يا ليلة مرت علينا كما عام=ليله قمرها غاب صارت جهيمه
الحال مبري والسبب خنجرٍ سام=خلى حياتي والمشاعر سقيمه
صرت السجين اللي انحكم ظلم بإعدام=الحكم صادر دون سابق جريمه
وصرت اليتيم اللي بكوا لجله ايتام=وصرت النديم اللي مفارق نديمه
شوف الورق من دون تخطيط الأقلام=صفحة بياض ولا لها ثلث قيمه
وكثر العدد ما ينحصي دون الأرقام=وبعض المشاعر بالأوادم عديمه
الناس فيها ولف وفراق وخصام=وفيها صداقه مع علاقه حميمه
يا من سمع قولي ترا العلم قدام=فديتكم ياهل القلوب الرحيمه
الصبر يبقى والليالي لها أحكام=ودون الصبر تلقى العواقب وخيمه
والعقل ما يقبل سواليف الأوهام=والقلب حدث داخله من صميمه
يكفي الفتى تعليم من جور الأيام=منها عرف للصالحه والذميمه
وما ينفع المبصر تداليل الأقدام=لا صار قلبه في ظلما عتيمه
