السلام عليكم ورحمة الله وبركاته....
مسيكم بالخير جميعاً <<<بحكم توقيتي طبعاً
ماأدري من وين ابتدي لكن بخش عالموضوع على طول....
رجع رمضان الله يجعلنا ممن يقومه ويصومه....ورجعت اشياء كثيره معه....
ولا يكفي موضوع او موضوعين اتكلم فيه عن رمضان...
اخترت موضوع واحد ويمكن يستفيد منه الكثير ان شاء الله...
كلمة ودي اقولها من زمان
هذا رمضان يطل علينا من جديد والحمدلله اللي بلغنا رمضان بصحه وسلامه....
لكن السؤال هنا وش الجديد؟ وش تغير فينا عقب رمضان اللي راح(1426هـ)؟
زاد ايماننا والا رجعنا مثل اللي نقضت غزلها ...
لفت انتباهي قائمة ااسماء المسلسلات الرمضانيه
لكن اللي يعور القلب كلن حدد له مسلسل بيتابعه ....!!!
طيب مثل ماحددنا مسلسل هل حددنا اللي اهم منها ...
وهي ساعه على الاقل نقرا فيها ايه والا ايتين من القران...ترفعنا درجات يوم القيامه ؟؟
غيرنا اخذه الله قبل مايبلغه الشهر وغيرنا يتمنى يصوم بس مايقدر من مرض
ترانا في نعمه مانحس فيها .... واللي يبي يحس يمر اقرب مستشفى ويشوف بعينه
انا اول المقصرين منكم وجاء الوقت اللي نذل شهواتنا ونرجع تائبين لذو الجلال والاكرام ...
تذكروا كل ليلة في رمضان تعتق رقاب جعلنا الله واياكم من المحرمين على النار وجميع المسلمين
كلام يقرقع في القلب واظهره الكيبورد :D
امس كنا نصوم وعايشين جو رمضان ،، ما امدانا ننتهي منه الا الايام طايره،،
ورجع لنا رمضان مره ثانيه ،، الله يكفينا سرعة هالايام ،،
ايام تركض ركض ..
وقسم يااحس ان الايام ماسكه الايسر وداعسه وماغير تكبس للي قدامها..!!
اعتقد ان لو في دولتنا نظام صح .. كان عطوا الايام مخالفه سرعه..!!
ماامدانا نقول رمضان اللي راح خلص .. الا ورمضان اللي بعده مقبل ..!!؟ ..
حتى الوالد قام يتعيجز ..فصار يجيب مقاضي حقت ثلاث سنين قدام..
والصراحه الوالد معذور .. يقول مايمديني اجيب لهالرمضان واجلس واتواسى في جلستي
الا ورمضان اللي بعده جاء .. وامك فوق راسي تقول قم جب لنا مقاضي ..!!؟
يعني بصراحه هالرمضان يخلص ويروح .. ونقول يووه..بنشتاق له .. ثم ماندري الا طلع لنا ورجع مره ثانيه..!!؟
-------------------------
بس مهما كان .. يبقى رمضان شهر خاص .. له طعم معين.... شي اكيد ان شعوري شعور فرح .. لكن فرحه من نوع غير ما ادري كيف اعبر عنها .. فرحه ممزوجه بالطمأنينه والروحانيه..
ولو ان كثير مننا بدا يفقد هالطعم شوي شوي..
لكن يظل رمضان له ترتيبات وتجهيزات معينه .. فنوعيه الاكل تختلف
والجمعات العائليه تكثر ويصير الاغلب يحرص عليها
والكثير ولله الحمد يشد من حيله ويصير يحرص ع السنن والنوافل في هالشهر بشكل اكثر
وهذا مايميز هالشهر الفضيل ..
ولو ان هالشهر صارت الشركات تتنافس لاستغلال الاوادم..
والتلفزيونات كلن يبذل مجهوده علشان يجذب المشاهدين ..
لكن هذي امور لا انا ولا انتم نقدر نتحكم فيها .. ومالنا الا نحاول قد مانقدر..
ناخذ المفيد منها ... ونحاول نتجنب اللي يضيع وقتنا منها ..
<====المشكله ودي تشوفون شكلي وانا انصح .. واضح اني نصاااب خخخخ
------------------
بالنسبه لي .. دايما اقول الكلمه اللي يرددها اغلب الناس ( يازين رمضان اول)
احس كان له طعم .. ولون .. وريحه غير ..!!
كانو لا قالو رمضان جاء ..بالنسبه لي ..كأني مبشر بالجنه
كنت وانا صغير اللي اعرفه ان رمضان ..شهر الوناسه .. والجمعات..والاكلات الحلوه .. والفوازير
والروحه لصلاة التراويح مع الكبار .. وتحمل الجوع طول النهار .. علشان نحس بفرحه الفطور..
يعني باختصار ..مثلي مثل أي طفل .. ( صوره واحد متربع على الصفره ينتظر المدفع )
الا ان رمضان كان يعني لي شئ واحد زياده..!!
هو اني كنت اعتبره ...( شهر الفتوى ) ..
يعني هالشهر .. احس انه مصرح لي اني افتي بمايقدرني الله عليه من الفتاوي..
والمشكله الله يصلحني وانا صغير .. كان اخر مصدر ممكن استسقي منه فتاويي الخاصه .. الكتاب والسنه
لان كان عندي قاعده ...ان الفتوى اذا ماطلعت سريع سريع .. وهي حاااره .. ماتصير فتوى..
اما اقوم ارجع للكتاب والسنه .. والى كلام المشايخ والعلماء واجتهادات اهل العلم ... ماش ..كنت احس انها شغله طويله ..
واتذكر من فتاويي الخاصه..
اني كنت اعلك في رمضان ( يعني امضغ علك ) وانا صغير ..
فيجون عيال عمي واخواني ويقولون..تراك صايم ..مايصلح تمضغ علك ..
عاد انا ابتسم ابتسامه الفاهم .. واضحك داخل قلبي بسخريه على ماوصل اليه عيال اقاربي من الجهل والضلال نسأل الله السلامه..
واقول لهم ..المضغ شئ ..والاكل شئ ثاني .. في رمضان ماتاكل .. بس العلك ماينوكل .. ينمضغ بس .. يعني عادي يجوز..
ثم أحسست ..او خشيت بمعنى اصح..اني اساهم في تمييع الدين ..او استسهال احكام الصوم .. خصوصا ان العيال توهم صغار..مافيهم الا ثلاثه اكبر مني..!!
فاستدركت الموقف وقلت .. ولكن بشرط .. ان لاتبلع السعابيل اللي تطلع من العلك ..!!
<=== حسيت اني متشدد صراحه عقب هالاستدراك .. ولكن المصلحه تقتضي ذلك خخخخخخخ
------------------------
ثم اني في يوم من الايام جعت جوع ملعون صلايب ... والمشكله اني كنت متحمس والعب كوره ..فجاء مع الجوع عطش شديد..
فماش .. ماعاد تحملت..
فاضطريت اني اشرب كاس مويه .. مع نصف سندويتش جبن سايل..,
وجالس ع الدرج ومبوبز.. ومبسووط وماخذ وضعي..
الاويشوفوني العيال ..مره ثانيه..
ويقولون ..قفطنااااااااااااااااااك .. تاكل وانت صااااااايييييم .. هييين ..بنعلم ..بنعلم ..بنعلم..!!
طبعا تكررت مني نفس الابتسامه .. واللتي اتحسر فيها على ماوصل اليه العيال من تجني والحكم بمالايعلمون والله المستعان..
فقلت لهم .. انا ماكلت اكل كامل .. اكلت نص سندويتش بس .. ولاحتي كملته ..
يعني عاادي ..اذا كنت جاايع مرره .. وشوي وتموت .. عادي تاكل شئ مايخليك تموت .. بس ماتكلمه كله..
ومره اخرى .. بعد اصدار الفتوى .. خشيت من ان يتم التساهل من العيال في هذا الامر .. ويفسد صيامهم بسببي
فاستدركت الموقف .. وقلت .. بس ترا مايصلح تاكل .. الا اذا حسييت انك بتمووت خلااص .. يعني ماعاد تقدر تتنفس زين .. ماهو << -( تصدقوني هالكلمه البسيطه احس اني حضرمي خخخخخخخ) اذا جعت شوي رحت تاكل ..لا ..كذا مايصلح !!
--------------------------------
ولكن الفتوى الاكثر شهره .. واللي حققت صدى واسع الحقيقه ..
كانت الفتوى ( الثلاثيه) اللي صدرت عني ايام الاحساء ..مشاركه مع فرحان وتركي عيال عمي .. حفظهم الله
وكانت فتوى فيها الكثير من المنطق والعقلانيه .. والاجتهاد المبارك ان شاء الله ..
حيث كنت انا والاخ تركي .. ( اللي يعتبر شيخي ومؤدبي ..حفظه الله)
قد بدأنا بتفريق فريقين لكره القدم..
فريق يتكون مني .. انا الكابتن فيه .. واول فاول واول بلنتي ..
وفريق يتكون منه ..حفظه الله .. وقد تنازل عن الكابتنيه تواضعا منه .. ورفض ان يسدد اول فاول واول بلنتي ..واهداها لفريقي لوجه الله ... جزاه الله خيرا ..
المهم .. كنا نتبارى..وجمهوره هو فرحان .. احد تلامذه الشيخ تركي حفظهم الله جميعا ..
واثناء حماسنا مع المباراه .. اذن الفجر اذانه الاول (كنا نلعب بلايستيشن )
فرأى الشيخ تركي انه لابأس من مواصله اللعب قليلا .. لانه على حسب كلامه ( يمدينا نتسحر قبل مايأذن اذان الامساك...)
بعد ماطقيت خشم تركي قابلني الاخ فرحان...و مع استمرار التعادل.. ومع الحماس.. واستبسال الاخ فرحان ..في صد الضربات تلو الضربات .. وتطنيشنا لنداءات الباكستاني الدهمش( خويي بالشقه ) .. علشان نتسحر..
دخل وقت الامساك .. واذن الفجر ..!!
فتطايرنا وتفرقعنا مثل المرتاعين ... وذهبنا لكي ننكب على وجبه السحور وناكل مالذ منها وطاب..
الاان صديقي وفلذه كبدي قد اعلن ان وقت الامساك قد دخل .. ولتعاطفه معنا وعلى حالتنا الصحيه ..قال لابأس بأن تشربوا كأسا من الماء .. فبعض المساجد لم تعلن وقت الامساك بعد..
الا ان منظر الاكل لم يدع لنا مجالا للاكتفاء بشربه الماء ..
فافتينا فتوى ثلاثيه سريعه .. بانه يجوز الاكل ..لحين انتهاء جميييييع المساجد من اذان الفجر .. وعدم سماعنا لصوت الاذان ..
وفعلا ...انتهت جميع المساجد من الاذان ... ولكن بطوننا لم تشبع بعد..
فأحسسنا اننا في مأزق خطير..فلا يمكننا ان تنحمل هذا الجوع اكثر من ذلك ..
خصوصا اننا على موعد مع اكمال الاشواط الاضافيه من المباراه .. بعد السحور
فاقترح الشيخ تركي .فكره سديده .. وفقه الله ..وعرضها علينا ..
حيث رأى رعاه الله ..ان اذان الحرم المكي .. لم يعلن وقت الامساك ..
فقال اثابه الله : .. انه لايرى بأسا .. ان نواصل الاكل والشرب ..حتى اعلان الحرم المكي في مكه المكرمه ..وقت الامساك..
ولكن بشرط ..!!
ان لانتناول الافطار في اليوم الثاني ... الا مع اذان المغرب في الحرم المكي..
يعني مانفطر مع العيال لما يأذن المغرب في الاحساء ... ولكن ننثبر ونصبر الى ان يأذن المغرب في مكه .. ثم نفطر ...
لاننا ماامسكنا الاعلى اذان مكه ..فأكيد لازم مانفطر الا على اذان المغرب في مكه ..من باب أولى..!!
المهم..
وافقنا بالاجماع على هالفتوى والرأي السديد من الشيخ تركي .. وجلسنا نبلع الى ان اعلن الحرم المكي وقت الامساك .. فتوقفنا ..
وقام الشيخ تركي بلفظ مابقي في فمه من الماء عند سماعه الاذان .. تحسبا لان لايفسد صومه..واحتياطا واحترازا منه ..لاي مخالفه شرعيه ..ضاربا اروع الامثله في التمسك والالتزام والحرص على ان لايتم التساهل بامور الدين والصوم ..
وجاءاليوم التالي .... واذن المغرب في الاحساء ..معلنا وقت الافطار ..
وبينما كان العيال يتوقعون ان نكون نحن اول الجالسين على مائده الافطار كالعاده..
لم نخيّب توقعاتهم ... وكنا بالفعل ..اول الجالسين .. واول من افطر نحن..
وفتوى تفوت .. ولاحد يموت.. :D
------------------------
وقفه
ياحلوو رمضان وذكرياته وجووهـ اللي ريحته حلا و سمبووسه
منوول كان صووت السديس غصب يذكرنا برمضان وصلاة الحرم ومنظر الكعبه مدري ليه احس انه جوو روحاني رووعه بهالشهر ..
كنا وحنا صغار الصووم الله بالخير :
لين يجي العيد
قالو عيد الفطييييييير وبنطيييير من الفرحه... عيديه... وحلاوه.. وجمعه.. ننهبل له..وفرحه تعم النفس من الراس إلى الرجلين... ولين سمعت يكبرون الله اكبر الله اكبر الله اكبر عرفت انه يوم مميز الحمد لله كثير الله اكبر
كنا اطفال ونواصل من شده الفرح قبل ليله العيد مايجي الساعه 9 الا نايمين في ملابس العيد برائه ،، حب ،،حنان ،،طفوله
< قضبوه المزفلت تكفون قال حنان وبرائه خخخخخخخخخخخخخخخخخ
المهم والاكيد ان اكثر الناس وضع جدول للمسلسلات والبرامج ،، حتى لاتتضارب عنده ،،
الي نوى ختم المصحف المطهر مرات ومرات ،،
والي جهز العدة للصدقة والبر وصلة الرحم
واللي يعمر الاوقات بالطاعات،،
والي
والي
إلخ...........
اكرر سوؤال السابق
وش الجديد؟ وش تغير فينا عقب رمضان اللي راح(1426هـ)؟
كل واحد يدخل يقول وش اعد لرمضان وش الاحساس الي يحسه ومواقف الطفوله ...!!
دمتم :|for you|:
،،
