قصيده من قديم الوالد اتمنى ان تنال اعجابكم
واقلبي اللي فيه تسعين تفكير = وروابعن عقب العشا يدهلنه
ميه مواريداً وميه مصادير = وميه يعالجهن وهن عالجنه
وياجر حالي جر دلواً على بير = من فوق صعباً والجنوب اضربنه
تقطعت من عاليات النواعير = الحبل يطلع والدليّ اعقبنه
على عشيراً حط بالقلب له كير = يشب جمراته لاما احرقنه
وجدي عليها وجد راعي مغاتير = شقحاً ومرباع الخطر يدهلنه
صكو عليها الصبح قوماً مشاهير = ومداسهم عكف المخالب يجنه
من عقب ماهن ذود راحن بعاثير = الكل قسمه خمس ماقنعنه
او وجد من عند غروساً مباكير = تسعين حلوه والقليب افقدنه
انهد جاله والسبب قطعت السير = والأرض رمله والغروس اتعبنه
او وجد من حطوه بالسجن تعبير = حكمه ثمان اسنين رغماً يجنه
عليك ياراع النهود المزابير = وشقر الذوايب لا نقضهن كسنه
والعين عين اللي ربت بالعناقير = حرار بالمرقاب ما فارقنه
والردف شط اللي متيه على ضير = ثنتين يتبعهن وهن يتبعنه
بيني وبينه ماتجوز المسايير = حَسَب ضروفي والضروف امنعنه
لو يرفع الشيله ويبد الازارير = اعقل رجال المنطقه صوبنه
راكان كان انك تحب الغنادير = البيض كم من واحداً لوعنه
يركن على كبده حدود المناشير = وعقب الغلا يا ابن جبل يرخصنه
لونك تعاديهم بجيش وطوابير = واغرقت مركبهن فهن يطلعنه
ويعزرنك باخر العمر تعزير = واللي بقى من ضامرك يطعننه
ويخدرنك بأبرت البنج تخدير = وخط العداله عمرهن مامشنه
وجور الهوى مذكور بكتيب الزير = وبصري طواريق الهوى شيبنه
وابن سبيّل شاف عج ومعاصير = يطرد ورى مضهورهن واتعبنه
ومحمد القاضي وابن زبن وعمير = وجديع ابن هذال كم غربنه
الشاعر\ رويشد بن عبدالله السميري
