن علينا ما عاد تقعد معنا
عساها جرب... الحين ما جيت تربي بل غير بهالوقت اللي أهلها الاساسين
تركوها يا وليدي الوقت هذا مهو وقت بل وسباق هذا وقت علم وشهادات
الا اذا الله معطيك من خيره وعندك زود مال وفضاوه لا باس اما اللي مثل
حالك وراه دوام ما تصلح له ... ولا وش رايك تترك عملك وتصير راعي بل !!!
تراني هالايام ناقدك ما انت مزيبيط رنً وانا ابوك وامسك الارض وخلك
بداومك.. وعلى كل ابو حال ودنا نمشي معك وانشوف ذلولك اللي أبلشتنا بها
ومن فجر الخميس ما تسمع غير ارغا الابل ولجة رعيانها مختلط الحابل بالنابل
واحط حويه على الرهيفه واربًط الراكب الالي واقودها لخط البدايه
ويبدا السباق وهن يثوعن غير غبارهن وانا بجهازي اباري الرهيفه
واصعك ويوم وصلت خط النهايه ولان ما في احد قدامي وانا انبسط
واتعين ابو هيثم ودي أبشره أني اخذت الاول
ولانه جايني متلثم وقال : عسى هذا كسبك واهدم بيتك ما علمتنا أن ذلولك
خوَاره ........... الناس أكسبت وروحت حتى اللي على رجليه وصل قبل
ذلولك ... أرا عساك ما تكسب القوم قدامي حمًلها وعلى الجزار
وعندما أقفى بها ابو هيثم للجزار وهي تحن وترزم
قلت موادع لها :
اليوم خلاص باوادعك يالرهيفه ....... مادام جزار اللحم جاب سكين
لا ابعد عن الجيش عقبك واعيفه ....... وابعد عن السيده مقر البعارين
مايستفاد من بعد الرهيفه
1- لا صار أهلك معزومين على فرح أبشر بقلة النوم
2- لا تهرج بخطبه ابوك وانت في البيت ترى الجدران لها اذان
3- صاحب بالين كذاب يا انت تلتفت للدوام يا أنت تسرح بالرهيفه
4 اللي مايعرف الخواره يسابق بها بالسيده
5- من يوم صار الراكب ألي قلة نشوة الفوز
مع تحيات أخوكم أوسكار الهرفي
