في يوم ملبد بالغيوم اتصل علي ابو عبدالعزيز وقال بنظهر باكر مذكور جرة صيد جديدة ودنا نعس الارض 0 توكلت على الله وقمت أولم الأغراض الخاصة بالرحلة من طقطق الى سلام عليكم فاعبي حجر جهاز الايكوم اليدوي وافحص بطاريات جهاز القارمن الصغير من نوع sumitوالمخصص لمثل هذه الرحلة والكاميرا اخذها واعبي شنطة الرحلة اللي ابا شيلها على ظهري حيث ان رحلة صيد الوعول تحتاج للمشي على رجليك مسافات طويلة وانت وحظك يمكن تصيد ويمكن لا ومثل ماقال راعي المثل الصيد بآجاله والقناص بفأله
المراد صحت للمراه وين مفتاح الكحيلة ولاتدرون وشهي الكحيله كلكم تحسبونها فرس مربوطه
عندي في الدور العلوي الكحيله الله يسلمكم هي بندقي الشتاير وحاطها في شنطة مفتاحها ما يفارق
مخدتي من غليها عندي والله يجماعة الخير انه تعبت يدي وانا اعد دراهمها للشريطي 13000 ريال عداً ونقدا وفوقها حبة راس 0
فافتح شنطة البندق فأشيل المبروكة وامسحها واتفقد دربيلها واتذكر اللي يقول :
لي بندق ضربها ماضي له افعالي == ومخضب عقبها من ضرب شاربها
اضرب بها الوعل لمنه تهيالي == ابو حنية كبير الراس شايبها
فتنهدت وقلت الله يجيب اليوم اللي اخضب فيه عقبها
ويقول الفقير فيها
يذمها اللي يكنزون الريالي== اللي نقل رشاش بألفين شاريه
فحط المبروكة في خبا خفيف وأولم الأغراض وأنوم نومة زينه ويوم أصبح صبح الربوع
فأوصل العيال للمدرسة الا ابوعبدالعزيز يتصل جاهز قلت نعم قال جايك فاركب معه ونمر
ابومحمد ونمشي للظهرة فنحط الموتر في هاك الفرع اللي ذكرت فيه الجرة ونجي لذيك القلته
ونروي منها
http://www.mekshat.com/pix/upload/images/ibx1.jpg
ونقص الأثر ومابه اثر جديد في الفرع الاول وندوج لنا اربع ساعات ويلقى ابو محمد الاثر جديد في
الفرع الي حوله ويعطينا احداثيته وكيلوين الا شوي ولاحنا مع ابومحمد اليه مقرب الحطب ومهذي
البصل ومبرز براد الشاي بنتغدى على قاسمة الله
http://www.mekshat.com/pix/upload/images/ibx3.jpg
تغدينا غدا مبكر وصلينا ظهر وعصر جمع ونقطع الراي فقال ابومحمد انت ياراعي الشتاير اقعد
في علو الفرع وانا بامشي مع الاثر وبو عبدالعزيز في مثناة الفرع ان هج الصيد مني اليه يطا
ابو عبدالعزيز وان اخطا ابو عبدالعزيز اليه يطاك في علو الفرع رحنا نمشي مع المطامن
ونسبر الفرع الين وصلت علوه فاقعد مخالف للريح حدر ذيك الركبه 0
وانا جالس ادربل على الفرع ما حلمت ولاعلمت الا بصوت قض الحصى هج ثلاثة وعول
من رفيقنا ويطا الصيد ابوعبدالعزيز فيرمي عليهن خمس رميات المراد وصلت رفقيكم فطقتني
النفاضة وقام قلبي يرجف ويدي تنتفض واحفز وتوكل على الله وارمي باول رميه وليها مخطيه
وبالثانية وليها مخطيه فارمي الثالثة اليها بتوفيق الله ضاربة لوح اليد فوقف الوعل فاجهز
عليه بالرابعة يوم طاح تذكرت قول بن تويم الله يرحمه
قدمها سو المنايا في حزامه== المشوك صنع الاول مايدني
في يده ملحومة تجلي الغمامة== ماتهاب من المرامي لابعدني
لابعد المرمى وجادونه عسامه== من العضود الى اللهود يوقعني
المراد ان الشتاير فعلت وبيضت وجهي عند الجماعة وصارت ببلاش عقب هالفعل
http://www.mekshat.com/pix/upload/images/ibx6.jpg
فاركض عليه واذكية
http://www.mekshat.com/pix/upload/images/ibx5.jpg
http://www.mekshat.com/pix/upload/images/ibx7.jpg
ونسيت اقولكم ابو عبدالعزيز رمى خمس وذبح وعل مادريت عنه الين كلمني بالجهاز وعلمني
فنجتمع فيذاك الفرع ونقوم نعرض ونحورب فاشيل الصوت انا يامحاكيكم :
خبر اللي مهو معنا مخلينا== يوم جاه الخبر بلشان في شانه
قاعدن عند بيض تدعج العينا== شرد الصيد زين الوصف غزلانه
فيصلحنا ابو محمد الكبده عقب العصر المصيف ونصلخ صيدنا ونطيبه
http://www.mekshat.com/pix/upload/images/ibx9.jpg
http://www.mekshat.com/pix/upload/images/ibx10.jpg
http://www.mekshat.com/pix/upload/images/ibx11.jpg
ونبدا رحلة العودة الى الموتر وبعد صلاة العشاء الينا عند الموتر طايحين من التعب والشيل الثقيل
فننوم يوم صلينا الفجر فنتقهوى ونتكل على الله لاهلنا ويوم وصلنا البيت اجتمع العييل علي يسمعون
قصتي ومغامرتي والبنت الصغيرة يوم شافت راس الوعل قالت بابا بابا بع بع والى اللقاء في قصة
مقناص اخر ارويها لكم قريبا مدعمة بالصور ان شاء الله مع خالص تحياتي ،،،
