آمنت باللي كون الدنيا وبالحكمه خلق=إنسٍ وجنٍ تعبده وبعدل حكمه قد نصف
يا سامعي بعض الحكي خله على سمعك حلق=وبعض الحكي لا تتبعه لو تتبعه ريقك نشف
ذاب الحبر بين الأصابع قبل أحطه بالورق=بديت أحقق والمشاعر يا علي ما تعترف
أحدٍ قبل يروي ظماه بقطرة العذبه شرق=وأحدٍ يقول إنه عرف وبداخله لا ما عرف
أحدٍ نزف دمه تعب وأحدٍ من الراحه عرق=وأحدٍ يوصف حالته بس الحقيقه ما وصف
قافٍ سمعته يا علي أعذب من النسمه وأرق=قاله عريبٍ منبعه ساس الأصاله والشرف
يا قافي إرقى بي سما خل المجره واعتنق=ثم اعتنق جوف السما خل الكواكب ترتجف
مجنون شعر وعادته ثمّن كلامه لا نطق=إما يكمل مطلبه والا يموت ولا وقف
الطير يسبح بالفضا من صيدته ما به قلق=والحر حرٍ يا علي لو كل ريشه ينتف
اللي سقى نفسه شموخ بعزته هام و وثق=واللي يطوف من العمر ما رجّعه كثر الأسف
لو رحت أدور بالبحور أجيب بحرٍ ما نطرق= والشعر له هاوي وله شخص بعلمه محترف
شعرٍ تجانس بالدرر تطرز بشيح ويهق=والبعض الآخر يا علي قبل يتكامل ينجرف
والمبسم اللي سارقٍ مع سكّره لون الشفق=يرقص له المعنى طرب وإن ما تجمل ينكسف
الهيل ريح لمبسمه وتعانقه ريحة حبق=وبعض الوصايف خلها يا صاحبي لا تنكشف
واللي سمعته ياعلي هذا بعض حبر بورق=قلته بلحظة غفوتي وأخاف حرفي ينحرف
