يا بــــا العوايد يا العيد
بسم الله الرحمن الرحيم
السلام عليكم ورحمة الله وبركاته
يـــــا بــــــاالعوايد ياالعيــــــد &&& يـــاالله عيـــــدك السعيــــــد
ياعمار يا العيد أول كانت هذه هجينية اهل الركايب يوم يغيرون من عرب لعرب
وهم لابسين ومتحفلين واللي يسبق الاول يكسب من هالزغاريت اللي تمصع القلب
أول كان كل شي له حلا من يوم تغيب الشمس من اخر يوم برمضان والعرب كلها ..كلن
حاطن يده على جبهته ويضهب يتعين الهلال ومن يوم يشوفه أول واحد بهم وهو قال:
أررهلال ياسعيد يامهلل الاهله ياجالي كل عله .. العيد عيد هلا بالعيد يالله عيدك ياسعيد.
ومن هنا تبدا مظاهر الأحتفال بالعيد بغز الرايات بمقادم البيوت وطبعا الرايات تختلف بأختلاف
الحاله الماديه من بيت لبيت فهناك من يصنف( بفئة فري امبورتنت بيرسون :D ) وهم
اهل الحلال الواجد وهذا تلقى
رايته تتكون من صوف مصبوغ بعدة الالوان مخيط على جنوبها صدف صغير
وتلقى فرشهم من البسط والقطايف ( طبعاً مهي قطايف الحلاوه )
قطايف فرش مصنوعه من صوف الغنم ومراكيهم أشده عليها جواعد وملابسهم جديده الرجل
يلبس ثوب مخيط من القماش الابيض يسمى الثوب الساحلي والحريم يلبسن ثياب امحوثله..
ومدارق.. والبنيات الجذيعات يلبسن مقاطع
اما اللي غنمه قليله ماغير قطيعة معيزا وابله غير جمل وناقه هذا تلقى رايته قطعة قماش أبيض
ولا خصلة أرتمه
ومن الفجر والناس لهم حتحته وما تسمع غير ارغا الجيش له لجه
بالبطنان كلن يجهز بعيره وشادن اشداده ومتحيزم بشبريته وخيزرانته بيده يومي بها ومن يوم يعيدون
على عربهم اللي عندهم يركبون جيشهم متوجهين لعربانهم اللي حولهم يعايدونهم وهم يحدون
( يابالعوايد يالعيد يالله عيدك السعيد ) كل ماطبوا على عرب قدموا لهم من ماجودهم
اللي عيديته ذبيحه واللي عيديته رز عليه منقع من سمن ولبن واللي عيديته فتيتة خبز بالسمن
يلطخون منها الى ما تطير ضلوعهم
وما يضحي الضحى الطويل الا والكل معيد وكلن ماشي بطريقه راعي الغنم مسرب بغنمه
وراعي البهم تاحن لبهمه بعدما تمتع بعطلته الرسميه وهي تاخير ساعتين عن الموعد
المحدد لرعي الغنم .
كل هالعلوم هذه سردتها جدتي لي ليلة العيد يوم شافت خبيطنا اللي جاي من السوق واللي رايح
له من يوم عشرين من رمضان وحنا يا عباتي وين اباتي جادتنا بيضا على السوق
كل ليله وانا منزلها هي وأهلنا والى طبينا السوق الجديد وعقب ما يحومن به دكان دكان
ثم قالن يا سوق القشل واهدم بيته:( السوق هذا مابه شي جديد غير الملابس اللي
جارتنا أم عواد مشتريه مثلها الحين لو نشتري مثلها تقول هذول قلدوني
مارياالله يا اوسكار ودنا للجاده يقولون به ملابس تهبل والله واقشهم وين أنتي يا
الجاده ولا وقفنا غير وجارنا أبو سعد ملبق بجمسه :eek: ومن يوم شافوه قالوا لا توقف
تعد على وجهك للسنابل هذا الحين لو شافونا تولجونا وشافوا اللي حنا نشتريه
عقبين ما له حلا لا دروا لمقضاتنا قبل العيد
واتعدا لسنابل ومن يوم جيناه ودنا نطلع الدور الثاني بالسلم الكهربائي وجدتي تتمز وتحرن بمحلها
و قالت : ول دبت عليك:D أنتم ودكم تخلونا نرقى مع هالبليه اللي يدبي أنا ما اني طالعه معه
ودي أحود وأجي مع الدرج... هالاغبر هذا لا وطيت عليه أحس تجيني مثل السومه:hot:
قلت يا جده السومه تجيش من كثر الحومه مهو من البليه اللي يدبي مثل ما تقولين
قالت : يا مالا فرقى العين يا وليدي يوم اني كنت بنت وراعية غنم كنت أتعربش البطنان
وأنا بجهدي ما عمري قلت أه يا رجلي لكن الحين كل شي غير بكهرب حتى الواحد ما يطلع
لبيته فوق غير بكهرب اتشوف الناس أكثرها غير مركوعه بيده من وجع رجليها
وعلى هالمسحوب كل ليله وحنا ديدابي ميدابي من سوق للسوق الى ليلة العيد
وما جت ليلة العيد غير وانا من التعب أزحف زحف مثل زحف مرشود يوم غليص
كصم أرجوله >>> الا على طاري غليص العلوم تسحب بعضها كنت انا وجدتي
كل ليله وحنا حاكرين برادي ابو أربع كاسات بهالجمبليزه ومتقابلين على غليص متحمسين ما ودنا يذبحونه
وكل ما شافت مناع وسمعته يقول أنا الشيخ مناع اللي مايهاب سود الليالي
انا اللي وطيت على أرقاب الرجاجيل بنعالي
وهي قالت : واكا الخيبه ياااا كشتك المتلبده يا الهبود ألينك ما ودك ترد الغزو
ولا تنفسنا الصعداء وأنبسطنا غير يوم شفنا غليص بوسط الهضاب وهو يرعد ويزبد ويتوعد
وهنا قالت لي الجده : ياوليدي قم تلين عشان بكره بدري توديني صلاة العيد كان هو
بأي مسجد يصلون السنه هذه
قلت : ماادري بس بكره نشوف الناس ونتبعهم
ومن الصبح ابو هيثم والوالده أسبقونا وأنا وجدتي نحوس وندوس راح الوقت وحنا انتحفل
ويوم جينا والناس نطحتنا مصليه وخالصه ولا دريت غير الجده مغرسه أيديها براسي
حنا ما ألهانا غير تمشيطك لكشتك هذه اللي مهي بعيده عن كشة فلاح
أليني كاني جدتك أني لا اخلي ابو هيثم يحتها على الصفر
قلت ياجده اليوم عيد عيدي وأغني لها ومن العااااايدين ومن الفاااااايزين
قالت : اقول خل عنك الحدا وبحر لدربك زين تراك منصمي ومنعمي هالايام
وقمت اسولف على نفسي وقلت أيــــــــــــه ياجـــده
لو تدرين عن اللي معميني ومصميني
قالت : واهمي وشو يا وليدي اللي مضايقك !
أنا ياوليدي تراي أمزح معك لو ازعل على الناس كلها ماأزعل عليك يأوسكااار
قلت ياجده الي معميني طعنة شخص عزيز علي وقلت :
وافكري اللي أحتاس تسعين حوسه &&& واقلبي اللي زاد رجفه وجضه
وحــالي اللي كل همــن تروســـه &&& تاخذ مع التفكير طوله وعرضه
والسبه اللي صابني سهم قوسه &&& وأنا عنه أغمضت طرفي وأغضه
عن طعنته اللي بي مغروسه &&& وكتمت غيضي اللي بالنواجذ أعضه
لمن بلاها أستفحل وصارسوسه &&& والشق كبر من كثر شده ورضه
ليته بعيد عني وبرجلي أدوسه &&& واحط عليه وثر البليهي وأشضه
بس البلا لا شاف راسي يبوسه &&& ولا أدرق حبل الموده يقضه
وسلامتكم مع تحيات أخوكم اوسكار الهرفي
رد: يا بــــا العوايد يا العيد
يعطيك العافيه وكل عام وانت بخير
رد: يا بــــا العوايد يا العيد
اقتباس:
المشاركة الأصلية كتبت بواسطة حمودعبدالله ابوشامه
يعطيك العافيه وكل عام وانت بخير
الله يعافيك اخوي حمود
وكل عام وانت بالف خير وسلامه
هذا الموضوع من ارشيفي عند ماكنت أكتب بأسم أوسكار الهرفي
رد: يا بــــا العوايد يا العيد
وعليكم السلام ورحمه الله وبركاته
كل عام وأن شاء الله تعالى الجميع طيبين وبصحه وسلامه
أسأل الله تعالى أن يجعل هذا العيد بداية لكل خير وأن يتقبل منا جميعا وأن يجعلنا من أهل الإيمان والعمران وأخلاق القرآن ومصر إلى خير بإذن الله الله أكبر ..
الله يعطيك العافيه وبارك الله فيك على الموضوع .
ودي وتقديري.
رد: يا بــــا العوايد يا العيد
من المؤكد أن العيد فقد حلاوته وفرحته فقد كان في الماضي عيداً له خصوصيته وطريقة مختلفه في استقباله واسلوب التعبير عن ذلك ،،،،،،،،،
كل عام وأنتم بخير،،،،،
رد: يا بــــا العوايد يا العيد
هلا وغلا / اوسكار
كل عام وأنتم بخير وعساكم من عوادة
لقد استمتعت بقرآءة رائعتك وجعلتنا نعيش العيد مع الماضي الجميل
شكراً لك لقد صورة الواقع بإسلوب مميز وطريقة محببه للنفس
لمتابعة القرآءة بدون ملل ولايجيد هذا الأسلوب إلا المبدعين
شكراً لك شكراً لك
رد: يا بــــا العوايد يا العيد
اقتباس:
المشاركة الأصلية كتبت بواسطة قاسم الرموثي
وعليكم السلام ورحمه الله وبركاته
كل عام وأن شاء الله تعالى الجميع طيبين وبصحه وسلامه
أسأل الله تعالى أن يجعل هذا العيد بداية لكل خير وأن يتقبل منا جميعا وأن يجعلنا من أهل الإيمان والعمران وأخلاق القرآن ومصر إلى خير بإذن الله الله أكبر ..
الله يعطيك العافيه وبارك الله فيك على الموضوع .
ودي وتقديري.
وعليك السلام ورحمة الله وبركاته
وكل عام وانت بخير
الله يعافيك وشكراً على الاطلاع
رد: يا بــــا العوايد يا العيد
اقتباس:
المشاركة الأصلية كتبت بواسطة مشعل بن مشحن السرحاني
من المؤكد أن العيد فقد حلاوته وفرحته فقد كان في الماضي عيداً له خصوصيته وطريقة مختلفه في استقباله واسلوب التعبير عن ذلك ،،،،،،،،،
كل عام وأنتم بخير،،،،،
كل عام وانت بخير
كثيره هي العادات والتقاليد التي تغيرة اخوي مشعل مع التقدم المضطرد بالحضاره
ويبقى للماضي حلاوته رقم قساوت الظروف
رد: يا بــــا العوايد يا العيد
اقتباس:
المشاركة الأصلية كتبت بواسطة مرزوق خلف الربدي
هلا وغلا / اوسكار
كل عام وأنتم بخير وعساكم من عوادة
لقد استمتعت بقرآءة رائعتك وجعلتنا نعيش العيد مع الماضي الجميل
شكراً لك لقد صورة الواقع بإسلوب مميز وطريقة محببه للنفس
لمتابعة القرآءة بدون ملل ولايجيد هذا الأسلوب إلا المبدعين
شكراً لك شكراً لك
الاخ مرزوق الربدي لك كل الود والاحترام
وأشكرك على مداخلتك الجميله بجمال أخلاقك الرفيعه
قصه من ضمن قصص كنت أسردها في متصفحي عند ماكنت أكتب بمعرفي المستعار
( أوسكار الهرفي)
كنت أحاول ان اذكر من يطلع عليها في عاداتنا وتقاليدنا الجميله في الماضي الذي بدت تندثر
مع تقدم الحضاره
شكراً ابو ثامر
