يا عمي والله الناس تنسى..!
السلام عليكم ورحمة الله وبركاته
موضوعي لهذا اليوم عن كلام الناس...!!
المنظر الأول:
يدخل خالد على أبوه في المجلس ويقول يبه لقيت وضيفة اليوم
الأب : وش هي يا ولدي
خالد: حارس امن.!!
الأب: نعم نعم وش قلت .!!
خالد: حارس أمن في سوق
الأب: هذا اللي باقي آخرتها... ولدي يصير حارس امن
وش تبي الناس تقول عنا..!!
المنظر الثاني:
محمد عند اهل خطيبته
ويقول لهم انا حددت العرس
وحجزت استراحه يوم الخميس الجاي!!
الاهل : استراحه !!!!
من جدك انت تبي تسوي العرس في استراحه
ليه بنت فلان أحسن من بنتنا يوم
سوو عرسهم في القاعة الفلانيه؟!!
وش تبي الناس تقول عنا..!!
المنظر الثالث:
تدخل سارة على زوجها
وتقول له حبيبي قم ودني السوق..!!
الزوج ليه
تقول أبي اشتري فستان عشان عرس زميلتي بكرة!!
زوجها:والفستان الي توك شاريته
سارة: من عقلك أنت أروح العرس فيه
فشله وش تبي الناس يقولون عني!!!
::::::::::::::::::::::
الناس الناس الناس الناس
إلى متى وحنا مانسوي شي الا نخاف من كلام الناس ونحسب له
نكلف على أنفسنا ونتحمل ديون كله عشان
الناس تمدحنا..!!!
وتقول والله فلان شرى له سيارة جديدة!!
فلان سافر بر المملكه!!
فلانة شاريه لها كنب جديد!!
صار همنا الأول في اختيار أي شيء يخصنا
عيون الناس وكلامهم..!!
لو على حساب راحتنا وعلى حساب وضعنا المادي
المهم إننا نرضي الناس...!!!
بأختصار الشغله كلها صارت مظاهر وتباهي
وبعدين..::
هل الناس راح تدفع عنك ديونك
أو يساعدوك
لو دخلت السجن بسب تراكم الديون
وتأخرك بالأقساط وعدم سدادها.!!
لا والله بالعكس يصير
دخولك للسجن
سالفة لهم
يبدون فيها سواليفم!
ويضحكون عليك
ويقولون هذا غبي حط على نفسه من ها الديون
وآخرتها قعد فيها ما قدر يسدد.!!
إخواني
أنا ماني ضد إن الإنسان يلبس ويشتري الجديد
بالعكس التجديد مطلوب بس المهم انه مايضرنا ويكون من اجل عيون الناس وكلامهم..!!
واقول لكل واحد سو الشيئ اللي يناسب وضعك انت
وماعليك من كلام الناس دامك ماتعديت حدود الادب والعادات الحميده فقط واكرر العادات الحميده
غير كــــــــــذا
ماعليك من احد
وياااعمي ترى الناس تنسى والله ينسون..!!
هذا مالدي واتمنى ان اكون وفقت فيما كتبت
ولكم شكري وتقديري
أخوكم تواصل
