يقول اوسكار من حر ما جرى له
بسم الله الرحمن الرحيم
السلام عليكم ورحمة الله وبركاته
كح كح كح كح هب البرد وهب شتاه ...... وين الفروه والعباه >> أه واصدري اللي كن به
قعيس من القعيسات السود يوم يتعربش له بصلفاحه ملسا كل ما جا وده يظهر براسها
وهو تلولست رجليه ثم رجد ولنه بقعر الصلفاحه
كح كح كح أه من الدشبه اللي صايبتني هالايام أحس حكيكه بصدري ووصوصه مثل وصوصة
الجريوات اللي ما هن مفتحات أعيونهن ما خليت لا طب حضر ولا طب بدو الا سويته ولا هنا فود
عساه ما تعود من نصبه .....
بداية هالدشبه القشرا جيت من الدوام راجع من مشروع رمايه
بجبال شرورا ويوم وصلت البيت وانا طفشان ماادني احد يقول لي وجهك زين واطش البدله
على طول يدي واخذ لي شور محترم بالجاكوزي حقنا اللي هو طشت الغسيل الاحمر اللي جدتي
تغسل به لحافها الأبرق اللي محتفظه به عندها من قبل تجيب ابو هيثم تقول جابه جدي الله
يرحمه لها رضاوه عشان مره ضربها بعامود مقدم البيت وكصم يدها وتقول السبب أنه قال لها أرضعي
السلطان بعنز وحده والعنز الثانيه أحلبيها للعيل اللي من البارح وهو يوق لما تفرثنت تشبده
من الجوع .....> هذا انت يا ابو هيثم
وهي عيت قالت وليدي ما يرضع غير مني ....> صدق
لا قالوا أمهات يعني أمهات مهو مثل الحين ما يجي العيل غير وحليب سيميلاك
قدامه
وكلمه منه على .....برضه كلمه منه وكثر الكلام وزاد ونقص
وعند هاه ضربها وطمحت 0 (أي زعلت) ولارجعت غير يوم جاب لها هاللحاف المدندش اللي حمواتها
من يوم شافنه مااااتن من حره و كلهن اطمحن ودهن ارجالهن يجيبون لهن مثله بس
تقول جدتي ما حصلن غير القشل وقالت: يا قوم وسوم يا غتغته زعم ودهن يسون مثلي يتغلن
ولا هن عارفات اني يوم اتغلى يحق لي لاني ما عمري يا وليدي يا اوسكار ما عمري أوكد
ليله أن جدك بات مقوي ( ينام بدون عشاء ) حتى يوم انه يهاوشني ما اضرب عن خدمته اسوي له بسيسه
واللا اغفص له تمر بسمن وامده له من تحت العتشم مهو مثل حريم هالوقت اللي الوحده
زوجها يجهم مريوق (أي مافك الريق امحق ترجمه :D ) ويبيت مقوي وهي ما تدري عنه ضايعن يومها بين النوم والمسيار
وكل ما ذبحها الجوع وهي أرسلت لزوجها مسج هات لنا شاورما من فاكهة لبنان
وكانه مقفل عندك كودو ولا كنتاكي مايسكرون الا نص الليل المهم لا تجي اتلولح
ايديك فاضيه هات لو انه معمول >>>> الله يرحم حريم اول الوحده تموت من الجوع
ولا ترفع عينها بزوجها
اما حريم اليوم ذمااااارة وحده تلقى بها هبة ريح
نااادرأنك تلقاها مثل الشيبه بالراس
لا ويتعنفصن بعد وعند أدنى شي وهي زقمت
( التزقيم هي مدة البوز أي البرطم )
لا يعرفن يطبخن ذبيحه ولا يعرفن يمرسن مريسه ولو صار عند الوحده عشا ولا غدا
وهي دقة على حيها كله امها وشغالتها واخواتها وشغالاتهم كل العرب تجي فزعه لهالمظيومه
واللي يغبنك أن العزيمه مطبوخه بالمندي وكل هالصجه والرجه والحوسه على القهوه
والشاي واللي يغبن أكثر صبوح العشا وهي طيس بالفراش ما تحرك
من الضهيده اللي جتها >>> ياالله ياجده أنكِ شايله على جيل هالوقت
وكل ما اغسلت هاللحاف الارمل وهي كرت لي سالفته من جديد ومناقيدها الى مني حفضتها
عن ظهر قلب
المهم ما كني شطحت بالسالفه مثل شطحة الشرهان ببرنامج قصه وقصيده
نرجع لدشبه ..... كح كح كح ماا قولكم ان صدري تقل تراكض به جريه
ومن بعد ما اخذت الدش ويا دوب جلست متقوبع فروتي ومتحضن دفايتنا اللي
تقل مبخره ولا الجوال ابو هيثم يوم دق ولنه جارنا ابو عوده قال افزع لي ياابوهيثم
انا مغرس بطعوس دمج والوالد يتنحنح وهو ينقز ويروح للمرايه يوازن شماغه
والوالده من المطبخ تطش مواعينها اللي كانت تغسلهن وهي تجي وتاقف على الباب
و تخوصرأيديها وقالت : وش هالتلفون اللي خلاك تنقز يا ابو هيثم وانت قبيل
اقول لك ودني الخياط تقول مالك حيله وهالحين اشوفك قمت اتخابط تقول بعير
صايبه هيام
ولا ابو هيثم يوم تلعثم وقام كلامه ياكل بعضه قال : لاااا هذا جارنا ابو عوده متعطله سيارته
ودي أفزع له قبل غيبة الشمس
قالت الوالده : معه احد
قال ابو هيثم : ما أدري ما نشدته .... بس أكيد أنه لحاله من وده ياخذ معه
قالت الوالده : أنا اقول لك من معه !!! معه عيلته كلهم ومعه أخته العزبه
انا أشوفك من يوم جتهم هالعزبه وانت متغير !! يا غلو ابو عوده عندك هالايام
يهزك يمهم عود القرضي بس تدور لك علثه عشان تسير يمهم
يابن الحلال لا تذبح حالك مهي راضيه لك العزبه مار سم بزادك ويهناك
أجلس أجلس ما انت رايح من غير شر... عط المفتاح اوسكار وهو يفزع لهم
قلت انا : أه .. طبعا الاه هنا أستنكاريه .. أه أفزع له هو عين هاك النهار
سواته بي كل ما جيت اوقف سيارتي
بظل عمارتهم وهو طلع علي له قرمطه ولجاجه وهالحين ودكم أفزع له لله ماني فازعن له
وامي اتغمز لي وتاخذني بالصاله وتهمس بأذني : يا وليدي يا اوسكار أنت
أفزع لي لا تفزع لابو عوده أبوك لا راح يمهم أذل يطير مني
قلت : أفزع لناس كلها بس ابو عوده ... نو ... نو ... نو وي
قالت : يا منوننتن عليك يااللي ما عمري نخيتك وفزيت من اول مره
أسمع يا خامد الريح هذا عنده بنات وكل بنت أزين من أختها يمكن
لا شافتك وحده منهن ينعمي قلبها وترضى بك بدل ما انت معنس عندي وطايح
بوجهي طبقت السبع وعشرين حول وأنا دوبي أداديك أنت وجدتك حتى الجلسه مع ابو هيثم
ما أتهنى بها ما أوكدت أني حطيت دلتي وتقهوينا أنا وابو هيثم لحالنا الا يا انت يا جدتك
متزقلطين علينا
مار أمش يا بارد الحيل تحفل ورح لهم ما طول علينا ضو يمكن النصيب يصيب
هنا أنا أحسست بالغربه وبأني ساكن غير مرغوب فيه في هذا البيت وأن القطار تقل وده يفوتني
عاد كله ولا القطار يفوتني
واطش فروتي وما علي غير صلخ ثوبي حتى راسي ما نشف باقي أخضر الما يتناقط
من كشتي
وادق سلف لسيارتي ...وين انت يا ابو عوده.... ويوم جيت ولنه الله لا يبلا مندفن
له بطعس ويديه توامى من البرد واحلف عليه انه ما ينزل من السياره وهو ما يصدق
خبر وينزقط بسيارته المظلله اللي دوبي أشوف جهمة الزيلان اللي بها
وانا أيد أحفر بها عن الكفر ويد اوازن بها عقالي وعلى هالمسحوب الى ما حسيت
روحي نطت من البرد و حنوكي تسمع لها طقطقه بس كل ما تذكرت القطار
أنه وده يفوتني وأنا قمت احفر تقل نيص يحفر له عن عصنصله
ولا اطلعهم غير والبرد ما اخذ مني حمضه وعفاه
ويوم اني وصلت سيارتهم لارض العزاز وانا أنفش ريشي واجيه أمشي على
أطراف أصابعي وبصوت رخيم كله عذوبه : تامرنا بخدمه ثاني يا بو عوده
قال : لا يا ولدي بس وانا عمك خذ الفروه اللي بالمرتبه اللي ورا تدفى بها
نقز قلبك من البرد وانت من اليوم اتحفر
وانا يطيب لي كلامه واقعد اتنحنح وافتح الباب على حيا
ويوم فتحت الباب ولن فيه زول لا بسن له عباه ومتسندر بالمرتبه اللي ورا
ومن يوم لمحت هالزول و قلبي:|hart:| يقوم يرجف مثل رجف مكينتنا الهنديه
اللي بمزرعنا اللي ببوراكه وانا أشصب بمحلي ويمر شريط أحلامي ومستقبل
ايامي في ثواني ولا نبهني غير صوت ..................صوت جاي من المرتبه اللي ورا
.
.
.
.
.
يا ابو عووووددده الليد هذا منهو ولده ؟؟؟؟؟؟؟؟:eek:
قال : هذا اوسكار ولد ابو هيثم
وانا أفتح عيوني لمصدر الصوت ولنه غير أم أبو عوده :eek: ووخيين عوده :eek:
وكم لفة رواق وده يوديها لغنمه وغرس قبل انه يجيها
وأفتح عيوني زين وأسّرح ويمر شريط التعب والبهذله اللي جرت لي بثواني
ومن حر ما جرى لي بغيت أطبق ايدي بحلق ابو عوده ومع بغاقته الى ما
يعيف طلعات البر
وانا اطش فروته واركب سيارتي ولا يحير لي النسم غير وانا متغلمط بفروتي
ومتحضن دفايتنا اللي تقل مبخره
ومن هاك اليوم وانا لي نحيب تقل بعير صايبه النحاز
قال لي : الوالد رح لمستوصف الجزيره ولا الشفا ولا الزعبي.
قلت رحت لهم بس ما عندهم غير الابر ولا شوف تحسن
كل ما جاهم مريض عطوه أبرة فولترين ومضاد حيوي وعبوا له
كيس من هالعلاجات اللي شي له داعي وشي ماله داعي
قالت جدتي : اقول خل عنك علاجاتهم وقووطر وانا جدتك
للعطار اللي ورا اللقاص وهات كصمة حلتيته وخمشة مريره
وبطحة يدك لبان الذكر وصريرة ازعتر وقريص
ودي أموص اللي أموصه وأطحن اللي اطحنه ووجرك ياه
والباقي اسويه لك سفوف تلهمه على الريق تراه لدشبه
ما ينعلم به
كح كح كح كح كح واصدري اللي فيه كحه وكحه
كح كح كح كح كح كحة تخج بالقلب ولا توجع أوجاع
كح كح كح كح كح رحت لكل دكاترة البلد والمصحه
كح كح كح كح كح ورجعت من ابرهم انقز على كراع
أأأه و اصدري ........ ليتني أطيب وتهون الكحه ولو يفوتني ألف قطار
ما علي من كلام امي تقهوي الوالد على كيفها أعنس عندها ولا افطس
ورا النصبه
أأه يا ابو عوده وامري من مرك كلها من سبايبك
أرجو منكم المعذره على الانقطاع بسبب الدشبه
وسلامتكم مع تحيات أخوكم أوسكار الهرفي
رد: يقول اوسكار من حر ما جرى له
اووووووسكااااااااااااااااااااااااررررررر
,
للضحك معك طعم ثاني . الله لا يحرمنا منك ومن قصصك ,
.
رد: يقول اوسكار من حر ما جرى له
الاخ اوسكار مبدع كالعاده ولا عاد تبطي علينا
والزكمـــــــه الله لا يعيدها ما منها فكـــــــه بــــــس عليـــك بالفقــــس ادهــــن صـــدرك وغــــوش لــــك
مويـــــهه وتغلمط بالبطانيه
تراها وحـــــده بوحده ومــــا عليك من علاج العجايز تــــراه يمــــرضك بزيـــــاده
ما تشـــــوف شــــــر ان شـــــاء الله
اوسكــــار ان كـــانك فاضــــي يوم العيـــــد وماعنــدك شـــي وش رايــــك نتخــاوى للـــديره
ترانــي مستـــرخــص اسبــــــوع كامل وجيــــب ابو ســـالم عــلى الذمــــــه مقفص 2006 والعــــزبه
جـــاهزه بس قــل تـــم محفول مكفول وش قلـــت
وســـلم لي عـــلى ابو هيـــــثم وعـــلى جـــــدتــــك الــــــزاحفه
رد: يقول اوسكار من حر ما جرى له
اضحك الله سنك ياوسكار
ولا بارك الله به من قطار
وياما سبب لبعض الشباب عاهات مستديمة
خصوصا من نقل الصحون بالعروس وكله خوف من هالقطار الاقشر انه يفوتهم
على العموم ترى ما انت اول واحد يروح ضحية الفزعات وتعيش وتاكل غيرها
من يخطب الحسناء.... يصدقهاالمهر
ولا تطول علينا
رد: يقول اوسكار من حر ما جرى له
متشوف شر أوسكار
والله يخلي العجوز جدتك
اللي غارسه فيك طبع البداوه
والله يوفقك
رد: يقول اوسكار من حر ما جرى له
اشهد شهاده بعباده ان سواليف اوسكار تونس اللي مايتونس0
واااغبني غبناه ليته يرجع لنا .. ياااخي رشيد هو وين قوطر..
رد: يقول اوسكار من حر ما جرى له
أسعدك الله ياأوسكار على هالسوالف ....................
