هلت مزون القلب صافي بردها = تنثر معاني كلها ود وأشواق
سما القصايد قام يدوي رعدها=تمطر باحاسيس الغلا دمعة فراق
يا غايبه نفسي تعدت جهدها= كم ناح لك ورقٍ وكم دمع لك راق
وكم ضلعٍ أحدب ضم روحي لهدها=وفي مفرق الطرقات يا كم تعب ساق
من يوم راحت بددت من فقدها=وش علمها مدري علام الفضا ضاق
قمت أتساءل واترقّب وعدها=واسأل خفوقي ليه للبعد ما طاق
النار في جوفي تسعّر وقدها=يصرخ لها وسط الحشا كل معلاق
فيني لها شوقٍ يعانق جسدها=يرسم لقا ويلونه لهفة عناق
الروح ترحل تستكن اببلدها= ويبقى الجسد ما غير نبضٍ بخفاق
هي سالفة عمري ربت في مهدها = لين إكبرت واستوطنت كل الأعماق
ويوم أثمرت وأستانست في رشدها= للي سقاها بالغلا تهدي فراق
وشلون أبوصف حالتي وأعتمدها=وأسطر جروحٍ لها تبكي الأوراق
ما يوم مغليها سعى في نكدها = يهدي خطاها عذر لو يحرق احراق
ولا يوم كفه من غلاها شحدها= ومن عرقها يوم استوى ما بعد ذاق
نفسه كذا ماتتبع اللي جحدها = بيرق عزيز النفس بالعزخفاق
و ش تهدي الأم الحنون لولدها=تبقى حنونه لو بقى نصفها عاق
كم زارها طيفي وحل ونشدها = كم قال وينك ياشذا ابداع خلاق
حتى خيالي لا لمس طيف يدها = يبطي عليه الليل و الحلم ما فاق
يبطي يسامر ليل يعشق رغدها=يا كنها قمراه تضوي بالآفاق
لا والله إن كن القمر لا وجدها=من ضيها ياخذ على شفاه ترياق
وإن رددت نبره يردد بعدها=يا كن ضيه باهتٍ صابه إرهاق
ولحسنها قال أبشرت في سعدها = يهدي لها نجوم السما مهر وسياق
هي غايبه راحت وأنا من بعدها =أعيش طيفٍ يمطر أحلام واشواق
بعيش حلمي وأترقّب وعدها=يمكن بيومٍ لا غفى الحلم تشتاق
